ᐃᒥᕐᒥᒃ ᓴᓗᒻᒪᕐᓴᐃᕕᓕᕆᔪᖅ ᑐᓴᕋᑦᓴᖅ

06/01/2022

ᐃᒥᕐᒥᒃ ᓴᓗᒻᒪᕐᓴᐃᕕᓕᕆᔪᖅ ᑐᓴᕋᑦᓴᖅ

ᓄᓇᓕᐸᐅᔭᒃᑯᑦ ᐃᒥᕐᒥᒃ ᓴᓗᒻᒪᕐᓴᐃᕕᖓᑦ ᓱᓕ ᐱᐅᔪᐊᓗᒻᒥᑦ ᐃᒥᓕᕆᕙᑦᑐᑦ ᐃᒥᕋᑦᓴᐅᓯᐊᖅᑐᒥᑦ. ᐃᒥᕋᑦᓴᖅ ᐃᒥᖅ ᐃᒥᓕᕆᔾᔪᑎᒃᑰᐸᑦᑐᑦ ᒪᓕᒋᐊᒍᑎᐅᕙᑦᑐᖅ ᓄᓇᕗᒻᒥ ᐱᔾᔪᓯᕐᓂᒃ ᐱᓕᕆᔾᔪᑎᓂᑦ ᐊᒻᒪ ᑲᓇᑕᒥ ᐃᒥᖅᑕᐅᓂᐊᖅᑐᒧᑦ ᐃᒥᕐᒧᑦ ᒪᓕᒐᕐᓂᑦ.

ᐱᔾᔪᑎᐅᓗᓂ ᐃᒥᐅᑉ ᖃᓄᐃᓐᓂᖓ ᐱᓪᓗᒍ ᑐᐊᕕᕐᓇᖅᑐᓕᕆᔾᔪᑎᐅᓚᐅᖅᑐᖅ, ᓄᓇᓕᐸᐅᔭᒃᑯᑦ ᖃᓄᐃᓕᐅᕆᐊᕐᓯᒪᔪᑦ ᐱᐅᓯᑎᑦᑎᒋᐊᕈᑎᒍᑦ ᐊᒻᒪ ᖃᐅᔨᓴᐅᑎᓂᑦ ᐃᓚᒋᐊᕐᓯᓯᒪᓕᖅᑐᑎᒃ ᐃᒥᕐᒥᒃ ᓴᓗᒻᒪᕐᓴᐃᕕᒻᒥ ᐊᐅᓚᑦᑎᔾᔪᑎᐅᔪᓂᑦ, ᐊᒻᒪ ᖃᓄᐃᓐᓂᖓᓂᑦ ᐃᒥᐅᑉ ᓴᓗᒻᒪᓴᖅᑕᐅᕙᑦᑑᑉ. ᓄᓇᓕᐸᐅᔭᒃᑯᑦ ᖃᓄᐃᑦᑐᖃᓕᕐᓂᖅᐸᑦ ᐱᓕᕆᔾᔪᑎᑦᓴᓕᐅᕐᓯᒪᔪᑦ ᓯᕗᓂᕐᒥ ᓱᕈᓐᓇᖅᑐᑕᖃᒃᑲᓐᓂᓕᕐᓂᖅᐸᑦ ᐊᒻᒪ ᐸᕐᓇᐅᑎᓕᐅᖅᐸᓪᓕᐊᓪᓗᑎᒃ ᓴᓗᒻᒪᕐᓴᐃᓂᕐᒧᑦ ᐊᒻᒪ ᓴᓇᓂᕐᒧᑦ ᖁᐊᖅᑕᖅᑐᓂᑦ ᖃᑦᑕᓕᐊᖑᓯᒪᔪᓂᑦ ᐊᑦᑐᖅᑕᐅᓚᐅᖅᑐᓂᑦ ᐃᒥᐅᑉ ᖃᓄᐃᓐᓂᖓ ᑐᐊᕕᕐᓇᖅᑐᖃᐅᑎᐅᑎᓪᓗᒍ.

ᒫᓐᓇᒧᓪᓕ, ᓄᓇᓕᐸᐅᔭᒃᑯᑦ ᐱᔭᕇᕐᓯᓯᒪᓕᖅᑐᑦ ᒪᓕᒋᐊᓕᓐᓂᑦ ᐱᔭᐅᓚᐅᖅᑐᓂᑦ ᓄᓇᕗᑦ ᒐᕙᒪᒃᑯᖏᓐᓂᑦ, ᐱᖃᓯᐅᑎᓪᓗᒋᑦ:

• ᐋᖅᑭᑦᓱᐃᓂᖅ ᐃᒥᕐᒥᒃ ᐊᐅᓚᑦᑎᔾᔪᑎᑦᓴᒥᑦ ᒥᓪᓗᐊᕈᑎᒥᑦ ᓱᓇᖃᖕᖏᓐᓂᖓ.

• ᐋᖅᑭᑦᓱᐃᓂᖅ ᒪᕐᕉᓐᓂᒃ ᐃᒥᐅᑉ ᖃᓄᐃᓐᓂᖓᓂᑦ ᖃᐅᔨᓴᐅᑎᓂᑦ ᖃᐅᔨᓴᖅᐸᑦᑐᓂᑦ ᐃᒥᐅᑉ ᖃᓄᐃᓐᓂᖓ ᐱᓪᓗᒍ ᐃᓗᓕᖏᓐᓂᑦ, ᐱᓗᐊᖅᑐᒥ ᐸᐅᕈᔪᓐᓂᑦ, ᖃᐅᑕᒫᑦ ᐃᑲᕐᕋᓂ 24-ᓂ. ᓯᕗᓪᓕᖅ ᐱᓕᕆᕝᕕᒃ ᐋᖅᑭᑦᑕᐅᓚᐅᖅᑐᖅ ᖃᐅᔨᓴᐅᑎᐅᔪᒪᓪᓗᓂ ᐃᒥᕐᒥᒃ ᐱᔭᐅᕙᑦᑐᒥᑦ ᐃᒥᖅᑕᕕᒻᒥᑦ, ᓄᓇᓕᐸᐅᔭᐃᑦ ᐃᒥᖃᕐᕕᖓᓐᓂᑦ, ᐊᒻᒪ ᑐᓪᓕᐊ ᖃᐅᔨᓴᐅᑎᐅᕙᑦᑐᖅ ᓴᓗᒻᒪᓴᕐᓯᒪᔪᒥᑦ ᐃᒥᕐᒥᒃ ᐊᓂᕙᓪᓕᐊᑎᓪᓗᒍ ᓴᓗᒻᒪᕐᓴᐃᕕᒻᒥᑦ ᓱᓪᓗᓕᓐᓄᑦ.

• ᖃᐅᔨᓴᕐᕕᐅᔪᑦ ᑲᑎᑕᐅᓯᒪᔪᑦ ᓄᓇᓕᐸᐅᔭᒃᑯᑦ ᖃᐅᔨᓴᐅᑎᖏᓐᓂᑦ ᐊᐅᓚᑦᑎᔾᔪᑎᓄᑦ ᐊᒻᒪ ᐱᓕᕆᔾᔪᑎᓂᑦ ᐱᓯᒪᑦᓯᕕᒻᒨᖅᑕᐅᕙᑦᑐᑎᒃ (SCADA).

• ᐱᒋᐊᖅᑎᑕᐅᓂᖏᑦ ᐊᓯᖏᑦ ᐱᔾᔪᓯᒍᑦ ᐊᐅᓚᑦᑎᔾᔪᑎᓂᑦ ᐱᓕᕆᔾᔪᑎᑦᓴᓂᑦ ᐱᔾᔪᑎᒋᓪᓗᒋᑦ ᐃᒥᐅᑉ ᖃᓄᐃᓐᓂᖓ ᐱᓪᓗᒍ ᐊᑲᐅᖏᓕᐅᕈᑎᐅᔪᓂᑦ ᐊᒻᒪ ᒪᓕᒐᓕᐅᕈᒪᓪᓗᑎᒃ ᐃᖅᑲᓇᐃᔭᖅᑎᓄᑦ ᒪᓕᑦᑕᐅᒋᐊᓕᓐᓂᑦ ᖃᖓᑐᐃᓐᓇᒃᑯᑦ ᓱᕈᓐᓇᖅᑐᖃᓕᕐᓂᖅᐸᑦ.

ᐊᒻᒪᑦᑕᐅᖅ, ᓄᓇᓕᐸᐅᔭᒃᑯᑦ ᐱᔭᕇᖅᐸᓪᓕᐊᓕᖅᑐᑦ ᐱᒋᐊᖅᑎᑦᓯᔾᔪᑎᑦᓴᓂᑦ ᐱᓕᕆᐊᑦᓴᓂᑦ ᖃᖓᑐᐃᓐᓇᒃᑯᑦ ᓯᕗᓂᑦᑎᓐᓂ ᓱᕈᓐᓇᖅᑐᖃᓕᕐᒥᑉᐸᑦ ᐃᒥᕐᒥᒃ ᓴᓗᒻᒪᕐᓴᐃᕕᒻᒥ. ᐋᖅᑭᑦᓱᐃᓗᑎᒃ ᐊᒥᓱᓂᑦ ᖃᑦᑕᑦᓴᓂᑦ ᐃᒥᕐᒧᑦ ᐊᖅᑯᑎᐅᔪᓐᓇᕋᔭᖅᑐᓂᑦ ᐊᕙᓗᖏᒍᑦ ᖃᑦᑕᐃᑦ ᐊᑕᐅᑦᑎᒃᑯᑦ ᒪᑭᒪᑎᑦᓯᓯᓐᓈᕐᓗᑎᒃ ᓴᓗᒻᒪᕐᓴᐃᑎᐅᒋᐊᓕᓐᓂᑦ ᐱᔾᔪᓯᒍᑦ.

ᑏᓰᐱᕆ 16-ᒥ, ᐱᓕᕆᐊᖃᖅᐸᓪᓕᐊᑎᓪᓗᒋᑦ ᐃᒥᕐᒥᒃ ᓴᓗᒻᒪᕐᓴᐃᕕᒻᒥ, ᓴᓗᒻᒪᓴᖅᑕᐅᓯᒪᔫᑉ ᐃᒥᐅᑉ ᖃᓄᐃᓐᓂᖓᓂᑦ ᖃᐅᔨᓴᕐᕕᒻᒥ ᖃᐅᔨᓚᐅᖅᑐᑦ ᐊᖏᔪᑲᓪᓚᓐᓂᒃ ᐸᐅᕐᓂᒃ ᐊᓂᐊᔪᒥᑦ ᐃᓚᖓᓐᓂᒃ ᐃᒥᕐᒧᑦ ᖃᑦᑕᒥᑦ ᓴᓗᒻᒪᓴᕐᓯᒪᔪᒧᑦ ᐃᒥᕐᒧᑦ ᑯᕕᓯᕕᐅᕙᑦᑐᒥᑦ, ᖁᒻᒧᑦ ᑰᑦᑐᒥᑦ ᐃᒥᒃᑯᕕᓐᓂᑦ. ᓄᓇᓕᐸᐅᔭᒃᑯᑦ ᐃᖅᑲᓇᐃᔭᖅᑎᖏᑦ ᐊᒻᒪ ᐱᓕᕆᔾᕕᒻᒨᕐᓯᒪᔪᑦ ᖃᐅᔨᒪᔨᑕᐃᑦ ᓴᓇᒋᐊᓕᓐᓂᑦ ᐱᓕᕆᐊᖃᕆᐊᓯᑦᑕᐅᑎᒋᓚᐅᖅᑐᑦ, ᒪᓕᑦᑐᑎᒃ ᓯᕗᓂᐊᒍᑦ ᐋᖅᑭᑦᑕᐅᓯᒪᔪᓂᑦ ᐱᓕᕆᔾᔪᑎᑦᓴᓂᑦ ᐸᕐᓇᐅᑎᓂᑦ. ᐱᓕᕆᐊᑦᓴᓂᑦ ᐸᕐᓇᐅᑎᒥ ᑎᑎᕋᕐᓯᒪᔪᑦ ᒪᑐᓯᑲᓐᓇᖁᔨᓂᖅ ᓴᓗᒻᒪᕐᓴᐃᕕᒻᒥᑦ ᐊᒻᒪ ᖃᐅᔨᓴᖅᑕᐅᓗᓂ, ᓇᓗᓇᐃᖅᑕᐅᑦᓴᐅᑎᒋᖁᓪᓗᒍ ᐱᔾᔪᑎᐅᔪᖅ. ᐅᓗᕆᐊᓇᖅᑐᖅ ᐱᓗᐊᔾᔭᐃᒃᑯᑎᖏᓐᓂᑦ ᐱᓕᕆᒋᐊᑦᑕᐅᑎᒋᓚᐅᖅᑐᑦ ᑯᕕᓯᓪᓗᑎᒃ ᐊᒻᒪ ᖃᐅᔨᓴᖅᐸᑦᑐᑎᒃ. ᐱᔾᔪᑎᐅᓗᓂ ᐱᓕᕆᐊᖑᒋᐊᑦᑕᐅᑎᒋᓚᐅᖅᑐᑦ, ᐸᐅᕐᓂᒃ ᓱᕈᐃᓯᒪᔪᓂᑦ ᖃᐅᔨᔪᖃᓚᐅᖏᑦᑐᖅ ᐃᒥᓕᕆᔾᔪᑎᒥᑦ.

ᓇᓗᓇᐃᖅᑕᐅᓚᐅᖅᑐᖅ ᖃᓄᐃᒍᑎᐅᓚᐅᖅᑐᖅ ᐱᔪᕕᓂᐅᓂᖓᓂᑦ ᐱᓕᕆᑎᓪᓗᒋᑦ ᒪᑭᒪᔾᔪᑎᓕᕆᓂᕐᒥᑦ ᐃᓗᐊᓂ ᓴᓗᒻᒪᕐᓴᐃᕕᐅᑉ. ᐱᓕᕆᐊᖑᓚᐅᖅᑐᒃᑯᑦ ᐃᒪᖃᓗᐊᓕᕐᓂᓚᐅᕐᒪᑦ ᐊᑦᑐᖅᑕᐅᓯᒪᖏᑦᑐᒦᓚᐅᖅᑐᖅ ᖃᑦᑕᒥ, ᐃᒪᖃᓗᐊᕐᓕᕐᓂᖓᓂᑦ ᑕᑕᓗᐊᓕᕐᓂᕐᒪᑦ. ᐊᑦᑐᖅᑕᐅᓯᒪᓚᐅᖏᑦᑑᑉ ᖃᑦᑕᐅᑉ ᖁᓛᒍᒐᓚᒃ ᖃᐅᔨᓕᓚᐅᖅᑐᑦ ᓱᕋᑦᓯᒪᔪᒥᑦ. ᑕᒪᓐᓇ ᐱᓪᓗᒍ, ᐃᒥᖅ ᓴᓗᒻᒪᕐᓴᐃᕕᐅᑉ ᐃᒋᑦᑎᒋᕙᑦᑕᖓᓂᒃ ᐃᒥᕈᔪᒻᒥᒃ ᖃᑦᑕᒨᖅᐸᑦᑐᖅ ᐊᑦᑐᐃᓂᕐᒪᑦ ᑕᒪᑦᓱᒥᖓ ᕿᓚᒥᕈᓘᒐᓗᐊᖅ ᐱᓕᕆᐊᖑᓂᖓᓂ ᓴᓗᒻᒪᕐᓴᐃᕕᐅᑉ ᐃᓗᐊ. ᓄᓇᓕᐸᐅᔭᒃᑯᑦ ᐱᓕᕆᐊᕆᓕᓚᐅᖅᑕᖏᑦ ᑕᒪᓐᓇ ᐱᓪᓗᒍ ᐊᑐᖅᑎᑦᑎᓕᖅᑐᑎᒃ ᐊᑕᐅᓯᕐᒥᑦ ᖃᑦᑕᒥᑦ ᐊᓯᐊᓂᑦ ᐲᔭᕇᖅᑕᐅᓵᖁᓪᓗᒍ ᐃᓚᒋᔭᐅᓂᖓ ᐱᓪᓗᒍ ᐱᓕᕆᐊᖑᒋᐊᓕᓐᓄᑦ, ᐊᓯᐊᓄᑦ ᓴᖑᑎᑕᐅᓕᖅᑐᓂ ᐃᒥᖅ ᖃᑦᑕᒥᒃ ᑯᕕᕙᑦᑐᖅ ᐊᒻᒪ ᖃᐅᔨᓴᖅᑕᐅᑲᓐᓂᕈᓐᓇᓕᖅᑐᓂ.

ᐊᑦᑐᖅᑕᐅᓚᐅᖅᑐᖅ ᖃᑦᑕᖅ ᐊᑐᖅᑕᐅᕙᒍᓐᓃᖅᑐᖅ ᓴᓇᔭᐅᒋᐊᓚᐅᖏᓐᓂᖓᓂ ᐊᒻᒪ ᐊᑐᖅᑕᐅᑲᓐᓂᕈᓐᓇᕐᓂᖓ ᐱᓪᓗᒍ ᐱᔭᕇᖅᑕᐅᓇᓱᐊᕐᓂᖏᓐᓂ.

ᒫᓐᓇᒃᑯᑦ, ᐊᕙᑎᓕᕆᔨᓂᑦ ᐱᓕᕆᔨᓂᑦ ᔮᓐᓄᐊᕆᒥ ᐱᔭᕇᕆᐊᖅᑐᕆᐊᓖᑦ ᐊᓯᖏᓐᓂᑦ ᐱᓕᕆᐊᑦᓴᓂᑦ ᐊᒻᒪ ᖃᐅᔨᓴᖅᑕᐅᑲᓐᓂᓛᖁᓪᓗᒍ ᖁᐊᖅᑕᖅᑐᓂᒃ ᐃᒥᒃᑯᕕᓐᓂᑦ ᖃᐅᔨᓴᖅᑎᒻᒪᕆᓐᓄᑦ. ᖃᐅᔨᓴᓚᐅᖅᑎᓪᓗᒋᑦ ᓴᖅᑮᓛᖅᑐᑦ ᐊᑐᖅᑕᐅᖁᔭᒥᓂᒃ ᐱᔾᔪᑎᐅᓗᑎᒃ ᓴᓇᔭᐅᓛᖅᑐᑦ ᐊᑦᑐᖅᑕᐅᓯᒪᔪᓂᑦ ᖃᑦᑕᓂᑦ ᐃᒥᕐᒥᒃ ᓴᓗᒻᒪᕐᓴᐃᕕᒻᒦᑦᑐᓂᑦ.

ᓯᕗᒧᐊᑉᐸᓪᓕᐊᓂᕐᒧᑦ ᐃᓚᒋᔭᐅᓗᑎᒃ, ᐃᒥᐅᑉ ᖃᓄᐃᓐᓂᖓ ᖃᐅᔨᓴᖅᑕᐅᖏᓐᓇᓂᐊᖅᑐᖅ, ᓄᓇᓕᐸᐅᔭᐃᑦ ᐃᒥᓕᕆᔾᔪᑎᖏᓐᓄᑦ, ᐊᑐᐃᓐᓇᐅᑎᑕᐅᕙᓪᓗᑎᒃ ᓄᓇᓕᕐᒥᐅᑕᓄᑦ ᖃᕋᑕᐅᔭᒃᑯᑦ ᐅᕙᓂ www.iqaluit.ca ᐅᑯᐊ ᐃᒥᓕᕆᔪᑦ (“Water Facts”) ᑎᑎᕋᕐᓯᒪᕕᖏᓐᓂ.

ᐃᓚᒋᔭᐅᓗᑎᒃ ᓄᓇᓕᐸᐅᔭᒃᑯᑦ ᐃᒥᐅᑉ ᖃᓄᐃᓐᓂᖓᓂᑦ ᖃᐅᔨᓴᕐᓂᐅᔪᒧᑦ, ᐃᒥᐅᑉ ᖃᓄᐃᓐᓂᖓ ᐱᓪᓗᒍ ᐅᖄᓚᕕᑦᓴᐃᑦ ᐊᑐᐃᓐᓇᐅᖏᓐᓇᓂᐊᖅᑐᖅ ᐊᕐᕌᒍᓪᓗᐊᒧᑦ ᐊᑐᖅᑕᐅᔪᓐᓃᓚᐅᖅᑎᓪᓗᒍ ᐃᒥᕐᒥᒃ ᐃᒥᕆᐊᖃᖏᓂᕐᒥᑦ ᐊᑐᖅᑕᐅᖁᔭᐅᔪᖅ. ᑭᓇᑐᐃᓐᓇᖅ ᖃᐅᔨᒍᓂ ᐃᒥᕐᒥᒃ ᑎᐱᓕᒻᒥᑦ, ᐅᖄᓚᒋᐊᓖᑦ ᐅᕗᖓ 979-5603 ᐅᖃᐅᓯᐅᖁᓪᓗᒍ ᑎᐱᓕᒃ.

ᑐᑭᓯᒋᐊᒃᑲᓐᓂᕐᕕᑦᓴᖅ, ᐅᓇ ᖃᐅᔨᒋᐊᕐᓗᒍ:
ᐊᓕᒃᓯ ᑳᒧᕋᓐ
ᑐᓴᐅᒪᑎᑦᑎᓕᕆᓂᕐᒥᑦ ᐊᒻᒪ ᐱᔨᑦᓯᕋᖅᑎᓂᑦ ᐊᐅᓚᑦᑎᔨ
ᓄᓇᓕᐸᐅᔭᐃᑦ ᐃᖃᓗᐃᑦ 
867-979-5607 | a.cameron@iqaluit.ca

Notice: