ᓄᓇᓕᐸᐅᔭᐃᑦ ᑲᑎᒪᔨᖏᑦ ᓇᓗᓇᐃᕐᓯᔪᑦ ᐃᑯᐊᓪᓚᑦᑕᐃᓕᒪᔪᓕᕆᓂᕐᒧᑦ ᐱᓇᓱᐊᕈᓯᕐᒥᑦ ᐋᑦᑑᐸ 9-ᒥᑦ 15-ᒧᑦ, 2016

ᐱᕙᓪᓕᐊᔪᓂᑦ ᑐᓴᕋᑦᓴᖅ
ᓄᓇᓕᐸᐅᔭᐃᑦ ᑲᑎᒪᔨᖏᑦ ᓇᓗᓇᐃᕐᓯᔪᑦ ᐃᑯᐊᓪᓚᑦᑕᐃᓕᒪᔪᓕᕆᓂᕐᒧᑦ ᐱᓇᓱᐊᕈᓯᕐᒥᑦ ᐋᑦᑑᐸ 9-ᒥᑦ 15-ᒧᑦ, 2016
ᐋᑦᑑᐸ 11, 2016 (ᐃᖃᓗᐃᑦ, ᓄᓇᕗᑦ) - ᒪᓕᒐᑎᒍᑦ ᓇᓗᓇᐃᕐᓯᓚᐅᖅᑐᑦ ᐃᑲᔪᕐᓱᐃᔾᔪᑎᑦᓴᒥᑦ ᐃᑯᐊᓪᓚᑦᑕᐃᓕᒪᔪᓕᕆᓂᕐᒧᑦ ᐱᓇᓱᐊᕈᓯᐅᓛᖅᑐᒥᑦ, ᐋᑦᑑᐸ 9-ᒥᑦ 15-ᒧᑦ, 2016, ᑲᑎᒪᔨᓕᒫᓄᑦ ᐃᑲᔪᕐᓱᖅᑕᐅᓚᐅᖅᑐᒥᑦ ᑲᑎᒪᓚᐅᖅᑎᓪᓗᒋᑦ ᒫᓐᓇᕈᓘᓚᐅᖅᑐᖅ. ᐊᕐᕌᒍᑦᑎᓐᓂ ᑐᕌᒐᕆᔭᐅᓂᐊᖅᑐᖅ ᐅᑕᖅᑭᑐᐃᓐᓇᕐᓇᒃ - ᐅᓪᓗᕐᓯᐅᑎᖓ ᖃᐅᒋᐊᕈᒃ! ᐊᓯᔾᔨᐸᓪᓗᒋᑦ ᐳᔪᕐᒥᑦ ᖃᐅᔨᓴᐅᑏᑦ ᐊᕐᕌᒍᐃᑦ ᖁᓕᑦ (10) ᓈᒐᐃᑉᐸᑕ.
“ᓄᓇᓕᖃᑎᕗᑦ ᐊᔪᐃᓐᓇᕆᐊᖅᐸᒃᑲ ᖃᐅᔨᓴᖃᑦᑕᖁᓪᓗᒋᑦ ᐅᓪᓗᕐᓯᐅᑎᖏᓐᓂᑦ ᐳᔪᕐᒥᑦ ᖃᐅᔨᓴᐅᑏᑦ ᐊᖏᕐᕋᖏᓐᓂ, ᐊᓯᔾᔨᐸᓪᓗᒋᑦ ᖁᓕᐅᓗᐊᓕᖅᐸᑕ ᐊᕐᕌᒍᐃᑦ ᐊᑐᖅᑕᐅᒋᐊᓕᓚᐅᕐᓯᒪᑎᓪᓗᒍ, ᐊᒻᒪ ᐃᓚᒋᔭᐅᖃᑦᑕᖁᓂᐊᖅᑐᒋᑦ ᑭᒃᑯᑐᐃᓐᓇᐃᑦ ᖃᓄᐃᓕᐅᕈᑎᖃᓕᕋᐃᑉᐸᑕ ᐊᑦᑕᓇᑦᑕᐃᓕᒪᔪᓕᕆᓂᕐᒨᖓᔪᓂᑦ ᐊᒻᒪ ᖃᓄᖅᑑᕈᑎᓄᑦ ᐋᖅᑭᓱᖅᑕᐅᕙᑦᑐᓄᑦ ᐃᖃᓗᓐᓂ ᖃᑦᑎᕆᔨᒃᑯᓐᓂᑦ ᐊᒻᒪ ᑐᐊᕕᕐᓇᖅᑐᓕᕆᓂᕐᒧᑦ ᐱᔨᑦᓯᕋᖅᑎᓂᑦ ᐃᑯᐊᓪᓚᑦᑕᐃᓕᒪᔪᓕᕆᓂᕐᒧᑦ ᐱᓇᓱᐊᕈᓯᕐᒥ 2016,” ᐅᖃᖅᑐᖅ ᒪᐃᔭ ᕆᐊᑦᕘᕐᓐ.
ᓈᒪᔪᐃᑦ ᑎᑎᕋᕐᓯᒪᓂᖏᑦ ᓇᓗᓇᐃᖅᑕᐅᑉ ᐅᑯᐊ:
ᓇᓗᓇᐃᕐᓯᔾᔪᑎ
ᐃᒪᐃᒻᒪᑦ, ᓄᓇᓕᐸᐅᔭᐃᑦ ᐃᖃᓗᐃᑦ ᐃᖃᓗᓐᓂᒥᐅᑕᓂᑦ ᐃᖃᓗᓐᓄᓪᓗ ᓂᐅᕐᕈᕙᑦᑐᓂᑦ ᐊᑦᑕᓇᖅᑐᒦᖁᔨᖕᖏᒻᒪᑕ ᐊᒻᒪ ᐊᑦᑕᓇᖅᑐᒦᔾᔮᖏᓐᓇᒥᒃ ᐃᓱᒪᖃᑦᑕᖁᓪᓗᒋᑦ; ᐊᒻᒪ
ᐃᒪᐃᒻᒪᑦ, ᐃᑯᐊᓚᒃ ᐱᒻᒪᕆᐅᒻᒪᑦ ᑭᒃᑯᑐᐃᓐᓇᕐᓄᑦ ᐅᓗᕆᐊᓇᖅᑐᒻᒪᕆᐅᓗᓂ ᐃᓱᒫᓘᑕᐅᕙᑦᑐᓂ ᓄᓇᓕᓐᓂ ᐊᒻᒪ ᑲᓇᑕᒥ ᓇᒥᑐᐃᓐᓇᖅ, ᐊᒻᒪ ᐊᖏᕐᕋᕐᓯᒪᑎᓪᓗᒋᑦ ᐊᖏᕐᕋᖏᑦ ᐃᑯᐊᓪᓚᑐᐃᓐᓇᕆᐊᖃᑦᓯᐊᐸᑦᑐᑎᒃ; ᐊᒻᒪ
ᐃᒪᐃᒻᒪᑦ, ᐊᑕᐅᓯᖅ ᑕᓪᓕᒪᓂ ᐊᖏᕐᕋᓂ ᖃᐅᔨᓴᐅᑎᓕᓐᓂ ᐃᑯᐊᓪᓚᓕᖅᐸᑕ, ᖃᐅᔨᓴᐅᑎᖏᑦ ᐱᔪᓐᓇ`ᖕᖏᒐᔪᑦᑐᑦ; ᐊᒻᒪ
ᐃᒪᐃᒻᒪᑦ, ᐱᖁᑎᒋᔭᐅᔪᑦ ᖃᐅᔨᓴᐅᑎᖃᖕᖏᑦᑐᑦ ᐃᑯᐊᓪᓚᓕᖅᐸᑕ (38 ᐳᓴᒦᑦᑐᑦ), ᐅᕝᕙᓘᓐᓃᑦ ᖃᐅᔨᓴᐅᑎᖃᖕᖏᑦᑐᑦ (21 ᐳᓴᒦᑦᑐᑦ), ᐱᖓᓱᐃᑦ ᑕᓪᓕᒪᓂᑦ ᐃᑯᐊᓚᒃᑯᑦ ᐃᓅᔪᓐᓃᕐᕕᐅᕙᑦᑐᑦ ᐊᖏᕐᕋᕐᓯᒪᑎᓪᓗᖏᑦ; ᐊᒻᒪ
ᐃᒪᐃᒻᒪᑦ, ᐊᑐᕈᓐᓇᓯᐊᖅᑐᑦ ᐃᑭᑦᑐᖃᓕᖅᐸᑦ ᖃᐅᔨᓴᐅᑏᑦ ᐊᕝᕙᓗᐊᖓᒍᑦ ᐅᓗᕆᐊᓇᕈᓐᓃᑎᑦᓯᔪᓐᓇᕐᒪᑕ ᐃᓅᔪᓐᓃᖅᑐᖃᕐᓂᐊᕐᓂᖓᓂᑦ ᐃᑭᓐᓂᖅᐸᑦ ᐊᖏᕐᕋᕆᔭᐅᔪᖅ; ᐊᒻᒪ
ᐃᒪᐃᒻᒪᑦ, ᐊᒥᓱᐊᓗᐃᑦ ᓄᓇᓕᓐᓂᒥᐅᑕᐃᑦ ᖃᐅᔨᒪᕙᖕᖏᒻᒪᑕ ᖃᖓᒃᑯᑦ ᖃᐅᔨᓴᐅᑎᖏᑦ ᓴᓇᔭᐅᓐᓂᕐᒪᖔᑕ, ᐅᕝᕙᓘᓐᓃᑦ ᖃᖓᒃᑯᑦ ᑭᖑᕝᕕᕆᐊᖃᕐᒪᖔᑕ; ᐊᒻᒪ
ᐃᒪᐃᒻᒪᑦ, ᐃᑭᑦᑐᖃᓕᖅᐸᑦ ᖃᐅᔨᓴᐅᑎᓕᒫᑦᓯᐊᑦ ᐊᓯᔾᔨᖅᑕᐅᒋᐊᖃᖅᐸᑦᑐᑦ ᐊᕐᕌᒍᐃᑦ ᖁᓖᑦ ᓈᒐᐃᑉᐸᑕ; ᐊᒻᒪ
ᐃᒪᐃᒻᒪᑦ, ᖃᖓᒃᑯᑦ ᓴᓇᔭᐅᓐᓂᕐᒪᖔᑕ ᖃᐅᔨᓴᐅᑏᑦ ᖃᐅᔨᔭᐅᔪᓐᓇᖅᑐᑦ ᓴᓇᔪᒥᓃᑦ ᐅᓪᓗᕐᓯᐅᑎᖏᒍᑦ, ᑎᑎᖅᑕᐅᓯᒪᕙᑦᑐᑦ ᐅᖓᑎᖏᓐᓂ ᖃᐅᔨᓴᐅᑏᑦ; ᐊᒻᒪ
ᐃᒪᐃᒻᒪᑦ, ᐃᖃᓗᓐᓂ ᖃᑦᑎᕆᔨᖏᑦ ᒥᑭᓪᓕᒋᐊᕆᔪᒪᑦᓯᐊᕐᒪᑕ ᐊᖏᕐᕋᓂᑦ ᐃᑭᕐᐸᑦᑐᓂᑦ ᐊᒻᒪ ᐊᖏᕐᕋᐃᑦ ᐃᑭᒐᐃᒻᒪᑕ ᐋᓐᓂᐸᑦᑐᓂᑦ ᐱᑦᑕᐃᓕᒪᑎᑦᓯᓂᒃᑯᑦ ᐊᒻᒪ ᓴᐳᒻᒥᔾᔪᑎᓂᑦ ᐃᓕᓐᓂᐊᑎᑦᓯᓂᒃᑯᑦ; ᐊᒻᒪ
ᐃᒪᐃᒻᒪᑦ, ᐃᖃᓗᓐᓂᒥᐅᑕᐃᑦ ᓈᓚᒍᓐᓇᓯᐊᕐᒪᑕ ᑭᒃᑯᑐᐃᓐᓇᕐᓂᑦ ᐃᓕᓐᓂᐊᑎᑦᓯᔾᔪᑎᓂᑦ ᐊᒻᒪ ᓇᒻᒥᓂᖅ ᖃᓄᐃᓕᐅᕆᐊᕈᓐᓇᖅᑐᑎᒃ ᐅᓗᕆᐊᓇᖅᑐᒦᔾᔭᐃᐸᑦᑐᑎᒃ ᐃᑭᓐᓂᐅᓴᔪᓂᑦ, ᐱᓗᐊᖅᑐᒥ ᐊᖏᕐᕋᖏᓐᓂ; ᐊᒻᒪ
ᐃᒪᐃᒻᒪᑦ, 2016 ᐃᑯᐊᓪᓚᑦᑕᐃᓕᒪᔪᓕᕆᓂᕐᒥᑦ ᐱᓇᓱᐊᕈᓯᐅᑉ ᑐᕌᒐᕆᓂᐊᖅᑕᖓ, “ᐅᑕᖅᑭᑐᐃᓐᓇᕐᓇᓯ - ᐅᓪᓗᕐᓯᐅᑎᖓ ᖃᐅᔨᒋᐊᕐᓯᐅᒃ! ᐊᓯᔾᔨᐸᓪᓗᒋᑦ ᐃᑭᑦᑐᖃᓕᖅᐸᑦ ᖃᐅᔨᓴᐅᑏᑦ ᐊᕐᕌᒍᐃᑦ ᖁᓖᑦ ᓈᒐᐃᑉᐸᑕ” ᐱᕙᓪᓕᐅᑎᑦᓯᐊᑐᒃᑯᑦ ᐃᓕᓐᓂᐊᑎᑦᓯᔾᔪᑎᐅᓂᐊᖅᑐᖅ ᑭᒃᑯᑐᐃᓐᓇᕐᓂᑦ ᐱᒻᒪᕆᐊᓘᓂᖓᓂᑦ ᑭᖑᕝᕖᖃᑦᑕᕆᐊᖃᕐᓂᖅ ᐃᑭᑦᑐᖃᓕᖅᐸᑦ ᖃᐅᔨᓴᐅᑎᓂᑦ ᖁᓖᑦ ᐊᕐᕌᒍᐃᑦ ᓈᒐᐃᑉᐸᑕ, ᐊᒻᒪ ᖃᐅᔨᒋᐊᖅᐸᓪᓗᒋᑦ ᖃᖓᒃᑯᑦ ᓴᓇᔭᐅᓐᓂᕐᒪᖔᑕ ᖃᐅᔨᓴᐅᑎᓯ ᐅᓪᓗᕐᓯᐅᑎᖏᑦ ᐅᖓᑖᓃᑦᑐᑦ.
ᒫᓐᓇ, ᑕᐃᒪᐃᒻᒪᑦ, ᑭᒡᒐᖅᑐᐃᓗᖓ ᐃᖃᓗᐃᑦ ᓄᓇᓕᐸᐅᔭᐃᑦ ᑲᑎᒪᔨᖏᓐᓂᑦ, ᐅᕙᖓ, ᒫᑦᓕᓐ ᕆᐊᑦᕘᕐᓐ, ᒪᐃᔭ ᓄᓇᓕᐸᐅᔭᐃᑦ ᐃᖃᓗᓐᓂ, ᓇᓗᓇᐃᖅᐸᒃᑲ ᐅᓪᓗᐃᑦ ᐋᑦᑑᐸ 9-ᒥᑦ 15-ᒧᑦ, 2016, ᐃᒫᒃ ᐅᓪᓘᓂᐊᕐᓂᖓᓂᑦ:
ᐃᑯᐊᓪᓚᑦᑕᐃᓕᒪᔪᓕᕆᓂᕐᒥᑦ ᐱᓇᓱᐊᕈᓯᖅ
ᓄᓇᓕᐸᐅᔭᐃᑦ ᐃᖃᓗᓐᓂ. ᐊᔭᐅᕆᐊᖅᐸᒃᑲ ᓄᓇᓕᓐᓂᒥᐅᑕᐅᖃᑎᕗᑦ ᖃᐅᔨᒋᐊᖁᖃᑦᑕᖁᓪᓗᒋᑦ ᐅᓪᓗᕐᓯᐅᑎᖏᓐᓂᑦ ᐃᑭᑦᑐᖃᓕᖅᐸᑦ ᖃᐅᔨᓴᐅᑎᖏᑕ ᐊᖏᕐᕋᖏᓐᓂ, ᑭᖑᕝᕕᕐᓗᒋᑦ ᐊᕐᕌᒍᖃᓗᐊᓕᖅᐸᑕ ᖁᓕᓂᑦ (10), ᐊᒻᒪ ᐃᓚᒋᔭᐅᖃᑦᑕᖁᓂᐊᖅᑐᒋᑦ ᑭᒃᑯᑐᐃᓐᓇᐃᑦ ᐊᑦᑕᓇᖅᑐᒦᒋᐊᖃᖏᓐᓂᖏᓐᓂᑦ ᖃᓄᐃᓕᐅᕈᑎᐅᓕᕋᐃᑉᐸᑕ ᐊᒻᒪ ᖃᓄᖅᑑᖅᑐᓄᑦ ᐅᐸᓗᖓᐃᔭᖅᑕᐅᓂᐊᖅᑐᓄᑦ ᐃᖃᓗᓐᓂ ᖃᑦᑎᕆᔨᒃᑯᓐᓄᑦ ᐊᒻᒪ ᑐᐊᕕᕐᓇᖅᑐᓕᕆᔨᒃᑯᓐᓄᑦ ᐱᔨᑦᓯᕋᖅᑎᓄᑦ ᐃᑯᐊᓪᓚᑦᑕᐃᓕᒪᔪᓕᕆᓂᕐᒥᑦ ᐱᓇᓱᐊᕈᓯᐅᓕᖅᐸᑦ 2016.
ᓇᓗᓇᐃᖅᑕᐅᕗᖅ ᐅᓪᓗᒥ ᓰᑏᐱᕆ 27-ᖑᑎᓪᓗᒍ, 2016.
-30-
ᑐᑭᓯᒋᐊᒃᑲᓐᓂᕐᕕᑦᓴᖅ ᖃᐅᔨᒋᐊᕐᓗᒍ:
ᐋᓐᑐᕆᐊ ᓯᐱᑦᔪᕐ
ᑐᓴᐅᒪᑎᑦᓯᓕᕆᓂᖅ
ᓄᓇᓕᐸᐅᔭᐃᑦ ᐃᖃᓗᐃᑦ
ᐃᕐᖐᓇᖅᑕᐅᑎᖓ: A.Spitzer@city.iqaluit.nu.ca