ᑲᓇᑕᐅᑉ ᐸᓖᓯᖏᑦ – 
ᖃᑦᑎᕆᔨᒃᑯᑦ/ᓄᓇᒃᑰᔫᖅ ᑐᐊᕕᖅᑐᓕᕆᔾᔪᑎ – 
ᐱᕐᓯᑎᓪᓗᒍ ᑐᑭᓯᒋᐊᕐᕕᒃ – ᑐᓴᕋᑦᓴᑦ
ᓄᓇᓕᐸᐅᔭᐃᑦ ᐃᖃᓗᐃᑦ ᖃᑦᑎᕆᔨᒃᑯᖏᑕ 2014-ᒥ ᐱᓕᕆᐊᒥᓂᕐᓂᒃ ᐅᓂᒃᑳᑦ
ᒪᐃ 14, 2015 (ᐃᖃᓗᐃᑦ, ᓄᓇᕗᑦ) ᓄᓇᓕᐸᐅᔭᐃᑦ ᐃᖃᓗᐃᑦ ᖃᑦᑎᕆᔨᒃᑯᖏᑦ ᐅᓂᒃᑳᖃᓚᐅᖅᑐᑦ 2014-ᒥ ᐱᓕᕆᐊᒥᓂᕐᒥᓂᒃ ᐃᖃᓗᐃᑦ ᓄᓇᓕᐸᐅᔭᐃᑦ ᑲᑎᒪᔨᖏᓐᓄᑦ ᑲᑎᒪᑎᓪᓗᒋᑦ ᓇᒡᒋᔾᔭᐅᓕᖅᑭᐅᑎᓪᓗᒍ, ᒪᐃ 12, 2015. ᓈᓴᐅᑎᒍᑦ ᑐᑭᓯᒋᐊᕈᑎᖃᖅᑐᑦ ᐅᓂᒃᑳᓕᐊᖑᓯᒪᔪᑦ ᐊᑐᖅᐸᓚᐅᖅᑕᖏᓐᓂᑦ ᐃᖃᓗᓐᓂ ᖃᑦᑎᕆᔨᒃᑯᑦ 2014-ᖑᑎᓪᓗᒍ.
“ᐅᐸᓚᐅᖅᑐᒍᑦ 45-ᓄᑦ ᐃᑯᐊᓚᔪᓄᑦ. ᒪᕐᕉᓐᓂᒃ ᖃᑦᑎᕆᔩᓐᓂᒃ ᐋᓐᓂᖅᑐᖃᓚᐅᖅᑐᖅ ᐊᒻᒪᓗ ᐊᑕᐅᓯᕐᒥᑦ ᓄᓇᓕᓐᓂᒥᐅᑕᐅᔪᒥᑦ ᐃᓅᔪᓐᓃᖅᑐᖃᖅᑐᓂ. ᐃᑯᐊᓪᓚᒧᑦ ᐊᓯᐅᔭᐅᓯᒪᓕᖅᑐᑦ ᓇᓚᐅᑦᑖᖅᑕᐅᓯᒪᔪᑦ $519,392.00-ᖑᒋᐊᖏᑕ 2014-ᒥ, ᐃᓄᖏᑦ ᒪᓕᑦᑐᒋᑦ $68-ᖑᒐᔭᓐᖑᐊᖅᑐᑦ ᐊᑕᐅᓯᕐᒧᑦ, ᐊᒻᒪᓗ ᐃᑭᑉᐸᑦᑐᑦ 6-ᖑᖕᖑᐊᕋᔭᖅᑐᑎᒃ 1,000-ᓂᑦ ᐃᓄᖕᓂᒃ. 73 ᐳᓴᖏᑦ ᐱᔮᕆᔭᐅᓗᑎᒃ ᐃᑭᑭᑕᒥᓂᐅᔪᑦ”, ᐅᖃᖅᑐᖅ ᓘᒃ ᒍᕌᓐᒪᐃᓵᓐ, ᖃᑦᑎᕆᔨᒃᑯᑦ ᐊᖏᔪᖅᑳᖓᑦ ᓄᓇᓕᐸᐅᔭᐃᑦ ᐃᖃᓗᓐᓂ.
“ᑭᐅᔨᕗᑦ ᐅᖄᓚᕕᐅᓚᐅᖅᑐᑦ 50,979-ᓂᑦ ᐋᓐᓂᖅᑐᓂᑦ 2014, ᐅᓪᓗᑕᒫᑦ 140-ᖑᕙᑦᑐᑎᒃ ᐊᔾᔨᒌᖕᖏᑦᑐᑦ ᐅᖄᓚᔾᔪᑎᓕᑦ. ᓄᓇᒃᑰᔫᒃᑯᑦ ᑐᐊᕕᕐᓇᖅᑐᓕᕆᔨᕗᑦ ᐅᐸᓚᐅᖅᑐᑦ 1,694-ᓄᑦ ᐅᖄᓚᔪᓄᑦ ᐊᒻᒪᓗ ᖃᑦᑎᕆᔨᒃᑯᑦ 388-ᓄᑦ ᐅᖄᓚᕕᐅᓗᑎᒃ. ᖃᐅᑕᒫᖅᑐᖅᓯᐅᑎᕗᑦ ᖃᑦᑎᕆᔩᑦ 96 ᐳᓴᖏᓐᓂᑦ ᑲᒪᒋᔭᖃᓚᐅᖅᑐᑦ ᐅᖄᓚᔾᔪᑎᐅᔪᓂᑦ. ᐊᑭᓕᕐᓱᖅᑕᐅᒐᑎᒃ ᐃᑲᔪᖅᑎᒋᕙᑦᑕᕗᑦ ᑭᐅᖃᑕᐅᓚᐅᖅᑐᑦ 71-ᓄᑦ ᑐᐊᕕᕐᓇᖅᑐᓄᑦ (3 ᐳᓴᖏᑦ) ᐊᒻᒪᓗ 39-ᓂ ᐃᓕᓐᓂᐊᖃᑕᐅᓚᐅᖅᑐᑦ ᐱᓕᒻᒪᑦᓴᐅᑎᓂᑦ. ᖃᑦᑎᕆᔨᒃᑯᑦ ᐃᓚᒋᔭᐅᕙᓚᐅᕐᒥᔪᑦ ᓄᓇᓕᓐᓂ ᖃᓄᐃᓕᐅᖅᑎᑦᓯᔪᖃᓕᕋᐃᒻᒪᑦ, ᑮᓇᐅᔭᓂᑦ ᐱᕈᐃᓇᓱᐊᖃᑕᐅᕙᑦᑐᑎᒃ ᐃᖃᓗᓐᓂ ᖃᑦᑎᕆᔨᒃᑯᑦ ᑲᑐᔾᔨᖃᑎᒌᖏᓐᓂᑦ, ᐊᖏᔪᖅᑳᖏᑎᒍᑦ, ᐋᓕᒃᔅ ᐳᕆᔅᑰ.
ᖁᕕᐊᒋᔭᒻᒪᕆᐅᔪᑦ ᐅᐱᒋᔭᐅᓗᑎᒃ ᐊᒻᒪᓗ ᖁᔭᓐᓇᒦᖅᑕᐅᓗᑎᒃ ᐃᓚᒋᔭᐅᔪᑦ ᐃᖃᓗᓐᓂ ᖃᑦᑎᕆᔨᒃᑯᓐᓄᑦ, ᑭᐅᔨᓄᑦ, ᖃᑦᑎᕆᔨᓄᑦ/ᑐᐊᕕᕐᓇᖅᑐᓕᕆᔨᓄᑦ ᐊᒻᒪᓗ ᐃᑲᔪᖅᐸᑦᑐᓄᑦ ᐊᑭᓕᕐᓱᖅᑕᐅᒐᑎᒃ - ᐱᓕᕆᔪᒻᒪᕆᐅᕙᓐᓂᖏᓐᓄᑦ ᐃᕿᐊᓱᖕᖏᓯᐊᖅᑐᑎᒃ ᐱᔨᑦᓯᕋᐅᑎᒃᑯᑦ ᐃᑲᔫᑎᒋᕙᑦᑕᖏᒍᑦ ᐊᓯᒥᓂᒃ. ᓄᓇᑦᑎᓐᓂᑦ ᖃᓄᐃᖁᔨᖏᓯᐊᕐᓂᓯ ᐅᐱᓐᓇᖅᐳᖅ ᐊᒻᒪᓗ ᖁᔭᒋᔭᒻᒪᕆᐅᓗᓂ.
ᖁᔭᓐᓇᒦᖅᑕᒻᒪᕆᑲᑦᑕᐅᖅ ᐃᖃᓗᐃᑦ ᓄᓇᓕᐸᐅᔭᐃᑦ ᑲᑎᒪᔨᖏᑦ, ᑎᒥᐅᔪᒥ ᐃᖅᑲᓇᐃᔭᕐᕕᐅᔪᑦ, ᐱᓗᐊᖅᑐᒥ ᓱᓪᓗᓕᓕᕆᔨᑦ, ᓄᓇᓕᓐᓂ ᒪᓕᒐᕋᓛᓕᕆᔨᑦ ᐊᒻᒪᓗ ᓴᓇᔪᓕᕆᔨᒃᑯᑦ. ᑭᖑᓪᓕᖅᐹᒥ, ᒥᑭᓛᖑᖕᖏᓯᐊᖅᑐᓄᑦ, ᖁᔭᓐᓇᒦᕌᓗᒃ ᓇᖕᒥᓂᖃᖅᑎᓄᑦ ᑮᓇᐅᔭᓕᐅᕐᓂᒃᑯᑦ ᐅᕙᑦᑎᓐᓂᑦ ᐃᑲᔪᕐᓯᒪᔪᒻᒪᕆᐅᒻᒪᑕ ᓇᐅᒃᑯᑐᐃᓐᓇᑦᓯᐊᖅ ᐊᕐᕌᒍᒥ, ᐱᓗᐊᖅᑐᒥ ᐊᑦᓯᕕᒻᒥ ᐃᑯᐊᓚᔪᖃᖅᑎᓪᓗᒍ,” ᐅᖃᓱᖓᐅᑎᓚᐅᖅᑐᖅ ᒍᕌᓐᒪᐃᓵᓐ.
ᐃᖃᓗᓐᓂ ᖃᑦᑎᕆᔨᒃᑯᑦ 2014-ᒥ ᐱᓕᕆᐊᒥᓂᖏᓐᓂᑦ ᓈᓴᐅᑎᓕᑦ ᐅᓂᒃᑳᖏᑦ ᐊᑐᐃᓐᓇᐅᔪᑦ ᖃᕋᑕᐅᔭᒃᑯᑦ ᓄᓇᓕᐸᐅᔭᒃᑯᑦ ᐃᑭᐊᖅᑭᕕᖓᓂ: ᓇᕿᓪᓗᒍ ᒪᑐᐃᕈᑎᖓ ᐅᓂᒃᑳᑦ: arraagumi_piliriaminirnik_unikkaatsait_2014_iqaluit_qattirijingit ᐅᕝᕙᓘᓐᓃᑦ ᓄᑖᖅ ᐋᖅᑭᒋᐊᖅᑕᐅᕋᑖᓚᐅᖅᑐᖅ ᐃᑭᐊᖅᑭᕕᖓᑦ ᓄᓇᓕᐸᐅᔭᒃᑯᑦ ᐅᕗᖓ www.city.iqaluit.nu.ca
ᑐᑭᓯᒋᐊᒃᑲᓐᓂᕐᕕᑦᓴᖅ ᖃᐅᔨᒋᐊᕐᓗᒍ:
ᐄᕙ ᒪᐃᑯᓪ, ᑐᓴᐅᒪᔭᐅᒋᐊᓕᓐᓂᑦ ᑲᒪᔨ
ᓄᓇᓕᐸᐅᔭᐃᑦ ᐃᖃᓗᐃᑦ
ᐅᖄᓚᐅᑎᖓ: (867) 975-8511
ᐅᖄᓚᐅᑎᕋᓛᖓ: (867) 222-5728
