ᑲᓇᑕᐅᑉ ᐸᓖᓯᖏᑦ – 
ᖃᑦᑎᕆᔨᒃᑯᑦ/ᓄᓇᒃᑰᔫᖅ ᑐᐊᕕᖅᑐᓕᕆᔾᔪᑎ – 
ᐱᕐᓯᑎᓪᓗᒍ ᑐᑭᓯᒋᐊᕐᕕᒃ – 
ᑭᒃᑯᑐᐃᓐᓇᕐᓄᑦ ᑐᓴᒐᒃᓴᖅ
ᓄᑖᖅ ᖃᐅᒻᒪᓪᓛᔪᖅ ᐊᑐᖅᑕᐅᔪᖅ ᐱᓱᒡᕕᖕᒥ ᓂᐊᖅᑯᖖᒎᓯᐊᕆᐊᖅ ᐊᖅᑯᑎᖕᒐᓂ
ᓰᑎᐱᕆ 25, 2024 – ᐃᖃᓗᐃᑦ, ᓄᓇᕗᑦ
ᓄᓇᓕᐸᐅᔭᒃᑯᑦ ᐃᖃᓗᓐᓂ ᖁᕕᐊᒋᑦᓯᐊᖅᑐᒍ ᑐᓴᖅᑎᑦᑎᔪᒪᔪᑦ ᓄᑖᒥᒃ ᖃᐅᒻᒪᓪᓛᔪᒥᒃ ᐋᖅᑭᑦᑕᐅᓂᐅᓴᔪᒥᒃ ᐱᓱᒡᕕᖕᒥ ᓂᐊᖁᖖᒎᓯᐊᕆᐊᖅ ᐊᑐᕆᐊᒥ, ᐋᓐᓂᐊᕕᐅᑉ ᓴᓂᐊᓂ ᐊᑐᕆᐊᕐᒥ ᐊᑦᑐᐊᔪᒧᑦ ᑕᒻᒫᑕᕐᕕᒃ ᑐᔪᕐᒥᕕᒻᒧᑦ. ᑖᓐᓇ ᐱᒻᒪᕆᐅᔪᖅ ᐱᓕᕆᔾᔪᑎᓄᑦ ᓴᓇᒋᐊᕐᓂᐅᔪᖅ ᑐᕌᖓᑎᑕᐅᔪᖅ ᐱᐅᓯᑎᒋᐊᖁᔭᐅᓗᑎᒃ ᐱᓱᑉᐸᑦᑐᑦ ᐊᑦᑕᓇᖅᑐᒦᔾᔭᐃᒃᑯᑎᒋᕙᑦᑕᖏᓐᓄᑦ ᑕᒫᓂ ᐊᑐᖅᑕᐅᔪᒻᒪᕆᐅᔪᒥ ᐊᑐᕆᐊᒃᑯᑦ.
ᖃᓄᑎᒋ ᐱᒻᒪᕆᐅᓂᖓ ᖃᐅᒻᒪᓪᓛᔫᑉ ᐱᓕᕆᔾᔪᑎᐅᑉ
ᓄᑖᖅ ᖃᐅᒻᒪᓪᓛᔪᖅ ᐱᓕᕆᔾᔪᑎᐅᓂᐊᖅᑐᖅ ᓴᓇᔭᐅᓯᒪᔪᖅ ᐱᐅᓯᑎᒋᐊᖁᔭᐅᓗᑎᒃ ᑕᑯᑦᓴᐅᓂᕆᕙᑦᑕᖏᑦ ᑖᓂᖅᑐᑲᓐᓂᖁᔭᐅᓗᑎᒃ ᐊᒻᒪ ᐊᑦᑕᕐᓇᖅᔭᐃᖅᓯᒪᖁᔭᐅᓪᓗᑎᒃ ᐱᓱᑉᐸᑦᑐᑦ ᐊᒻᒪ ᐃᖕᒋᕐᕋᕙᒃᑐᑦ ᐱᓱᒡᕕᒃᑯᑦ. ᐱᑕᖃᖅᑎᑦᓯᓗᓂ ᑕᑯᑦᓴᐅᓯᐊᖅᑐᒥᒃ, ᐊᐅᓚᔪᒥᒃ ᖃᐅᔨᒃᑲᕐᓵᕆᔾᔪᑎᒥᒃ ᐱᓱᑦᑐᒥᒃ ᐃᑳᖅᑐᖃᕐᓂᐅᓴᑎᓪᓗᒍ ᐊᑐᕆᐊᒃᑯᑦ, ᐅᓇ ᐱᓕᕆᔾᔪᑎᐅᓂᐊᖅᑐᖅ ᐃᑲᔫᑎᐅᔪᓐᓇᓂᐊᖅᑐᖅ ᐱᕐᕈᓗᐊᕿᔾᔭᐃᒃᑯᑎᒍᑦ ᐊᒻᒪ ᐊᑦᑕᓇᔾᔭᐃᕐᓯᒪᑎᑦᓯᒍᓐᓇᓂᐊᖅᑐᓂ ᑭᒃᑯᓕᒫᓂᒃ.
ᖃᓄᖅ ᖃᐅᒻᒪᓪᓛᔪᖅ ᐱᓕᕆᔾᔪᑎᐅᓂᐊᖅᑐᖅ ᐱᓕᕆᐊᔾᔪᑎᐅᓂᐊᕐᒪᖔᖅ
• ᐱᓱᑦᑐᒧᑦ ᖃᐅᒻᒪᖅᑎᑕᐅᔪᓐᓇᓂᐊᖅᑐᖅ: ᐱᓱᑦᑐᑦ ᖃᐅᒻᒪᓪᓛᑎᑦᓯᒍᓐᓇᓂᐊᖅᑐᑦ ᓇᕿᑦᑕᒐᕐᒥᒃ ᓇᕿᑦᓯᒐᐃᒍᑎᒃ ᐃᑳᕆᐊᕐᕕᖓᓃᑦᑐᒥᒃ.
• ᓄᓇᒃᑰᔫᖅᑐᑦ ᖃᐅᔨᒃᑲᕐᓵᖅᑕᐅᕙᓪᓗᑎᒃ: ᐃᑭᑕᐅᓐᓂᕈᓂ, ᖃᐅᒻᒪᓪᓛᔪᑦ ᓄᓇᒃᑰᔫᖅᑐᓂᒃ ᓄᖅᑲᑎᑦᓯᕙᓐᓂᐊᖅᑐᖅ, ᐱᓱᑦᑐᑦ ᐃᑳᕈᓐᓇᕐᓯᑎᑕᐅᕙᓪᓗᑎᒃ ᐊᑦᑕᓇᖏᑦᑐᒃᑯᑦ.
• ᐊᑦᑕᓇᔾᔭᐃᕐᓯᒪᓂᐅᔪᖅ ᐱᐅᓯᑎᒋᐊᖅᑕᐅᓂᐊᖅᑐᖅ: ᖃᐅᓯᒪᓪᓛᔪᓄᑦ ᑖᓂᖅᑐᓂᕐᓴᐅᓕᖅᐸᓪᓗᑎᒃ ᐱᓂᐊᖅᑐᑦ, ᐱᓗᐊᖅᑐᒥ ᓯᓚ ᑖᕐᓯᕙᓪᓕᐊᓕᖅᑎᓪᓗᒍ, ᐱᓱᑦᑐᑦ ᑕᑯᑦᓴᐅᓯᐊᖅᐸᓕᕐᓗᑎᒃ ᓄᓇᒃᑰᔫᖅᑐᓄᑦ ᐃᑳᖅᐸᓪᓕᐊᑎᓪᓗᒋᑦ.
ᐊᑐᐊᒐᐃᑦ ᐊᑦᑕᓇᔾᔭᐃᕐᓯᒪᖁᓪᓗᒋᑦ ᐊᑐᖅᑕᐅᒋᐊᓖᑦ
ᐱᓱᑦᑐᓄᑦ:
− ᓇᕿᑦᑕᐅᑎᖓ ᓇᕿᓪᓗᒍ: ᖃᐅᒻᒪᓪᓛᔪᑦ ᖃᐅᒻᒪᓪᓛᓕᕈᓐᓇᖅᑐᑦ ᓇᕿᓪᓗᒍ ᓇᕿᒋᐊᓕᒃ ᐃᑳᕆᐊᕐᕕᖓᓃᑦᑐᖅ.
− ᐅᑕᖅᑭᕙᓪᓗᒋᑦ ᓄᓇᒃᑰᔫᑦ ᓄᖅᑲᕐᓯᐊᕆᓪᓗᒋᑦ: ᓇᓗᓇᐃᕐᓯᒪᓇᓱᑉᐸᓪᓗᓯ ᓄᓇᒃᑰᔫᑦ ᓄᖅᑲᖓᑦᓯᐊᓕᕋᓗᐊᕐᒪᖔᑕ ᐃᑳᕆᐊᓚᐅᖏᓂᕐᓂ.
− ᐊᑐᖅᑕᐅᕙᓪᓗᓂ ᓇᓗᓇᐃᒃᑯᓯᕐᓯᒪᔪᖅ ᐊᖅᑯᑎ: ᐃᑳᖅᐸᓪᓗᓯ ᓇᓗᓇᐃᒃᑯᓯᕐᓯᒪᔪᖅ ᐃᑳᕐᕕᒃ ᐊᖅᑯᑎᒋᓗᒍ.
− ᐅᔾᔨᕈᓱᑦᓯᐊᐸᓪᓗᓯ: ᐅᔾᔨᕆᓇᓱᐊᖅᐸᓪᓗᒍ ᐊᕙᑎᓯ ᐊᒻᒪ ᓄᓇᒃᑰᔫᖅᑐᑦ ᑕᑯᓴᖅᐸᓪᓗᒋᑦ ᐃᔨᖏᓐᓄᑦ.
ᓄᓇᒃᑰᔫᖅᑐᓄᑦ:
− ᑕᑯᓐᓇᐸᓪᓗᒋᑦ ᖃᐅᒻᒪᓪᓛᔪᑦ ᖃᐅᒪᐃᑦ: ᓄᖅᑲᐸᓪᓗᓯ ᑕᑯᒍᑦᓯᐅᒃ ᖃᐅᒪᐃᑦ ᖃᐅᒻᒪᓪᓛᑎᓪᓗᒋᑦ.
− ᓄᖅᑲᕆᐊᖅᐸᓪᓗᓯ ᐱᓱᑦᑐᓂᒃ ᑕᑯᒍᑦᓯ: ᓄᖅᑲᐸᓪᓗᓯ ᐱᓱᑦᑐᑦ ᐃᑳᕋᓱᓐᓂᖏᓐᓂ ᐊᑦᑕᓇᖏᑐᒃᑯᑦ.
− ᐃᑉᐱᒍᓱᑦᓯᐊᖏᓐᓇᐸᓪᓗᓯ ᐊᕙᑎᑦᓯᓐᓂᒃ: ᐅᔾᔨᕈᓱᒋᐊᕐᓯᒪᕙᓪᓗᓯ ᐊᕙᑎᑦᓯᓐᓂᒃ, ᐱᓗᐊᖅᑐᒥ ᐱᓱᑦᑐᓄᑦ ᐃᑳᕐᕕᒃᑰᓕᕋᐃᒍᑦᓯ.
− ᓯᕗᓂᓐᓃᑦᑐᓂᒃ ᑕᑯᓐᓇᐃᓇᖅᐸᓪᓗᓯ: ᐊᑐᕆᐊᖅ ᑕᑯᓐᓇᐃᓇᖅᐸᓪᓗᒍ ᐊᒻᒪ ᐊᑐᑦᑕᐃᓕᒪᕙᓪᓗᓯ ᐅᖄᓚᐅᑎᕋᓛᕐᓂᒃ/ᖃᕋᑕᐅᔭᕋᓛᕐᓂᒃ ᐊᖁᑎᐅᒍᑦᓯ.
ᓄᓇᓕᐸᐅᔭᐃᑦ ᐃᖃᓗᐃᑦ ᐱᐅᓯᑎᑦᓯᒋᐊᖅᐸᓪᓕᐊᒍᒪᑐᐃᓐᓇᕐᒪᑕ ᐊᑦᑕᓇᔾᔭᐃᕐᓯᒪᐅᑎᑦᓴᓂᒃ ᐊᑐᕆᐊᒃᑰᐸᑦᑐᓂᒃ ᐊᒻᒪ ᖁᔭᓕᕙᑦᑐᑎᒃ ᑲᑐᔾᔨᖃᑕᐅᑦᓯᐊᖅᑐᑎᒃ ᐃᑲᔪᖅᐸᓐᓂᖏᓐᓄᑦ ᓄᓇᓕᕐᒥᐅᑕᓕᒫᑦ ᓄᓇᓕᒋᔭᕗᑦ ᐊᑦᑕᓇᖅᑐᒦᖁᓇᒍ. ᑲᑐᔾᔨᕙᓪᓗᑕ, ᓇᓗᓇᐃᕐᓯᒪᒍᓐᓇᓂᐊᖅᑕᕗᑦ ᓄᑖᖅ ᖃᐅᒻᒪᓪᓚᔪᖅ ᐱᓕᕆᔾᔪᑎᐅᓂᐊᖅᑐᖅ ᐊᑑᑎᖃᑦᓯᐊᖁᓪᓗᒍ ᐊᑑᑎᒋᓇᓱᐊᖅᑕᖏᒍᑦ.
##
ᑐᑭᓯᒋᐊᒃᑲᓐᓂᕐᕕᑦᓴᖅ ᖃᐅᔨᒋᐊᕐᓗᒍ ᐅᓇ:
ᔭᕝ ᐴᕐᓐ
ᑐᓴᐅᒪᐅᑎᓕᕆᓂᕐᒥᑦ ᐊᒻᒪ ᐱᔨᑦᓯᕋᖅᑎᓂᒃ ᐊᐅᓚᑦᓯᔨ
ᓄᓇᓕᐸᐅᔭᐃᑦ ᐃᖃᓗᐃᑦ
867-979-5619 | g.byrne@iqaluit.ca
