ᐊᖏᔫᑎᓂᒃ ᓴᓂᕐᓂᒃ ᓄᐊᑦᓯᓛᕐᓂᐊᖅᑐᑦ ᔪᓂ 17-ᒥᑦ 21-ᒧᑦ

28/05/2019

ᐊᖏᔫᑎᓂᒃ ᓴᓂᕐᓂᒃ ᓄᐊᑦᓯᓛᕐᓂᐊᖅᑐᑦ ᔪᓂ 17-ᒥᑦ 21-ᒧᑦ
 ᓯᑎᒃᑯᑦ ᖁᕕᐊᒋᓪᓗᒍ ᓇᓗᓇᐃᕐᓯᒍᒪᕗᑦ ᐊᕐᕌᒍᑦᑎᓐᓂ ᐊᖏᔫᑎᓂᒃ ᓴᓂᕐᓂᒃ ᓄᐊᑦᓯᓛᕐᓂᐊᓕᕐᒥᒻᒪᑕ ᐱᓇᓱᐊᕈᓯᕐᒥᒃ ᐊᑕᐅᓯᕐᒥᒃ, ᐅᕙᖕᖓᑦ ᓇᒡᒋᔾᔭᐅᒥᑦ ᔪᓂ 17 ᑕᓪᓕᒥᕐᒧᑦ ᔪᓂ 21, 2019.
ᐱᓇᓱᐊᕈᓯᐅᓕᖅᐸᑦ, ᓄᓇᓕᕐᒥᐅᑕᐃᑦ ᐃᒋᑦᓯᒍᓐᓇᓛᓕᕐᒥᔪᑦ ᓄᐊᑕᐅᔪᓐᓇᖅᑐᓂᒃ ᒪᕐᕉᓐᓂᒃ ᐊᖏᔫᓐᓂᒃ ᐃᓪᓗᒥ ᓱᓇᒃᑯᑖᒥᓃᓐᓂᒃ ᐊᒻᒪᑦᑕᐅᖅ ᐱᖓᓱᓂᒃ ᓴᓂᐸᐅᔭᓂᒃ ᐅᖁᒪᐃᓐᓂᓕᓐᓂᑦ 50 ᐸᐅᓐᓯᓂᑦ ᐅᖁᒪᐃᓐᓂᕐᓴᓂᓪᓘᓐᓃᑦ, ᐊᒻᒪ ᐊᖏᓗᐊᖅᑐᓂᒃ ᐴᕋᓱᒃᑲᓗᐊᖅᑐᒋᑦ ᕿᓂᖅᑕᓄᑦ ᕿᓪᓚᔪᑭᐊᓄᑦ ᓴᓂᒃᑯᕕᐸᐅᔭᓄᑦ.
ᐃᖅᑲᓇᐃᔭᖅᑏᑦ ᐃᖅᑲᓇᐃᔭᖃᑦᑕᓛᖅᑐᑦ ᐃᖃᓗᐃᑦ ᐃᓗᐊᓂ ᐱᓇᓱᐊᕈᓯᓕᒫᖅ, ᓄᐊᑦᓯᕙᓪᓗᑎᒃ ᐊᔾᔨᒌᓂᒃ ᓴᓂᕐᓂᒃ ᐅᓪᓗᑕᒫᑦ. ᓲᕐᓗ, ᐅᓪᓗᕐᒥ ᐊᑕᐅᓯᕐᒥ ᐃᖅᑲᓇᐃᔭᖅᑏᑦ ᓄᐊᑦᓯᑕᖅᐳᑦ ᐃᓪᓗᓂ ᓱᓇᒃᑯᑖᒥᓃᓐᓇᕐᓂᒃ. ᕿᓚᒥᐅᒍᑎᒃ ᑖᒃᑯᓂᖓ ᓴᓂᕐᓂᒃ, ᐊᓯᖏᓐᓂᒃ ᐊᔾᔨᒌᓂᒃ ᓴᓂᐸᐅᔭᐅᑎᓂᒃ ᓄᐊᑦᓯᖔᓕᕐᒥᓗᑎᒃ ᐊᓯᐊᓂ ᐅᓪᓗᕐᒥ.
ᓄᓇᓕᕐᓂᒥᐅᑕᐃᑦ ᐱᖃᑕᐅᔪᒪᔪᑦ ᐱᓕᕆᐊᑦᓴᒧᑦ ᓴᓂᕐᓂᒃ ᓄᐊᓯᒪᔭᕐᒥᓂᒃ ᓴᓂᐊᓅᕆᕙᓪᓗᑎᒃ ᓴᓂᒃᑯᕕᖏᑕ ᓈᑦᓯᐅᖑᔭᐅᑉ ᐅᓐᓄᖓᓂ, ᔪᓂ 24. ᓴᓃᑦ ᓄᐊᓯᒪᒋᐊᓖᑦ ᐊᔾᔨᒌᓪᓗᑎᒃ ᐊᑕᐅᑦᓯᒥ - ᐊᑕᐅᓯᖅ ᐃᑦᓯᕙᐅᑕᒥᓂᕐᓄᑦ ᓵᒥᓂᕐᓄᑦ, ᐊᒻᒪ ᐃᓪᓗᒥ ᓱᓇᒃᑯᑖᒥᓃᑦ ᐊᑕᐅᓯᕐᒥᓪᓗᑎᓪᓗ. ᓄᐊᑕᐅᓯᒪᔪᑦ ᖁᓕᕇᖏᓪᓗᑎᒃ, ᐊᒻᒪ ᑲᑎᓯᒪᕈᓘᔭᖕᖏᓪᓗᑎᒃ ᓴᓂᑐᐃᓐᓇᕐᓄᑦ. ᓄᐊᑕᐅᔪᑦ ᓴᓃᑦ ᐊᑦᓯᕕᒻᒨᖅᑕᐅᖃᑦᑕᓛᖅᑐᑦ.
ᓱᓇᑐᐃᓐᓇᐃᑦ ᓄᐊᑕᐅᖁᔭᐅᖕᖏᑦᑐᑦ ᓴᓂᒃᑯᕕᐅᑉ ᓴᓂᐊᓃᒋᐊᖃᓛᖕᖏᑦᑐᑦ (ᓲᕐᓗ ᐸᐃᓯᑯᐃᑦ, ᐱᖕᖑᐊᑦ) ᐃᒋᑕᐅᑲᓪᓚᓛᖏᒻᒪᑕ.
ᖃᐅᔨᒪᓂᐊᖅᑯᓯ ᑮᓇᐅᔭᓕᐅᕐᕖᑦ ᐱᖃᐅᑕᐅᓛᖕᖏᒻᒪᑕ ᐱᓕᕆᐊᑦᓴᒧᑦ ᐊᖏᔫᑎᓂᒃ ᓴᓂᕐᓂᒃ ᓄᐊᑦᓯᓕᖅᐸᑕ (ᓲᕐᓗ ᓄᓇᓕᐅᑉ ᐃᓄᒋᐊᕝᕕᖓ, ᑰᓕᐊᕆᐊᖅ, ᐊᒻᒪ ᖃᖅᑲᓕᐊᕆᐊᒥ ᐊᑐᕆᐊᕐᒦᑦᑐᑦ ᐅᖓᓪᓕᖅᐹᓅᕆᐊᒥ).
ᐃᑲᔪᕐᓂᐊᕋᑦᓯ ᐅᐸᓗᖓᐃᔭᐃᔪᓂᑦ ᐊᖏᔫᑎᓂᒃ ᓴᓂᕐᓂᒃ ᓄᐊᑦᓯᓂᐅᓛᖅᑐᒧᑦ, ᐅᑯᐊ ᖃᐅᔨᒪᒋᐊᓖᑦ ᐊᑐᐊᒐᐃᑦ:
ᐅᑯᐊ ᓴᓃᑦ ᓄᐊᑕᐅᖃᓯᐅᑎᓛᖅᑐᑦ:
 3 ᐊᖏᔪᓂᒃ ᓴᓂᕐᓂᒃ ᐊᑕᐅᑦᓯᒥᒃ ᐃᓪᓗᒥᒃ, ᐊᒻᒪ ᒪᕐᕉᒍᓐᓇᖅᑑᒃ ᐃᓪᓗᓂ ᓱᓇᒃᑯᑖᒥᓃᑦ (ᐅᐊᔭᐅᑎᒥᓂᖅ, ᐸᓂᕐᓰᕕᒥᓂᖅ, ᖁᐊᒃᑯᕕᒥᓃᑦ, ᐅᕝᕙᓘᓐᓃᑦ ᐃᒐᒥᓂᖅ/ᑭᐊᑦᓴᐅᑎᒥᓂᖅ):
 ᓴᓃᑦ ᐅᖁᒪᐃᓐᓂᓖᑦ 50 ᐸᐅᓐᓯᓂᒃ ᐅᖁᒪᐃᓐᓂᕐᓴᐅᓗᑎᓪᓘᓐᓃᑦ, ᐅᕝᕙᓘᓐᓃᑦ ᐊᖏᓗᐊᕈᑎᒃ ᒪᑐᒍᓐᓇᖏᓪᓗᓂ ᓴᓂᒃᑯᕕᒃ ᕿᓪᓚᔪᑭᐊᖅ, ᐱᖃᓯᐅᑎᓗᑎᒃ ᒪᑯᐊ:
• ᐃᓪᓗᓂ ᓱᓇᒃᑯᑖᒥᓃᑦ (ᐃᑦᓯᕙᐅᑕᑯᑖᒥᓃᑦ, ᐃᑦᓯᕙᐅᑕᒥᓃᑦ, ᓵᒥᓃᑦ,
ᐊᓪᓕᓂᒥᓃᑦ, ᐊᓯᖏᓪᓗ)
• ᓇᑎᒥᓃᑦ (ᒥᖅᑯᓖᑦ, ᒥᖅᑯᓖᑦ ᐊᓪᓕᕋᖏᑦ, ᐊᒻᒪ ᓇᑎᒥᓃᑦ), ᕿᓚᑦᓯᒪᓗᒋᑦ
ᐊᖏᓂᖃᕐᓗᒋᑦ 1.7 ᒦᑕᓂᑦ ᓴᓂᒧᑦ 1 ᒦᑕᓂᒃ ᑐᑭᒧᑦ (5 ᕖᑦ ᐊᒻᒪ 3 ᕖᑦ)
(ᐊᑕᐅᓯᖅ ᕿᓚᑦᓯᒪᔪᑦ ᐊᑕᐅᓯᖅ ᓴᓂᐸᐅᔭᖅ)
• ᓱᓪᓗᓕᒥᓃᑦ, ᑯᕕᔫᒥᓃᑦ, ᐱᖃᓯᐅᑎᓗᒋᑦ ᖁᕝᕕᒥᓃᑦ
• ᐃᒐᓛᒥᓃᑦ ᐊᒻᒪ ᑕᕐᕋᖅᑑᑎᒥᓃᑦ
ᐅᑯᐊ ᓱᓇᑐᐃᓐᓇᐃᑦ ᓄᐊᑕᐅᓛᖕᖏᑦᑐᑦ, ᐊᒻᒪ ᑰᓕᐊᕆᐊᒥ ᐊᑦᓯᕕᒻᒨᕈᔾᔭᐅᒋᐊᓖᑦ ᐃᒋᑕᐅᓛᕐᒪᑕ ᑕᐅᕙᓂ:
• ᐊᔾᔨᒌᖏᑦᑐᑦ ᑲᑎᓯᒪᕈᓘᔭᖅᑐᑦ ᓴᓃᑦ
• ᐃᓪᓗᓕᐅᕈᑎᒥᓃᑦ ᐊᒻᒪ ᐃᓪᓗᒥᓃᑦ ᓴᓃᑦ
• ᕿᔪᐃᑦ (ᓴᓇᔭᓂᒃ/ᓱᕋᐃᔭᖅᑕᓂᒃ ᓴᓃᑦ, ᐃᓕᔾᔨᕕᒥᓃᑦ, ᐊᓪᓕᕋᒥᓃᑦ ᕿᔪᐃᑦ,
ᐴᒥᓃᑦ ᕿᔪᐃᑦ, ᒪᑐᒥᓃᑦ, ᐊᓯᖏᓪᓗ)
• ᐅᐊᔭᒨᖅᑐᒥᓃᑦ (ᑏᕖᒥᓃᑦ, ᖃᕋᑕᐅᔭᒥᓃᑦ, ᐊᓯᖏᓪᓗ)
• ᐃᓪᓗᒧᑦ ᐊᑐᖅᑕᒥᓃᑦ ᐅᓗᕆᐊᓇᖅᑐᑦ ᓴᓃᑦ
• ᓄᓇᓯᐅᑎᓄᑦ ᐃᓚᒥᓃᑦ, ᐱᖃᓯᐅᑎᓗᒋᑦ ᐃᑦᓯᕙᐅᑕᒥᓃᑦ ᓄᓇᓯᐅᑎᓄᑦ
• ᐊᑦᓴᓗᐊᒥᓃᑦ
• ᓴᕕᕋᔭᐃᑦ
• ᐳᓪᓚᖃᐅᑎᒥᓃᑦ
• ᓯᐅᕋᖅ ᐊᒻᒪ ᐅᔭᖅᑲᐃᑦ
• ᐆᒪᔪᖁᑎᓂᑦ ᓴᓃᑦ
• ᐃᑦᑎᕐᕕᐅᔭᒥᓃᑦ ᐸᐃᑉᐹᑦ ᑎᒋᖓᔪᑦ - ᑕᒪᒃᑯᐊᓕ ᐱᖃᓯᐅᔾᔭᐅᔪᓐᓇᖅᑐᑦ
ᐃᓪᓗᓂᑦ ᓴᓂᑐᐃᓐᓇᕐᓄᑦ, ᐅᕝᕙᓘᓐᓃᑦ ᐊᑦᓯᕕᒻᒨᕈᔾᔭᐅᔪᓐᓇᖅᑐᑦ.
ᐊᐱᖅᑯᑏᑦ ᐊᒻᒪ ᑭᐅᔾᔪᑎᖏᑦ ᓱᓇᐃᑦ ᐱᖃᓯᐅᑎᔪᓐᓇᖅᐸᑦ ᐊᖏᔫᑎᓂᒃ ᓴᓂᕐᓂᒃ ᓄᐊᑦᓯᓕᖅᐸᑕ? ᐊᖏᔫᑏᑦ ᓴᓃᑦ ᐅᖁᒪᐃᓐᓂᖃᖅᑐᑦ ᐅᖓᑖᓂ 50 ᐸᐅᓐᔅ, ᐅᕝᕙᓘᓐᓃᑦ ᐊᖏᓗᐊᕈᑎᒃ ᕿᓐᓂᖅᑕᓄᑦ ᕿᓪᓚᔪᑭᐊᓄᑦ ᓴᓂᒃᑯᕕᐸᐅᔭᓄᑦ, ᐊᒻᒪᑦᑕᐅᖅ ᒪᕐᕉᓐᓂᒃ ᐃᓪᓗᓂ ᓱᓇᒃᑯᑖᒥᓃᓐᓂᒃ. ᕿᓱᐃᑦ ᐊᖏᔫᑎᓄᒃ ᓴᓂᕐᓄᑦ ᐃᓚᒋᔭᐅᖕᖏᓚᑦ? ᓴᕕᕋᔭᐃᑦ, ᐅᐊᔭᒨᖅᑐᑦ, ᕿᔪᐃᑦ ᐊᒻᒪ ᐊᑦᓴᓗᐊᒥᓃᑦ ᐃᓚᒋᔭᐅᓛᖏᑦᑐᑦ ᓴᓂᐸᐅᔭᓄᑦ.
ᑮᓇᐅᔭᓕᐅᖅᑎᓄᑦ ᓴᓃᑦ ᐃᓚᒌᔭᐅᓛᖕᖏᒻᒥᔪᑦ, ᓇᔪᒐᖃᖅᑎᓄᐃᓐᓇᖅ ᐱᔨᑦᙳᕋᕈᑎᐅᒻᒪᑦ. ᑭᓪᓕᖃᖅᐸ? ᐄᖕ. ᐊᑐᓂ ᐃᓪᓗᓂᑦ ᐃᒋᑦᓯᒍᓐᓇᖅᑐᑦ ᐱᖓᓱᓂᒃ ᐊᖏᔫᑎᓂᒃ ᓴᓂᕐᓂᒃ, ᐊᒻᒪ ᒪᕐᕉᓐᓂᒃ ᐃᓪᓗᓂ ᓱᓇᒃᑯᑖᒥᓃᓐᓂᒃ. ᖃᓄᕐᓕ ᐱᖓᓲᓗᐊᓂᒃ ᓴᓂᐸᐅᔭᖁᑎᖃᕈᒪ? ᓄᓇᓕᕐᓂᒥᐅᑕᐃᑦ ᐃᒻᒥᓂᒃ ᐃᑉᐱᒍᓱᒋᐊᓖᑦ ᐊᓯᖏᓐᓂᒃ ᓴᓂᖁᑎᖃᕈᑎᒃ ᐊᑦᓯᕕᒻᒨᕆᐊᓕᓐᓂᒃ. ᖃᖓ ᐊᓂᐊᒋᐊᖃᓛᕋᒃᑭᑦ ᓴᓃᑦ ᓄᐊᑕᐅᓛᖅᑐᑦ? ᓈᑦᓯᐅᖑᔭᒥ ᔪᓂ 24, ᓴᓃᑦ ᓴᓂᐊᓅᕆᐊᖃᓛᖅᑐᑦ ᓴᓂᒃᑯᕕᑦᓯ. ᐳᐃᒍᑦᑕᐃᓕᒋᑦᓯ ᐃᓚᓕᐅᑎᓯᒪᒋᐊᖃᔾᔮᖏᒻᒪᑕ ᓴᓂᐊᓃᒋᐊᖃᔾᔮᖏᒻᒪᑕ ᐃᒋᑕᐅᖁᖕᖏᑕᓯ ᓱᓇᑐᐃᓐᓇᐃᑦ, ᓲᕐᓗ ᐸᐃᓯᑯᐃᑦ ᐅᕝᕙᓘᓐᓃᑦ ᐱᖕᖑᐊᑦ ᓴᓂᒃᑯᕕᐅᑉ ᓴᓂᐊᓂᒃ ᓅᒋᐊᓖᑦ, ᐃᒋᑕᐅᖁᓇᒋᑦ ᐱᔮᖅᑯᑕᐅᖏᑦᑐᒥᑦ. ᖃᓄᖅ ᓴᓃᑦ ᐋᖅᑭᓱᕐᓯᒪᒋᐊᖃᖅᐸᑦ? ᓴᓃᑦ ᐃᓛᒃᑰᕐᓯᒪᒋᐊᓖᑦ ᐊᒻᒪ ᐊᔾᔨᒌᑦ ᓴᓃᑦ ᓄᐊᓯᒪᓗᑎᒃ ᑕᕝᕙᓂᑦᓴᐃᓐᓇᖅ, ᐊᒻᒪ ᖁᓕᕇᖏᓪᓗᑎᒃ. ᓴᓂᑐᐃᓐᓇᐃᑦ ᐃᓚᓕᐅᑎᓯᒪᒋᐊᖃᖕᖏᑦᑐᑦ, ᐃᓚᓕᐅᑎᓯᒪᖕᖏᓪᓗᑎᒃ ᐊᖏᔫᑎᓄᑦ ᓴᓂᕐᓄᑦ. ᐊᒻᒪᑦᑕᐅᖅ, ᐃᑉᐱᒋᑦᓯᐊᕐᓗᒋᑦ ᐱᖓᓲᒋᐊᖃᕐᓂᖏᑦ ᓴᓂᐸᐅᔭᐃᑦ. ᖃᓄᐃᑕᐅᓂᐊᕐᒪᑕ ᓄᐊᑕᐅᔪᑦ ᓴᓃᑦ? ᓄᐊᑕᐅᓂᐊᖅᑐᑦ ᐊᖏᔫᑏᑦ ᓴᓃᑦ ᐊᑦᓯᕕᒻᒨᖅᑕᐅᖃᑦᑕᖅᑐᑦ. ᓄᓇᓕᕐᓂᒥᐅᑕᐃᑦ ᐃᑲᔪᕈᓐᓇᖅᑐᑦ ᓴᓂᕐᓂᒃ ᐊᖏᔪᐊᓗᓐᓂᒃ ᐊᑦᓯᕕᒻᒨᕆᖁᔨᖕᖏᒃᑯᑎᒃ, ᓂᐅᕕᐊᖑᔪᓐᓇᖅᑐᑦ ᓂᐅᕕᐊᑦᓴᐅᑎᑉᐸᓪᓗᒋᑦ, ᑕᐅᕐᓰᕈᑎᒋᕙᓪᓗᒋᑦ ᓱᓇᑐᐃᓐᓇᕐᓂᒃ, ᐅᕝᕙᓘᓐᓃᑦ ᑐᓂᑐᐃᓐᓇᐸᓪᓗᒋᑦ ᖃᓄᐃᖏᑐᐊᖅᐸᑕ ᐃᒋᓐᓂᐊᖅᑐᒥᓂᐅᒐᓗᐊᑦ. -30-