ᑲᓇᑕᐅᑉ ᐸᓖᓯᖏᑦ – 
ᖃᑦᑎᕆᔨᒃᑯᑦ/ᓄᓇᒃᑰᔫᖅ ᑐᐊᕕᖅᑐᓕᕆᔾᔪᑎ – 
ᐱᕐᓯᑎᓪᓗᒍ ᑐᑭᓯᒋᐊᕐᕕᒃ –
ᔪᓚᐃ 25, 2018 (ᐃᖃᓗᐃᑦ, ᓄᓇᕗᑦ) - ᔪᓚᐃ 24-ᖑᑎᓪᓗᒍ, ᑲᑎᒪᔩᑦ ᑐᓴᖅᑎᑕᐅᒋᐊᓚᐅᖅᑐᑦ ᐱᓪᓗᒍ ᐃᖃᓗᓐᓂ ᐃᒪᖃᐅᑎᐅᕙᑦᑐᖅ.
ᑲᑎᒪᔩᑦ ᑐᓴᓚᐅᖅᑐᑦ ᐃᖃᓗᐃᑦ ᐃᒪᖃᐅᑎᖓ, ᐃᒥᖅᑕᕐᕕᒃ ᐃᒪᑭᓪᓕᓯᒪᔪᒻᒪᕆᐅᓂᖓᓂᑦ ᖃᖓᐅᓂᖓ ᐊᕐᕌᒎᑉ ᐃᓱᒪᒋᓪᓗᒍ. ᓯᓚᓗᖏᓂᕐᓴᒻᒪᕆᐅᓚᐅᕐᒪᑦ ᔪᓂᐅᑎᓪᓗᒍ ᐊᕐᕌᒍᒥ ᑕᐃᒫᒃ ᓯᓚᓗᑉᐸᒃᑲᓗᐊᕐᒪᑦ ᔪᓂᐅᓕᕋᐃᒻᒪᑦ. ᐃᒥᖅᑐᓂᕐᓴᐅᓕᖅᑐᑕᓗ, ᐱᔾᔪᑎᒋᓪᓗᒍ ᐃᖃᓗᓐᓂ ᐃᓄᒋᐊᓐᓂᕐᓴᐅᓕᕐᒪᑕ ᐊᒻᒪ ᐱᕙᓪᓕᐊᑎᑦᓯᓂᕐᓴᐅᓕᖅᑐᑎᓪᓗᒍ ᓴᓇᓂᒃᑯᑦ ᓱᓇᑐᐃᓐᓇᕐᓂᑦ. ᐊᒻᒪᑦᑕᐅᖅ, ᓱᓪᓗᓖᑦ ᐃᒥᕐᒧᑦ ᓱᕋᑦᑕᓂᕐᓴᐅᓯᒪᓪᓗᑎᒃ ᐱᒻᒪᑕ.
ᒪᐃᔭ ᕆᐊᑦᕘᕐᓐ ᐅᖃᖅᑐᖅ, “ᑲᑎᒪᔩᑦ ᐊᖏᖃᑎᒌᑦᑐᐃᓐᓇᐅᓚᐅᖅᑐᑦ ᖃᓄᐃᓕᐅᕈᒪᓪᓗᑎᒃ ᐊᒻᒪ ᐃᖅᑲᓇᐃᔭᖅᑎᓂᒃ ᑎᓕᓯᓕᓚᐅᖅᑐᑦ ᖃᐅᔨᓴᖁᓪᓗᒋᑦ ᐱᐅᕐᓱᐊᓂᒃᑯᑦ ᖃᓄᐃᓕᐅᕈᑎᑦᓴᐅᔪᓐᓇᖅᑐᓂᒃ ᒫᓐᓇᒃᑯᑦ ᐊᒻᒪ ᓯᕗᓂᑦᑎᓐᓄᑦ.”
ᓄᓇᓕᐸᐅᔭᒃᑯᑦ ᐅᑯᓂᖓ ᐱᓯᒪᔪᑦ:
- ᐱᓕᕆᑎᑦᓯᔪᑦ ᖃᐅᔨᒪᓂᓕᒻᒪᕆᓐᓂᑦ ᖃᐅᔨᒪᔨᑕᓂᑦ ᓴᓇᒋᐊᓕᓐᓂᑦ ᓇᓗᓇᐃᔭᐃᓯᒪᔪᓂᒃ ᖃᓄᐃᓕᐅᕈᑎᑦᓴᐅᔪᓐᓇᖅᑐᓂᒃ ᐅᑭᐅᖑᓂᐊᖅᑐᖅ ᐃᖃᓗᐃᑦ ᐃᒪᖃᑦᓯᐊᕐᓂᐊᖁᓪᓗᒍ.
- ᖃᐅᔨᒋᐊᕐᓯᒪᔪᑦ ᒪᓕᒐᓕᐅᖅᑎᓂᒃ ᐊᒻᒪ ᑲᑐᔾᔨᖃᑎᒋᕙᑦᑕᑎᓐᓂᒃ ᐃᓚᒋᔭᐅᓗᑎᒃ ᓄᓇᕘᑉ ᒐᕙᒪᒃᑯᖏᑦ, ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪ ᓄᓇᕘᒥ ᐃᒪᓕᕆᓂᕐᒥᑦ ᑲᑎᒪᔩᑦ ᐱᔾᔪᑎᖃᖅᑐᑎᒃ ᒪᓕᒐᕐᓂᒃ ᒪᓕᒋᐊᓕᓐᓂᒃ ᐊᒻᒪ ᒪᓕᒐᑎᒍᑦ ᖃᓄᐃᓕᐅᕈᑎᐅᔪᓐᓇᖅᑐᓂᒃ.
- ᐱᓕᕆᔪᑦᓴᓂᒃ ᓴᖅᑮᓚᐅᖅᑐᑦ ᓯᕗᓕᖅᑎᓂᒃ ᐱᓯᒪᔪᓂᒃ ᓄᓇᓕᐸᐅᔭᐃᑦ ᐃᖃᓗᐃᑦ ᑯᐊᐳᕇᓴᖓᓐᓂᑦ, ᒐᕙᒪᒃᑯᖏᓐᓂᑦ ᓄᓇᕘᑉ, ᒐᕙᒪᒃᑯᖏᓐᓂᒃ ᑲᓇᑕᐅᑉ ᐊᒻᒪ ᖃᐅᔨᓴᖅᑎᓂᒃ ᓇᓗᓇᐃᔭᐃᓛᖅᑐᓂᒃ ᖃᓄᐃᓕᐅᕈᑎᑦᓴᐅᒐᔭᖅᑐᓂᒃ.
- ᖃᐅᔨᓴᖅᑕᐅᓯᒪᔪᓂᒃ ᓇᓕᕌᕈᑎᑦᓴᓂᒃ ᐃᓚᒋᔭᐅᓗᑎᒃ ᓱᓪᓗᓕᒃᑯᑦ ᐃᒥᖅᑕᕐᓂᖅ ᖃᓂᑦᑐᓂᒃ ᐃᒪᖃᐅᑎᑦᓴᓂᒃ ᓱᓪᓗᓕᒃ ᐃᒥᖅᑕᕐᕕᒻᒨᖓᓗᓂ ᑕᒪᐅᓇ ᐊᑲᐅᓂᖅᐹᖑᒐᔭᖅᐸᓪᓚᐃᒻᒪᑦ ᐊᒻᒪ ᐱᕙᓪᓕᐅᑎᓂᖅᐹᖑᓗᓂ ᓇᓖᕌᕈᑎᓂᑦ ᐊᑐᐃᓐᓇᐅᔪᓂᑦ.
ᓄᓇᓕᐸᐅᔭᒃᑯᑦ ᓇᓗᖏᒻᒪᑕ ᖃᓄᐃᓕᐅᕆᐊᑦᑕᐅᑎᒋᒍᑎᒃ ᐃᒻᒪᐃᓇᓱᓪᓗᑎᒃ ᐃᒥᖅᑕᕐᕕᒻᒥᑦ, ᐃᖃᓗᓐᓂᒥᐅᑕᐃᑦ ᐃᒥᖃᕈᓐᓇᖅᑎᑕᐅᑦᓯᐊᕐᓂᐊᖅᑐᑦ ᓈᒻᒪᑦᑐᒥᑦ.
ᐃᒥᖅᑕᕐᕕᒃ ᐱᓪᓗᒍ ᐅᓂᒃᑳᑦᓴᑦ
ᐊᐱᖅᑯᑎ1: ᖃᓄᐃᓕᖓᕙ ᐃᒪᓕᕆᓂᖅ?
- ᐊᕐᕌᒍᓐᓂ ᒪᕐᕉᓐᓂ ᓯᓚᓗᖏᓂᕐᓴᐅᓯᒪᒻᒪᑦ
- ᓄᓇᓖᓪᓗ ᐃᓄᒋᐊᑦᓯᕙᓪᓕᐊᑐᐃᓐᓇᕐᓂᖓ ᐊᒻᒪ ᐱᕙᓪᓕᐊᑎᑦᑕᐅᕙᑦᑐᑦ ᓴᓇᓂᒃᑯᑦ ᐃᒪᖃᕆᐊᖃᕐᓂᕐᓴᐅᕙᓕᕐᒪᑕ
- ᐱᑐᖃᐅᓗᐊᓕᖅᑐᑦ ᐊᒻᒪ ᓱᕋᑦᑕᑉᐸᓕᖅᑐᑦ ᓱᓪᓗᓖᑦ ᐃᒥᕐᒧᑦ ᑕᒪᐅᖓᑐᐃᓐᓇᖅ ᑯᕕᕙᒻᒪᑕ ᐃᒥᕐᒥᒃ
ᐊᐱᖅᑯᑎ2: ᖃᖓᓕ ᓄᓇᓕᐸᐅᔭᒃᑯᑦ ᐱᓕᕆᐊᖃᕆᐊᖃᓕᓚᐅᕐᒪᑕ ᐃᒪᓕᕆᓂᕐᒥᑦ?
ᓄᓇᓕᐸᐅᔭᒃᑯᑦ ᖃᐅᔨᒪᓕᖅᑐᑦ ᐃᒪᑭᓪᓕᓂᐅᓴᓂᕐᒥᑦ ᐱᔾᔪᑎᒋᓪᓗᒋᑦ ᓇᓚᐅᑦᑖᖅᑕᐅᓯᒪᔪᑦ ᖃᓄᑎᒋ ᐃᓐᓂᖃᓛᓕᕐᓂᕐᒥᑦ ᐊᒻᒪ ᐱᕈᖅᐸᓪᓕᐊᓂᕆᓚᐅᖅᑕᖓᓂᑦ ᓄᓇᓕᐅᑉ ᐊᒻᒪ ᐱᕙᓪᓕᐊᑎᑕᐅᕙᓪᓕᐊᔪᑦ ᓴᓇᓂᒃᑯᑦ ᐱᓪᓗᒋᑦ 2005-ᒥᓂᒃ. ᓄᓇᓕᐸᐅᔭᒃᑯᑦ ᐅᓂᒃᑳᓕᐅᖅᑎᑦᓯᓯᒪᔪᑦ ᐊᒻᒪ ᖃᓄᐃᓕᐅᕆᐊᕐᓯᒪᓪᓗᑎᒃ ᓯᕗᓂᐊᒍᑦ ᐱᔾᔪᑎᒋᓪᓗᒍ ᐃᒪᒃᑭᓪᓕᕙᓪᓕᐊᓂᐅᔪᖅ.
2006-ᒥ, ᓄᓇᓕᐸᐅᔭᒃᑯᑦ ᐳᖅᑐᓕᖅᑎᑦᓯᑲᓐᓂᕆᐊᓚᐅᕐᓯᒪᔪᑦ ᐃᒥᖅᑕᕐᕕᐅᑉ ᓴᐴᓗᑕᖓᓂᑦ ᐃᒻᒪᑲᓐᓂᖁᓪᓗᒍ ᐃᒥᖅᑕᕐᕕᒃ.
2013 ᐊᒻᒪ 2014-ᒥ ᐃᒪᖃᐅᑎᑦᓴᓐᓂᑦᓴᓂᒃ ᕿᒥᕐᕈᐊᑎᑦᓯᓚᐅᖅᑐᑦ ᐊᒻᒪ ᐅᓂᒃᑳᓕᐅᖅᑎᑦᓯᓪᓗᑎᒃ ᑲᑎᒪᔨᓄᑦ.
2017-ᒥ, ᐱᕙᓪᓕᐊᑎᑕᐅᓂᖓ ᐊᒻᒪ ᐱᒋᐊᖅᑎᑕᐅᓂᖓ ᐃᒪᓕᕆᓂᕐᒥᑦ ᐊᐅᓚᑦᓯᔾᔪᑎᑦᓴᓂᒃ ᐸᕐᓇᐅᑎᐅᑉ ᐱᓕᕆᔾᔪᑎᓕᐅᕈᒪᓪᓗᑎᒃ ᐃᒪᓕᕆᓂᕐᒥᑦ ᐊᒻᒪ ᐃᒥᕐᒥᒃ ᐱᐅᕐᓱᐊᕈᑎᑦᓴᓂᑦ ᐃᖃᓗᓐᓄᑦ.
ᑲᑎᒪᔩᑦ ᑲᔪᓯᑎᑦᓯᓚᐅᖅᑐᑦ ᑮᓇᐅᔭᓂᒃ $1 ᒥᓕᐊᓂᑦ ᐃᒪᓕᕆᔾᔪᑎᑦᓴᓄᑦ ᐊᒻᒪ ᑐᓪᓕᐊᓂ ᐃᒥᕐᒥᒃ ᖃᐅᔨᓴᖅᑎᑦᓯᓪᓗᑎᒃ ᐃᓚᖃᓚᐅᖅᑐᒥᑦ ᖃᐅᔨᓴᖅᑎᑦᓯᓂᕐᒥᑦ ᐃᒪᖃᐅᑎᖃᕈᓐᓇᕋᔭᕐᒪᖔᑕ ᑰᒻᒥᒃ ᐃᒥᕐᑕᕕᒻᒨᖓᓗᓂ ᓱᓪᓗᓕᒃ ᑰᒻᒥᒃ. ᑕᒪᓐᓇᓕ ᐱᔭᕇᕐᓯᒪᓕᖅᑐᖅ ᐊᒻᒪ ᖃᐅᔨᓴᖅᑕᐅᕙᓪᓕᐊᓕᖅᑐᑎᒃ ᐃᓗᓕᖏᑦ.
ᓄᓇᓕᐸᐅᔭᒃᑯᑦ ᐱᓕᕆᐊᖃᖅᐸᑦᑐᑦ ᐊᒻᒪ ᓱᓕ ᐱᓕᕆᕙᑦᑐᑎᒃ ᖃᓄᐃᓕᐅᕈᑎᑦᓴᓂᒃ ᐋᖅᑭᒍᑎᑦᓴᓯᐅᖅᑐᑎᒃ.
ᐊᐱᖅᑯᑎ3: ᖃᓄᐃᓕᐅᕐᒪᑕ ᓄᓇᓕᐸᐅᔭᒃᑯᑦ ᓇᓗᓇᐃᕐᓯᒪᓇᓱᐊᖅᑐᑎᒃ ᐃᖃᓗᐃᑦ ᐃᒪᖃᑦᓯᐊᖁᓪᓗᒍ ᓈᒻᒪᑦᑐᒥᒃ?
ᐱᓕᕆᑎᑦᓯᔪᑦ ᖃᐅᔨᒪᓂᓕᒻᒪᕆᓐᓂᑦ ᖃᐅᔨᒪᔨᑕᓂᑦ ᓴᓇᒋᐊᓕᓐᓂᑦ ᓇᓗᓇᐃᔭᐃᓯᒪᔪᓂᒃ ᖃᓄᐃᓕᐅᕈᑎᑦᓴᐅᔪᓐᓇᖅᑐᓂᒃ ᒫᓐᓇᑲᐅᑎᒋ ᐃᖃᓗᐃᑦ ᐃᒪᖃᑦᓯᐊᕐᓂᐊᖁᓪᓗᒍ ᒫᓐᓇ ᐊᒻᒪ ᓯᕗᓂᑦᑎᓐᓂ.
ᓄᓇᓕᐸᐅᔭᒃᑯᑦ ᖃᐅᔨᒋᐊᕐᓯᒪᔪᑦ ᒪᓕᒐᓕᐅᖅᑎᓂᒃ ᐊᒻᒪ ᑲᑐᔾᔨᖃᑎᒋᕙᑦᑕᑎᓐᓂᒃ ᐃᓚᒋᔭᐅᓗᑎᒃ ᓄᓇᕘᑉ ᒐᕙᒪᒃᑯᖏᑦ, ᑲᓇᑕᐅᑉ ᒐᕙᒪᒃᑯᖏᑦ ᐊᒻᒪ ᓄᓇᕘᒥ ᐃᒪᓕᕆᓂᕐᒥᑦ ᑲᑎᒪᔩᑦ ᑐᓴᐅᒪᖁᓪᓗᒋᑦ ᐊᒻᒪ ᐱᔾᔪᑎᖃᖅᑐᑎᒃ ᒪᓕᒐᕐᓂᒃ ᒪᓕᒋᐊᓕᓐᓂᒃ ᐊᒻᒪ ᒪᓕᒐᑎᒍᑦ ᖃᓄᐃᓕᐅᕈᑎᐅᔪᓐᓇᖅᑐᓂᒃ.
ᓄᓇᓕᐸᐅᔭᒃᑯᑦ ᐱᓕᕆᔪᑦᓴᓂᒃ ᓴᖅᑮᓚᐅᖅᑐᑦ ᓯᕗᓕᖅᑎᓂᒃ ᐱᓯᒪᔪᓂᒃ ᓄᓇᓕᐸᐅᔭᐃᑦ ᐃᖃᓗᐃᑦ ᑯᐊᐳᕇᓴᖓᓐᓂᑦ, ᒐᕙᒪᒃᑯᖏᓐᓂᑦ ᓄᓇᕘᑉ, ᒐᕙᒪᒃᑯᖏᓐᓂᒃ ᑲᓇᑕᐅᑉ ᐊᒻᒪ ᖃᐅᔨᓴᖅᑎᓂᒃ ᓇᓗᓇᐃᔭᐃᓛᖅᑐᓂᒃ ᖃᓄᐃᓕᐅᕈᑎᑦᓴᐅᒐᔭᖅᑐᓂᒃ ᐊᒻᒪᑦᑕᐅᖅ ᓱᓪᓗᓕᓐᓂᒃ ᐊᑐᕈᓐᓇᕋᔭᕐᒪᖔᑕ ᖃᓂᑦᑐᓂᒃ ᐃᒻᒪᐃᕕᑦᓴᐅᔪᓐᓇᖅᑐᓂᒃ.
|
ᐊᐱᖅᑯᑎ4: ᖃᖓᓕ ᓱᓪᓗᓕᒻᒥᑦ ᐊᑐᕆᐊᓯᓛᕐᒪᑕ? ᓱᓪᓗᓕᒻᒥᑦ ᐊᑐᕆᐊᓯᓛᖅᑐᑦ ᐃᓘᓐᓇᑎᒃ ᒪᓕᒐᓕᕆᔪᑦ ᐱᓕᕆᔾᔪᑏᑦ, ᐴᕐᒥᑦᑖᕈᑎᑦᓴᑦ ᐊᒻᒪ ᐊᓯᖏᑦ ᐊᑦᑐᐊᔪᑦ ᐱᓕᕆᐊᖑᒋᐊᓖᑦ ᐱᔭᕇᖅᑕᐅᓯᒪᓕᖅᐸᑕ. ᐃᓱᒪᒋᔭᕗᑦ ᑕᖅᑭᕐᒥ ᑭᖑᓂᐊᓂᓘᓐᓃᑦ ᐱᓕᕆᐊᖑᓛᕐᒪᑕ. ᐃᓚᖏᑦ ᓱᓪᓗᓕᕆᓂᕐᒨᖓᔪᑦ ᐊᑐᐃᓐᓇᐅᒻᒪᑕ ᐃᖃᓗᓐᓂ ᐱᔭᐅᑦᑕᐅᑎᒋᔪᓐᓇᖅᑐᑦ.
|