ᓄᓇᓕᐸᐅᔭᒃᑯᑦ ᐃᓪᓗᖁᑎᖓ ᓈᓴᐅᑎᓕᒃ 901 ᐊᕐᓇᐃᑦᑑᑉ ᐃᓪᓗᖓᓂ ᐃᓯᖅᕕᖏᑦ ᓄᑖᕈᕆᐊᖅᑕᐅᓛᖅᑐᑦ ᓴᓇᒋᐊᖅᑕᐅᓗᓂᓗ

31/07/2020

ᓄᓇᓕᐸᐅᔭᒃᑯᑦ ᐃᓪᓗᖁᑎᖓ ᓈᓴᐅᑎᓕᒃ 901 ᐊᕐᓇᐃᑦᑑᑉ ᐃᓪᓗᖓᓂ  ᐃᓯᖅᕕᖏᑦ ᓄᑖᕈᕆᐊᖅᑕᐅᓛᖅᑐᑦ ᓴᓇᒋᐊᖅᑕᐅᓗᓂᓗ

 

ᓄᓇᓕᐸᐅᔭᒃᑯᑦ ᐃᓪᓗᖁᑎᖓ ᓈᓴᐅᑎᓕᒃ 901 ᐊᓇᐃᑦᑑᑉ ᐃᓪᓗᖓᓂ ᓴᓇᒋᐊᖅᑕᐅᓛᕐᒪᑦ 2020 ᐊᒻᒪ 2021-ᒥ ᐃᖃᓗᒻᒥᐅᑕᐃᑦ ᐊᑲᐅᓂᖅᓴᒥᒃ ᐃᓯᖅᕕᖃᖁᓪᓗᒋᑦ ᑭᒃᑯᑐᐃᓐᓇᕐᓄᓪᓗ ᐊᑐᐃᓐᓇᐅᓂᖅᓴᐅᖁᔭᐅᓪᓗᓂ ᒐᕙᒪᕋᓛᖃᖅᕕᐅᔪᖅ.

ᑖᒃᑯᐊ ᓴᓇᒋᐊᑕᐅᔪᑦ ᐊᔪᕈᓐᓃᑎᑦᑎᓂᐊᖅᑐᑦ ᐃᓄᕐᓂᖅᓴᐅᔪᓂᒃ ᐱᒡᒐᖅᑐᓂᒃ ᐱᓕᕆᐊᕆᒋᐊᓕᖏᓐᓂᑦ ᐃᒻᒥᓂᒃ ᐱᔪᓐᓇᖅᓯᑎᑦᑎᓗᑎᒃ ᐊᒻᒪᓗ ᓱᑎᑦᑎᔪᖃᖅᑎᓪᓗᒍ ᑲᑎᒪᔪᖃᖅᑎᓪᓗᒍᓗ ᐅᐸᖃᑕᐅᔪᓐᓇᓕᕐᓗᑎᒃ.

ᑖᒃᑯᐊ ᐃᓯᖅᕕᖏᓐᓂ ᓄᑖᕈᕆᐊᖅᑕᐅᔪᑦ ᐃᓚᖃᖅᑐᑦ ᐳᓪᓚᒨᖅᑐᒥᒃ ᒪᔪᕋᐅᑎᒥᒃ ᐊᑐᖅᑕᐅᔪᓐᓇᖅᑐᒥᒃ ᐊᒃᓴᓗᐊᓕᓐᓂ ᐃᒃᓯᕙᐅᑕᓂᓪᓗᑦ ᐊᒻᒪᓗ ᑲᐃᓪᓗᐊᒐᕐᒥᒃ ᐱᓱᒍᑎᓕᓐᓄᑦ ᓇᑎᖓᓂ ᖁᓪᓕᕐᒥ ᐱᓕᕆᕕᖏᓐᓄᑦ ᐃᓯᕈᓐᓇᓕᕐᓗᑎᒃ ᐊᕐᓇᐃᑦᑐᖅ ᐃᓪᓗᖓᑕ ᐹᖓᒍᑦ. ᐊᒻᒪᓗ, ᐃᓯᖅᕕᖓᑕ ᓯᓚᑖᓂ ᒪᔪᕋᐅᑎᖏᑦ ᓄᑖᕈᕆᐊᖅᑕᐅᓛᕐᒥᔪᑦ ᑲᐃᓪᓗᐊᓯᕕᒃᓴᕈᖅᑎᑕᐅᓗᓂ ᐃᓯᕋᓱᓪᓗᓂ, ᐊᒻᒪᓗ ᒪᑐᖓ ᐃᒻᒥᓂᒃ ᒪᑐᐃᓲᖑᓗᓂ ᒪᑐᓲᖑᓗᓂᓗ ᑭᒃᑯᓕᒫᑦ ᑕᕝᕗᖓ ᐃᓪᓗᒧᑦ ᐃᓯᕈᓐᓇᖁᓪᓗᒋᑦ. 

ᓇᑎᖓᓂ ᖁᓪᓕᕐᒥ, ᑭᒃᑯᓕᒫᓄᑦ ᑐᕌᖓᔪᖅ ᖁᐃᔭᖅᑐᖅᕕᒃ ᐊᓇᐊᖅᑐᖅᕕᒃ ᐃᓯᕋᒃᓴᕈᓛᕐᒥᔪᖅ ᐊᒃᓴᓗᐊᓕᒻᒥ ᐃᒃᓯᕙᐅᑕᓕᓐᓄᑦ, ᐅᑕᖅᑭᕕᖓ ᐃᓯᕆᐊᖏᓪᓗ ᓴᓂᒧᑦ ᐱᕕᑦᑐᕆᐊᖅᑕᐅᓛᕐᒥᔪᑦ ᐃᓯᕋᒃᓴᐅᑦᑎᐊᖁᓪᓗᒍ, ᐊᒻᒪᓗ ᓄᑖᒥᒃ ᓇᑎᖅᑖᓛᕐᒥᔪᑦ ᑕᒪᒃᑭ ᖁᓕᕇᑦ ᓇᑎᖏᑦ.

ᓄᓇᓕᐸᐅᔭᒃᑯᑦ ᑐᓂᔭᐅᔪᒻᒪᑕ $1,000,000−ᓂᒃ ᑲᓇᑕᐅᑉ ᒐᕙᒪᖓᑕ ᐃᓯᕋᓱᐊᕐᓂᕐᒥᒃ ᐊᔪᕈᓐᓃᑎᑦᑎᓂᕐᒧᑦ ᑐᕌᖓᔪᓂᒃ ᑮᓇᐅᔭᖏᓐᓂᑦ. ᑖᒃᑯᐊ ᑮᓇᐅᔭᑦ ᐊᑭᓕᐅᑎᒋᔭᐅᓂᐊᖅᑐᑦ ᓄᑖᕈᕆᐊᖅᑕᐅᔪᓄᑦ ᐊᒻᒪᓗ ᖄᖓᒍᒃᑲᓐᓂᖅ $440,000−ᓂᒃ ᐃᖃᓗᐃᑦ ᓄᓇᓕᐸᐅᔭᖓ ᑮᓇᐅᔭᖃᖅᑎᑦᑎᓂᐊᖅᑐᖅ ᐊᓯᖏᓐᓂᑦ ᐊᓪᓚᕝᕕᖏᓐᓂᑦ ᓄᑖᕈᕆᐊᖅᑕᐅᔪᓄᑦ ᑕᕙᓂ ᐃᓪᓗ 901−ᒥ.

ᑕᒪᓐᓇ ᑎᑎᕋᐅᔭᖅᑕᐅᓂᖓᓄᑦ ᑳᓐᑐᕌ ᑐᓂᔭᐅᓚᐅᖅᑐᖅ ᔅᑖᓐᑎᒃ ᖃᐅᔨᓴᖅᑎᖏᓐᓄᑦ. ᑳᓐᑐᕌ ᐱᒐᓱᐊᕋᒃᓴᖅ ᓴᓇᔭᐅᓂᒃᓴᖓᓄᑦ ᓴᖅᑭᖅᑕᐅᓛᕐᒥᔪᖅ ᑕᖅᑭᓂ ᐊᒡᒋᖅᑐᓂ.

ᓴᓇᔭᐅᕙᓪᓕᐊᓂᐊᖅᑐᖅ ᐊᒡᒍᑐᖅᓯᒪᔪᒥᒃ 2020-ᒥ ᐊᒻᒪᓗ 2021-ᒥ, ᐃᓱᒪᖃᕆᐊᖅᑐᑎᒃ ᓄᕙᓇᓐᓇᕐᔪᐊᖅ ᑰᕕᑦ−19−ᑕᖃᕐᓂᖓᓂᑦ ᐋᓐᓂᐊᖃᕐᓇᖏᑦᑐᓕᕆᔨᒃᑯᓐᓄᑦ ᒪᓕᑦᑕᐅᖁᔭᐅᔪᑦ ᒪᓕᑦᑕᐅᓗᑎᒃ. ᑭᒃᑯᑐᐃᓐᓇᐃᑦ ᐃᓯᕋᓚᖃᑦᑕᕈᓐᓇᓐᖏᑐᐃᓐᓇᕆᐊᓖᑦ ᐃᓛᓐᓂᒃᑯᑦ ᐊᕐᓇᐃᑦᑑᑉ ᐃᓪᓗᖓᓄᑦ ᓴᓇᔭᐅᑎᓪᓗᒍ.

ᓄᓇᓕᐸᐅᔭᒃᑯᑦ ᐊᓪᓚᕝᕕᖓ ᑕᐃᑲᓃᖏᓐᓇᓂᐊᖅᑐᖅ ᐊᕐᓇᐃᑦᑑᑉ ᐃᓪᓗᖓᓂ ᐊᐅᔭᐅᓂᖓᓂ ᐊᐅᓪᓛᓚᐅᓐᖏᓂᕐᒥᓂ ᓄᑖᒧᑦ ᐃᓂᒃᓴᒧᑦ ᐅᑭᐊᒃᓵᖓᓂ 2020ᒥ. ᐊᓯᖏᑦ ᓄᓇᓕᐸᐅᔭᒃᑯᑦ ᐊᓪᓚᕝᕕᖁᑎᖏᑦ ᐊᐅᓪᓛᓛᕐᒥᔪᑦ ᐊᕐᓇᐃᑦᑑᑉ ᐃᓪᓗᖁᑎᖓᓄᑦ ᑭᒃᑯᑐᐃᓐᓇᕐᓂᓪᓗ ᐱᔨᑦᑎᕋᐃᓐᓇᕈᓐᓇᕐᓗᑎᒃ ᑕᐃᑲᓂᖔᖅ.

 

ᒪᐃᔪ ᕕᐊᓪ ᐅᖃᐅᓯᖏᑦ:

ᓄᓇᓕᐸᐅᔭᒃᑯᑦ ᖁᔭᓕᕗᑦ ᑲᓇᑕᐅᑉ ᒐᕙᒪᖓᑕ ᐃᓯᕋᓱᐊᕐᓂᕐᒥᒃ ᐊᔪᕈᓐᓃᑎᑦᑎᓂᕐᒧᑦ ᑐᕌᖓᔪᓂᒃ ᑮᓇᐅᔭᖏᓐᓂᑦ ᓄᑖᕈᕆᐊᖅᑕᐅᑎᑦᑎᔪᓐᓇᕐᒪᑕ ᑕᒃᑯᓂᖓ. ᑕᕝᕙ ᓴᖅᑭᖅᑯᖅ ᒐᕙᒪᑦᑕ ᐊᖏᖅᓯᒪᓂᕆᔭᖓ ᓇᒧᓕᒫᖅ ᑲᓚᑕᒥᐅᓕᒫᓂᒃ ᐃᓯᕈᓐᓇᖁᔨᓪᓗᑎᒃ.

ᑖᒃᑯᐊ ᓄᑖᕈᕆᐊᖅᑕᐅᔪᑦ ᐃᓚᒋᔭᐅᕗᑦ ᓄᓇᓕᐸᐅᔭᒃᑯᑦ ᐸᕐᓇᐅᑎᖏᓐᓄᑦ ᖃᐅᔨᒪᑦᑎᐊᕈᑎᐅᔪᓄᑦ ᑕᒪᒃᑯᐊ ᐱᖁᑎᕐᔪᐊᕗᑦ ᓄᓇᓕᑦᑕ ᐊᐅᓚᓂᖓᓄᑦ ᐊᖑᒻᒪᑎᓯᒪᒐᓗᐊᕐᒪᖔᑕ. ᐊᖏᖅᓯᒪᓂᖃᕋᑦᑕ ᓴᖅᑭᖅᓯᒍᒪᓪᓗᑕ ᐊᑲᐅᓂᖅᓴᐅᔪᒥᒃ, ᐃᓯᕋᒃᓴᐅᓂᖅᓴᐅᔪᒥᒃ, ᖁᕕᐊᓇᕐᓂᖅᓴᐅᔪᒥᓪᓗ ᐱᓕᕆᕕᐅᔪᒥᒃ ᑭᒃᑯᓕᒫᓄᑦ ᐱᕕᐅᕙᑦᑐᒥᒃ.

 

 

ᑐᑭᓯᒋᐊᕈᒪᔪᑦ ᐆᕕᖓ ᖃᐅᔨᒋᐊᖁᔪᑦ:

ᓖᓴ ᒥᓗᓵᕝᔨᕕᒃ

ᑐᓴᐅᒪᑎᑦᑎᓕᕆᓂᕐᒥᑦ ᐊᒻᒪ ᐱᔨᑦᓯᕋᐅᑎᓕᕆᕐᓂᒥᑦ ᐊᐅᓚᑦᑎᔨ

ᓄᓇᓕᐸᐅᔭᐃᑦ ᐃᖃᓗᐃᑦ

L.Milosavljevic@iqaluit.ca

867-979-5607