ᓄᑖᖅ ᑎᒥᐅᔪᒥᑦ ᐊᐅᓚᑦᓯᔨᒻᒪᕆᐅᓂᕐᒧᑦ ᑎᒃᑯᐊᖅᑕᐅᔪᖅ

ᓄᑖᖅ ᑎᒥᐅᔪᒥᑦ ᐊᐅᓚᑦᓯᔨᒻᒪᕆᐅᓂᕐᒧᑦ ᑎᒃᑯᐊᖅᑕᐅᔪᖅ
ᒫᕐᓯ 12-ᒥ ᑲᑎᒪᔩᑦ ᑲᑎᒪᑎᓪᓗᒋᑦ, ᑲᑎᒪᔩᑦ ᑲᔪᓯᑎᑦᓯᓚᐅᖅᑐᑦ ᓯᕗᓪᓕᖅᐹᒥ ᐊᒻᒪ ᑐᓪᓕᐊᓂ ᐅᖃᓕᒫᕐᓂᐅᔪᒥᑦ ᒪᓕᒐᕋᓛᑦᓴᒥᑦ 875 ᑎᒃᑯᐊᕐᓯᔾᔪᑎᐅᔪᒥᑦ ᒥᔅ ᐊᐃᒥ ᐃᐅᓪᒎᕐᔅᒪᒥᑦ ᑎᒥᐅᔪᒥᑦ ᐊᐅᓚᑦᓯᔨᒻᒪᕆᐅᓂᕐᒧᑦ ᐊᕐᕌᒍᓄᑦ ᑕᓪᓕᒪᓄᑦ. ᑎᒃᑯᐊᖅᑕᐅᓂᖓ ᐊᑐᓕᕆᐊᓛᖅᑐᖅ ᑭᖑᓪᓕᕐᒥ ᑲᑎᒪᔩᑦ ᑲᑎᒪᓕᕐᒥᑉᐸᑕ, ᐱᖓᔪᐊᓂ ᐊᒻᒪ ᑭᖑᓪᓕᖅᐹᖓᓂ ᐅᖃᓕᒫᖅᑕᐅᓚᐅᖅᑎᓪᓗᒍ. ᒥᔅ ᐃᐅᓪᒎᕐᔅᒪ ᑎᒥᐅᔪᒥᑦ ᐊᐅᓚᑦᓯᔨᒻᒪᕆᐅᑲᐃᓐᓇᕐᓯᒪᔪᖅ ᕕᕝᕗᐊᕆᒥᓂᒃ 2018. ᒥᔅ ᐃᐅᓪᒎᕐᔅᒪ ᓯᑎᒃᑯᓐᓂ ᐃᖅᑲᓇᐃᔭᖅᑎᐅᓯᒪᓕᖅᑐᖅ 1999-ᒥᓂᒃ, ᐊᒻᒪ ᐊᕐᕌᒍᓂᑦ ᐊᕙᑎᓂᑦ (20), ᐊᔾᔨᒌᖏᑦᑐᓂᑦ ᐱᒋᐊᕐᓯᒪᓪᓗᓂ ᐳᐃᔾᔪᕋᕐᕕᒻᒥ ᖃᐅᔨᓴᖅᑎᐅᓂᕐᒥᑦ, ᒪᒃᑯᑦᑐᑦ ᐱᓕᕆᐊᑦᓴᖏᓐᓂᑦ ᑐᑭᒧᐊᑦᑎᑦᓯᔨᐅᓗᓂ, ᐃᑲᔪᖅᑎᐅᓗᓂ ᐊᖏᔪᖅᑳᖓᓄᑦ ᐱᖕᖑᐊᖅᑐᓕᕆᔨᒃᑯᑦ. ᒥᔅ ᐃᐅᓪᒎᕐᔅᒪ ᓇᓗᓇᐃᕐᓯᓯᒪᑦᓯᐊᖅᑐᖅ ᓯᕗᓕᖅᑎᐅᔪᓐᓇᓂᕐᒥᓂᒃ, ᐊᐅᓚᑦᓯᔨᐅᓂᒃᑯᑦ ᐱᖕᖑᐊᖅᑐᓕᕆᔨᓂᑦ ᐱᖃᓯᐅᑎᓪᓗᒋᑦ ᐊᒥᓱᓂ ᐱᓕᕆᐊᑦᓴᓕᕆᔪᓄᑦ ᐱᓕᕆᖃᑕᐅᕙᑦᑐᓂ ᐳᐃᔾᔪᕋᕐᕕᖃᕐᕕᒻᒥᑦ, ᓴᓇᒋᐊᖅᑕᐅᑎᓪᓗᒋᑦ ᐊᓐᓂᑭᑦᑐᓛᓕᓐᓄᑦ ᓯᐊᕐᕆᔮᕐᕖᑦ, ᓄᑖᓂᑦ ᓯᓚᒥ ᐱᖕᖑᐊᕐᕕᓕᐅᖅᑐᓂᑦ, ᐃᓪᓘᑉ ᐃᓗᐊᓂ ᐱᖕᖑᐊᕐᕕᓕᐅᖅᑐᓂᑦ ᐅᑭᐅᒃᑯᑦ ᐱᖕᖑᐊᕐᕕᐊᓗᒻᒥ ᐊᒻᒪᑦᑕᐅᖅ ᓄᑖᓂᑦ ᐱᓕᕆᐊᑦᓴᓕᐅᖃᑕᐅᓯᒪᓪᓗᓂ. ᒥᔅ ᐃᐅᓪᒎᕐᔅᒪ ᐱᑎᑕᐅᓯᒪᒻᒥᔪᖅ ᐱᔭᕇᕈᑎᒥᑦ ᐃᓕᓐᓂᐊᕈᑎᒍᑦ ᐊᖏᔪᖅᑳᖑᓂᒃᑯᑦ ᐊᐅᓚᑦᓯᔨᐅᓂᕐᒥᑦ ᕈᐊᐃᐅᓪ ᕉᑦ1ᔅ ᓯᓚᑦᑐᓴᕐᕕᔾᔪᐊᕐᕕᒻᒥᑦ. ᐊᕐᕌᓂᐅᓚᐅᖅᑐᖅ, ᒥᔅ ᐃᐅᓪᒎᕐᔅᒪ, ᑎᒥᐅᔪᒥᑦ ᐊᐅᓚᑦᓯᔨᒻᒪᕆᐅᑲᐃᓐᓇᖅᑐᓂ ᐱᓕᕆᒋᐊᕐᓯᒪᔪᖅ ᐊᒻᒪ ᐱᒋᐊᖅᑎᑦᓯᓯᒪᓪᓗᓂ ᓯᑎᒃᑯᑦ ᐃᖅᑲᓇᐃᔭᖅᑎᖏᓐᓂᑦ ᐅᐃᒪᔮᕈᓐᓃᖅᑎᓯᒪᓪᓗᒋᑦ, ᐱᐅᓯᑎᒋᐊᕐᓯᓯᒪᓗᓂᓗ ᐱᓕᕆᖃᑎᒌᑉᐸᓐᓂᖏᓐᓂᑦ ᖃᓄᖅ ᓯᑎᒃᑯᑦ ᖃᑦᑎᕆᔨᒃᑯᖏᑕ, ᒫᓐᓇᒃᑯᑦ ᐱᓕᕆᔾᔪᑎᐅᕙᓕᖅᑐᓂᒃ ᑮᓇᐅᔭᓕᕆᔾᔪᑎᒍᑦ ᐱᒋᐊᖅᑎᑦᓯᓯᒪᔪᖅ, ᐱᓕᕆᖃᑎᖃᕐᓯᒪᔪᒻᒪᕆᒃ ᓴᓇᔪᓕᕆᔨᒃᑯᓐᓂᑦ ᖃᐅᔨᓴᖅᐸᓂᒃᑯᑦ ᐊᒻᒪ ᐱᐅᓯᑎᑦᓯᒋᐊᕐᓂᒃᑯᑦ ᐱᔨᑦᓯᕋᐅᑎᒻᒪᕆᐅᔪᓂᑦ ᓲᕐᓗ ᓴᓂᑦᑕᓂᕐᒥᑦ ᐊᒻᒪ ᐊᑦᓯᕕᒻᒥ ᐊᐅᓚᑦᓯᔾᔪᑎᓂᑦ. ᐊᕐᕌᓂᐅᓚᐅᖅᑐᖅ, ᓯᑎᒃᑯᑦ ᐱᓕᕆᐊᖃᖅᐸᓚᐅᖅᑐᑦ ᑐᐊᕕᕐᓇᖅᑐᓕᕆᔪᓂᑦ ᐊᑕᐅᓯᐅᖏᒻᒪᕆᑦᑐᓂᑦ, ᐃᐅᓪᒎᕐᔅᒪᐅᑉ ᓯᕗᓕᖅᑎᑦᓯᐊᕙᐅᔾᔪᑎᒋᕙᑦᑐᓂᒋᑦ ᐱᖃᓯᐅᑎᓪᓗᒍ ᐃᒥᖅᑕᕐᕕᓕᕆᔪᓂᑦ ᑲᑎᒪᔨᕋᓛᓂᑦ ᓯᑎᒃᑯᓐᓂᑦ ᐊᖏᖅᑕᐅᑎᑦᓯᔪᓐᓇᓚᐅᖅᑐᓂᑦ ᐊᓯᐊᓂᑦ ᐃᒥᖅᑕᕐᕕᐅᑉ ᐃᒥᖅᑕᕈᓐᓇᐅᑎᑦᓴᒥᑦ ᖃᓂᑦᑐᒥᑦ ᑰᒻᒥᑦ. ᑐᑭᒧᐊᑦᑎᑕᐅᔪᓂᑦ ᓄᓇᓕᓐᓂ ᐱᓕᕆᔨᑦᓴᐅᒐᔭᖅᑐᓂᑦ ᑐᐊᕕᕐᓇᖅᑐᑕᖃᓕᖅᐸᑦ ᑲᑎᒪᔨᕋᓛᓂᑦ ᐱᓕᕆᖃᑎᖃᖅᑎᑦᓯᓚᐅᖅᑐᖅ ᑐᐊᕕᕐᓇᖅᑐᓕᕆᔨᖏᓐᓂᑦ ᓯᑎᒃᑯᑦ ᐊᒻᒪ ᑲᑐᔾᔨᖃᑎᒌᑦᑐᓂᑦ ᓂᐅᕕᕐᕕᒃ ᓄᐊᖦᒫᑦ ᐃᑭᑦᑎᓪᓗᒍ, ᐊᒻᒪ ᒫᓐᓇᕈᓘᓚᐅᖅᑐᖅ ᐱᓕᕆᖃᑕᐅᕙᑦᑐᓂ ᐊᒥᓱᐊᓗᓐᓄᑦ ᐃᖃᓗᓐᓂ ᐃᒥᓕᕆᓂᒃᑯᑦ ᒪᑭᒪᓪᔪᑎᓂᑦ ᐱᔾᔪᑎᐅᔪᓂᑦ.
ᒥᔅ ᐃᐅᓪᒎᕐᔅᒪ ᐅᖃᐅᓯᖃᓚᐅᖅᑐᖅ ᓯᕗᓪᓕᐅᔾᔨᔪᒪᓂᐊᕋᒥᒋᑦ ᐃᑲᔪᖅᐸᓪᓗᓂᒋᑦ ᓯᑎᒃᑯᑦ ᐱᓇᓱᐊᖅᑎᓪᓗᒋᑦ ᑮᓇᐅᔭᓂᑦ ᐱᓕᕆᔾᔪᑎᑦᓴᓂᑦ ᐃᒥᓕᕆᔾᔪᑎᑦᓴᓂᑦ, ᐱᔾᔪᑎᒋᓪᓗᒍ ᐊᓯᐊᓂᑦ ᐃᒥᖃᕐᕕᐅᔪᓐᓇᕋᔭᖅᑐᒥᑦ ᐊᒻᒪ ᓴᓇᔭᐅᓗᑎᒃ ᐊᒻᒪ ᑭᖑᕝᕕᑎᖅᑕᐅᕙᓪᓗᑎᒃ ᓱᓪᓗᓖᑦ ᒪᓕᓪᓗᒋᑦ ᓄᓇᓕᓐᓄᑦ ᐃᒥᓕᕆᔾᔪᑎᓄᑦ ᐊᑐᖅᑕᐅᒋᐊᓖᑦ ᐊᒻᒪ ᐱᓕᕆᖃᑎᒋᕙᓪᓗᒋᑦ ᑲᑐᔾᔨᖃᑎᒌᓐᓂᒃᑯᑦ ᓯᑎᒃᑯᑦ ᐃᖅᑲᓇᐃᔭᖅᑎᖁᑎᖏᓐᓂᑦ ᐱᐅᓯᑎᑦᓯᒋᐊᕋᓱᓐᓂᒃᑯᑦ ᓯᑎᒃᑯᑦ ᐱᔨᑦᓯᕋᐅᑎᖏᓐᓂᑦ, ᓄᓇᓕᕐᓂᒥᐅᑕᐃᑦ ᐱᐅᔪᓂᑦ ᐱᔨᑦᓯᕋᐅᑕᐅᖃᑦᑕᓂᐊᕐᒪᑕ ᓇᐅᒃᑯᑐᐃᓐᓇᑦᓯᐊᖅ. ᒪᐃᔭ ᕆᐊᑦᕘᕐᓐ ᐅᖃᖅᑐᖅ “ᖁᕕᐊᓇᖅᑐᒻᒪᕆᐅᕗᖅ ᒥᔅ ᐃᐅᓪᒎᕐᔅᒪ ᐊᖏᖕᖑᐊᑕᕐᓯᓇᕐᒪᑦ ᐃᖅᑲᓇᐃᔮᖃᕈᒪᓪᓗᓂ ᓯᑎᒃᑯᑦ ᑎᒥᖁᑎᖏᓐᓄᑦ ᐊᐅᓚᑦᓯᔨᒻᒪᕆᐅᓂᕐᒥᑦ, ᖃᐅᔨᒪᑦᓯᐊᕐᒪᒍ ᓯᑎᒃᑯᑦ ᐊᒻᒪ ᓄᓇᓕᑦᑕ ᐃᓗᐊ. ᐃᖅᑲᓇᐃᔮᒨᖅᑐᖅ ᖃᐅᔨᒪᑦᓯᐊᖅᑕᒥᓄᑦ, ᐃᓕᑕᕆᔪᓐᓇᖅᑕᒥᓄᑦ, ᐱᓕᒻᒪᓴᕐᓯᒪᔭᒥᓄᑦ, ᖁᕕᐊᒋᓪᓚᕆᑦᑕᒥᓄᑦ ᐊᒻᒪ ᐱᓕᕆᔪᒪᓪᓚᕆᑦᑕᒥᓄᑦ. ᓇᓗᖕᖏᓯᐊᖅᑐᖓ ᒥᔅ ᐃᐅᓪᒎᕐᔅᒪ ᐱᓕᕆᕙᓐᓂᐊᕐᓂᖓᓄᑦ ᑕᖃᓱᐃᑦᑑᕙᓪᓗᓂ ᐱᔾᔪᑎᓕᓐᓂᑦ ᐃᑉᐱᓇᓪᓚᕆᑦᑐᓂᑦ ᓄᓇᓕᕐᒥᐅᑕᓄᑦ.” ᒪᐃᔭᐅᑉ ᑐᓪᓕᐊ ᐅᖃᕐᒥᔪᖅ “ᖁᕕᐊᒋᓯᒪᓪᓚᕆᑦᑕᕋ ᓇᐅᒃᑯᑐᐃᓐᓇᖅ ᒥᔅ ᐃᐅᓪᒎᕐᔅᒪᐅᑉ ᖃᓄᖅ ᐱᓕᕆᔾᔪᓯᒋᓯᒪᔭᖓᓂᑦ ᓯᑎᒃᑯᓐᓂ. ᓄᓇᓕᕗᑦ ᐱᕈᖅᐸᓪᓕᐊᑐᐃᓐᓇᕐᒪᑦ ᐊᒻᒪ ᑕᒪᓐᓇ ᐱᔾᔪᑎᒋᓪᓗᒍ, ᐱᑕᖃᖅᐸᓕᖅᑐᖅ ᐱᕕᑦᓴᐅᔪᓐᓇᖅᑐᓂᑦ ᓇᐅᒃᑯᑐᐃᓐᓇᑦᓯᐊᖅ ᐊᒻᒪ ᐊᑦᓱᕉᑎᑦᓴᐅᔪᓐᓇᖅᑐᓂᑦ.”