ᑲᓇᑕᐅᑉ ᐸᓖᓯᖏᑦ – 
ᖃᑦᑎᕆᔨᒃᑯᑦ/ᓄᓇᒃᑰᔫᖅ ᑐᐊᕕᖅᑐᓕᕆᔾᔪᑎ – 
ᐱᕐᓯᑎᓪᓗᒍ ᑐᑭᓯᒋᐊᕐᕕᒃ – 
ᐱᕙᓪᓕᐊᔪᑦ
ᓇᒡᒋᔾᔭᐅ, ᕕᕝᕗᐊᕆ 29, 2016 – (ᐃᖃᓗᐃᑦ, ᓄᓇᕗᑦ) ᓄᓇᓕᐸᐅᔭᐃᑦ ᐃᖃᓗᐃᑦ ᖁᕕᐊᒋᓪᓗᒍ ᑐᓴᖅᑎᑦᓯᕗᑦ ᐱᑎᑕᐅᓛᕐᓂᕐᒥᓂᒃ $4 ᒥᓕᐊᓂᑦ ᓕᐳᕈ ᒐᕙᒪᒃᑯᓐᓂᒃ, ᑲᓇᑕᐅᑉ ᒐᕙᒪᒃᑯᖏᓐᓂᑦ ᐊᑐᖅᑐᑦᓴᓂᑦ ᐊᑭᑐᔪᓄᑦ ᐳᐃᔾᔪᕋᕐᕕᒻᒧᑦ. ᑐᓂᕐᕈᓯᐊᖑᔪᑦ ᐃᓱᒪᒋᔭᐅᔪᑦ ᐊᑐᖅᑕᐅᒐᔭᕆᐊᖏᓐᓂᑦ ᕿᑐᕐᖏᐅᕈᑎᓄᑦ ᐊᑭᓕᐅᑕᐅᒐᔭᕐᓗᑎᒃ ᐊᑭᓕᑦᓴᖅᑖᒃᑯᑦ, ᐊᐅᓚᑦᓯᔾᔪᑎᑦᓴᓄᑦ ᐊᒻᒪ ᒪᑭᒪᔾᔪᑎᑦᓴᓄᑦ ᐊᒥᓲᓂᕐᓴᐅᓕᓛᕐᓗᑎᒃ ᒪᑐᐃᖓᓕᖅᐸᑦ ᐳᐃᔾᔪᕋᕐᕕᒃ. “ᑐᓂᕐᕈᓯᐊᖑᔪᑦ ᖁᔭᒋᔭᐅᑦᓯᐊᖅᑐᑦ ᐊᒻᒪ ᐃᑲᔪᖅᑐᒻᒪᕆᐅᓂᐊᓕᖅᑐᑎᒃ, ᐱᓗᐊᖅᑐᒥ ᓄᓇᓕᐸᐅᔭᒃᑯᑦ ᑮᓇᐅᔭᓕᕆᔾᔪᑎᖏᒍᑦ ᓇᓕᒧᓯᒪᐃᓐᓇᕋᓱᓕᖅᑎᓪᓗᒋᑦ ᑮᓇᐅᔭᓕᕆᔾᔪᑎᖏᒍᑦ” ᐅᖃᖅᑐᖅ ᒧᕼᐋᒧᑦ ᕼᐊᓵᓐ,ᓄᓇᓕᐸᐅᔭᒃᑯᑦ ᑎᒥᖁᑎᖏᑕ ᐊᖏᔪᖅᑳᒻᒪᕆᖓᑦ.
“ᑕᒪᓐᓇ ᑐᓴᕈᒥᓇᖅᑐᒻᒪᕆᐅᔪᖅ ᓄᓇᓕᐸᐅᔭᒃᑯᓐᓄᑦ ᐊᒻᒪ ᓄᓇᓕᓐᓄᑦ. ᐳᐃᔾᔪᕋᕐᕕᒃ ᐃᖃᓗᓐᓂ ᑭᒃᑯᑐᐃᓐᓇᑦᓯᐊᓄᑦ ᐅᐸᑦᑕᐅᔪᓐᓇᓛᕐᒪᑦ, ᖁᕕᐊᓱᒋᐊᖅᑐᖅᑐᓄᑦ, ᐃᖃᐃᓕᓴᕆᐊᖅᑐᖅᑐᓄᑦ ᐅᕝᕙᓘᓐᓃᑦ ᑎᒥᒃᑯᑦ ᓗᑦᑖᑎᒍᑦ ᐃᖃᐃᓕᓴᕐᕕᐅᒋᐊᖅᑐᐸᓪᓗᓂ. ᐊᒥᓱᐃᑦ ᓄᓇᓕᓐᓂᒥᐅᑕᐃᑦ ᒪᑐᐃᖁᔨᔪᒻᒪᕆᐅᓕᖅᑐᑦ ᐳᐃᔾᔪᕋᕐᕕᒻᒥᑦ” ᐅᖃᖅᑐᖅ ᒪᐃᔭ ᕆᐊᑦᕘᕐᓐ.
ᒪᐃᔭᐅᑉ ᑐᓪᓕᐊ ᕉᒪᐃᓐ ᓯᑏᕙᓐᓴᓐ, ᐃᑦᓯᕙᐅᑕᐅᓕᖅᑐᖅ ᐱᖕᖑᐊᖅᑐᓕᕆᔨᒃᑯᑦ ᑲᑎᒪᔨᕋᓛᖏᓐᓄᑦ ᐊᕐᕌᒍᒐᓴᓂᑦ, ᓄᓇᓕᓐᓂᒥᐅᑕᓂᑦ ᖃᐅᔨᒋᐊᖅᑳᕐᓂᐅᓚᐅᖅᑐᓂᑦ ᑲᑎᒪᔨᓄᑦ ᑲᔪᓯᑎᑕᐅᒍᑖᓄᑦ ᑮᓇᐅᔭᖅᑖᕋᓱᓐᓂᒧᓪᓗ ᐳᐃᔾᔪᕋᕐᕕᓕᐅᕈᑎᑦᓴᓂᑦ ᐅᖃᓚᐅᖅᑐᖅ “ᓄᓇᓕᐸᐅᔭᒃᑯᑦ ᑐᓴᓚᐅᕐᒪᑕ ᓄᓇᓕᓐᓂᒥᐅᑕᓂᑦ ᐊᒻᒪ ᐳᐃᔾᔪᕋᕐᕕᖃᓕᖅᐸᑕ ᑭᒃᑯᓕᒫᑦᓯᐊᑦ ᐃᓱᒪᕐᓲᑎᖃᓛᓕᕐᒥᔪᑦ ᐊᑐᕈᒪᔭᒥᓂᒃ ᐊᑐᐃᓐᓇᐅᓛᖅᑐᓂᑦ ᑎᒥᒧᑦ ᐱᐅᔪᓂᑦ ᖃᓄᐃᓕᐅᕈᑎᑦᓴᕈᓘᔭᕐᓂᑦ ᐃᑲᔫᑎᑦᓴᓂᑦ ᑎᒥᒃᑯᑦ ᐃᓗᓯᑦᓯᐊᕆᐊᖃᕐᓂᕐᒧᑦ ᐊᑐᕈᓐᓇᖅᑐᓂᑦ ᐊᒻᒪ ᖃᓄᐃᖏᑦᓯᐊᕆᐊᖃᕐᓂᕐᒧᑦ.”
“ᓄᓇᓕᐸᐅᔭᐃᑦ ᐃᖃᓗᐃᑦ ᐊᒻᒪ ᑎᒍᒐᓱᐊᖅᑕᐃᒃᑯᑦ ᑮᓇᐅᔭᓂᑦ ᓄᐊᑦᓯᔩᑦ ᓱᓕ ᓄᐊᑦᓯᕙᓐᓂᐊᖅᑐᑦ ᐱᖕᖑᐊᖅᑐᓕᕆᓂᕐᒧᑦ ᒪᑭᒪᔾᔪᑎᑦᓴᓂᑦ ᐊᒻᒪ ᖁᕕᐊᓱᑦᓯᐊᖅᑐᑎᒃ ᐱᑎᑕᐅᔭᕆᐊᑦᓴᖅ ᐱᓕᕆᔾᔪᑎᑦᓴᓄᑦ ᐃᓚᓕᐅᑎᔪᑦᓴᓂᑦ ᐊᒻᒪ ᐊᑐᖅᑐᒻᒪᕆᐅᓂᐊᖅᑐᓂᑦ ᐳᐃᔾᔪᕋᕐᕕᒻᒧᑦ” ᐅᖃᖅᑐᖅ ᐊᐃᒥ ᐃᐅᓪᒎᕐᔅᒪ, ᓄᓇᓕᐸᐅᔭᒃᑯᑦ ᐱᖕᖑᐊᖅᑐᓕᕆᔨᖏᑕ ᐊᖏᔪᖅᑳᖓᑦ.
ᒫᓐᓇᓕ, ᐳᐃᔾᔪᕋᕐᕕᑦᓴᖅ ᐅᓪᓗᕐᓯᐅᑎᒍᑦ ᒪᓕᑦᓯᐊᖅᑐᖅ ᐊᒻᒪ ᐊᑐᖅᑐᓂ ᑮᓇᐅᔭᓂᑦ ᒫᓐᓇᒧᑦ ᐊᑐᕆᐊᓕᓐᓂᑦ. ᒪᑐᐃᓛᔾᔭᖕᖒᕆᔭᖅ 2017 ᑕᖅᑭᖏᑕ ᓯᕗᓪᓕᖏᓐᓂ.
ᑐᑭᓯᒋᐊᒃᑲᓐᓂᕐᕕᑦᓴᖅ:
ᐄᕙ ᒪᐃᑯᓪ,
ᑐᓴᐅᒪᔭᐅᒋᐊᓕᓐᓂᑦ ᑲᒪᔨ,
ᓄᓇᓕᐸᐅᔭᐃᑦ ᐃᖃᓗᐃᑦ
ᐅᖄᓚᐅᑎᖓ: (867)975-8525
ᐅᖄᓚᐅᑎᕋᓛᖓ: (867) 222-5728
