ᕼᐋᓗᐄᓐᖑᑎᓪᓗᒍ ᐳᓚᕋᓐᓇᐅᑎᓪᓗᒍ ᐊᑦᑕᓇᑦᑕᐃᓕᒪᔪᓕᕆᔪᒥᑦ ᑐᓴᕋᑦᓴᖅ

ᑭᒃᑯᑐᐃᓐᓇᕐᓄᑦ ᑐᓴᕋᑦᓴᖅ
ᕼᐋᓗᐄᓐᖑᑎᓪᓗᒍ ᐳᓚᕋᓐᓇᐅᑎᓪᓗᒍ ᐊᑦᑕᓇᑦᑕᐃᓕᒪᔪᓕᕆᔪᒥᑦ ᑐᓴᕋᑦᓴᖅ
ᐋᒃᑑᐸ 26 2023 – ᐃᖃᓗᐃᑦ, ᓄᓇᕗᑦ

ᓄᓇᓕᐸᐅᔭᐃᑦ ᐃᖃᓗᐃᑦ ᐃᖅᑲᐃᑎᑦᓯᒍᒪᓕᕆᕗᑦ ᓄᓇᓕᕐᒥᐅᑕᓂᑦ ᐅᔾᔨᕐᓱᑲᓐᓂᖁᔭᐅᓗᑎᒃ ᓇᓕᐊᓐᓄᕋᓕᕈᑎᒃ ᕼᐋᓗᐄᓐᓇᐅᓕᖅᐸᑦ ᐳᓚᕋᓐᓇᐅᓕᖅᐸᑦ ᓇᒡᒋᔾᔭᐅᓕᖅᑭᕐᒥ, ᐋᒃᑑᐸ 31, 2023.

ᓱᕈᓰᑦ ᐊᑦᑕᓇᖅᑐᒦᖁᓇᒋᑦ ᐳᓚᕋᓐᓂᖏᓐᓂ, ᐃᖃᓗᐃᑦ ᓄᓇᓕᖓᓂ ᒪᓕᒐᕋᓛᓕᕆᔨᒃᑯᑦ ᐱᓕᕆᖃᑎᖃᕐᓗᑎᒃ ᐃᖃᓗᐃᑦ ᖃᑦᑎᕆᔨᒃᑯᖏᓐᓂᑦ ᓱᑐᐃᓐᓇᕐᒦᓛᕐᒪᑕ ᐃᖃᓗᐃᑦ ᐃᓗᐊᓂ ᖃᐅᔨᒪᑦᓯᕙᓪᓗᑎᒃ ᐊᖅᑯᑎᓂᑦ ᐃᓚᒌᓄᑦ ᐊᕐᕌᒍᑦᑎᓐᓂ ᐳᓚᕋᓐᓂᐊᖅᑐᓄᑦ, ᐊᒻᒪ ᖃᐅᔨᓴᖅᐸᓪᓗᑎᒃ ᓇᒥᑐᐃᓐᓇᖅ ᓄᓇᓕᐅᑉ ᐃᓗᐊᓂ ᐊᒻᒪ ᑕᑯᑦᓴᐅᓇᓱᐊᖅᐸᓪᓗᑎᒃ ᓇᒥᑐᐃᓐᓇᖅ ᕼᐋᓗᐄᓐᓇᐅᑎᓪᓗᒍ ᐅᓐᓄᒃᑯᑦ.

ᓱᕈᓯᕐᒥᑦ ᐊᑲᐅᖏᓕᐅᕈᑎᖃᖅᑐᖃᓕᖅᐸᑦ ᓇᒥᑐᐃᓐᓇᑦᓯᐊᖅ ᑕᐃᑲᓂ ᐅᓐᓄᖓᓂ ᕼᐋᓗᐄᓐᓇᒥ ᐅᐸᒍᓐᓇᓛᖅᑐᑦ ᖃᐅᔨᓴᖅᑎᐅᔪᓄᑦ ᓇᓪᓕᐊᓐᓄᑐᐃᓐᓇᑦᓯᐊᖅ ᐃᑲᔪᖅᑕᐅᒋᐊᖃᓕᕐᓂᕈᑎᒃ.

ᐱᒻᒪᕆᐅᔪᑦ ᖃᓄᐃᒋᐊᖃᖏᓂᕐᒧᑦ ᐊᒻᒪ ᐊᑦᑕᓇᔾᔭᐃᕐᓯᒪᔾᔪᑎᓂᑦ ᐃᑲᔫᑎᑦᓴᑦ:

• ᐊᖏᕐᕋᒥ ᐆᒪᔪᖁᑎᐅᔪᑦ ᐱᓯᒪᑦᓯᐊᐸᓪᓗᒋᑦ ᐊᒻᒪ ᒪᑑᑉ ᐳᓚᕋᑦᑐᓄᑦ ᐅᐸᑦᑕᐅᕙᓐᓂᐊᖅᑑᑉ ᖃᓂᒋᔮᓃᑎᑉᐸᖏᓪᓗᒋᑦ ᐅᕝᕙᓘᓐᓃᑦ ᓯᓚᒥᑦᓯᐊᒻᒪᕆᒃ ᐱᑎᑦᓯᕙᓪᓗᓯ ᐃᓯᖅᐸᖏᓪᓗᑎᒃ ᐳᓚᕋᑦᑐᑦ.
• ᐸᑎᐅᔭᓪᓚᑦᑖᓂᑦ ᐊᑐᖏᖔᕐᓗᓯ, ᐊᑐᖔᕈᓐᓇᖅᑐᓯ ᖃᐅᒪᓕᓐᓂᑦ ᐸᑎᐅᔭᓂᑦ ᐅᕝᕙᓘᓐᓃᑦ ᖃᐅᒪᑐᐃᓐᓇᕐᓂᒃ ᐊᕙᑎᐊ ᑲᑉᐱᐊᓇᕋᓱᓪᓗᒍ.
• ᐃᓪᓗᐃᑦ ᓯᓚᑎᖏᑦ ᓄᓇᓯᐅᑎᓄᑦ ᐃᓂᒋᔭᐅᕙᑦᑐᑦ, ᑐᕐᓲᑦ ᐊᒻᒪ ᒪᔪᕋᐅᑏᑦ ᖃᐅᒪᖃᖅᑎᐸᓪᓗᒋᑦ ᖃᐅᒪᑦᓯᐊᖅᑐᓂᑦ ᐊᒻᒪ ᓱᓇᑐᐃᓐᓇᕐᓄᑦ ᐊᕝᕕᐊᖅᑐᖃᖏᓪᓗᓂ.
• ᐃᓐᓇᕐᒧᑦ ᖃᐅᔨᓴᖅᑕᐅᖁᔫᒐᓗᐊᑦ ᐅᖁᒻᒥᐊᒐᐃᑦ ᐳᓚᕋᐅᓯᐊᖑᓯᒪᔪᑦ ᐅᖁᒻᒥᐊᒐᖅᑕᐅᖏᓐᓂᖏᓐᓂ ᖃᓄᐃᖏᒃᑲᓗᐊᕐᒪᖔᑕ.

ᕼᐋᓗᐄᒥ ᐃᑲᔫᑎᑦᓴᑦ ᓱᕈᓯᕐᓂᑦ:

• ᐅᖃᐅᑎᓯᒪᓗᒍ (ᒋᒃ) ᐊᖏᔪᖅᑳᑦ (ᑳᒃᑭᒃ) ᐅᕝᕙᓘᓐᓃᑦ ᖃᐅᔨᓴᖅᑏᑦ (ᑎᑦ) ᓇᒧᖕᖓᓂᐊᕐᒪᖔᖅᐱᑦ, ᑭᓇᒥᒃ ᐊᐃᑉᐸᖃᕐᓂᐊᕐᒪᖔᖅᐱᑦ, ᐊᒻᒪ ᖃᖓᒃᑯᑦ ᐊᖏᕐᕋᓂᐊᕐᒪᖔᖅᐱᑦ.
• ᐅᖄᓚᐅᑎᕋᓛᒥᑦ ᓇᑦᓴᕐᓗᑎᑦ ᐊᑐᐃᓐᓇᖅᑕᖃᖅᐸᑦ ᐅᖃᕋᔭᕋᕕᑦ ᖃᓄᑐᐃᓐᓇᖅ ᐊᓯᔾᔨᖅᑐᖃᖅᐸᑦ.
• ᐃᓘᓐᓇᑎᒃ ᐱᓱᑉᐸᑦᑐᓄᑦ ᒪᓕᒐᐃᑦ ᓱᓕ ᐊᑐᖅᑕᐅᒋᐊᓖᑦ! - ᖃᐅᔨᓴᖅᐸᓪᓗᓯ ᓇᒧᑐᐃᓐᓇᖅ ᐊᒻᒪ ᐃᑳᓕᕋᐃᒍᑦᓯ ᐱᓱᑉᐸᓪᓗᓯ, ᐅᓪᓚᖏᓪᓗᓯ, ᐊᑐᕆᐊᑦ ᐊᑭᐊᓄᑦ ᐃᑳᖅᐸᓪᓗᓯ ᓴᖑᕕᒻᒨᕋᐃᒍᑦᓯ ᐊᑐᕆᐊᓄᑦ.
• ᐳᓚᕋᑉᐸᓪᓗᓯ ᐃᓪᓗᓄᑦ ᐃᑳᓚᐅᖏᓪᓗᓯ ᐊᑐᕆᐊᕐᒥᑦ ᐊᒻᒪ ᐱᔭᕇᕈᕕᒋᑦ ᐊᑐᕆᐊᑦ ᐊᑭᐊᓄᑦ ᐃᑳᓕᑕᐃᓐᓇᐸᓪᓗᓯ, ᐅᑎᖅᑎᑕᐅᔭᖅᐸᖏᓪᓗᓯ ᐊᑐᕆᐊᒃᑯᑦ.
• ᐊᑐᖅᐸᓪᓗᓯ ᑖᓂᖅᑐᔫᒥᔪᓂᑦ, ᖃᐅᒪᓄᑦ ᕿᓪᓕᓲᓂᑦ ᐊᓐᓄᕌᓂᑦ ᓄᓇᓯᐅᖅᑐᓄᑦ ᑕᑯᑦᓴᐅᓯᐊᐸᓐᓂᐊᕋᑦᓯ.
• ᖃᐅᔨᒪᖏᑕᑦᓯᓐᓄᑦ ᐳᓚᕋᑦᑕᓯᓐᓄᑦ ᐃᓯᖅᐸᖏᓪᓗᓯ ᐅᕝᕙᓘᓐᓃᑦ ᓄᓇᒃᑰᔫᓄᑦ ᐃᑭᕙᖏᓪᓗᓯ ᐳᓚᕋᓐᓂᓯᓐᓂ.
• ᖃᓄᑐᐃᓐᓇᖅ ᐅᕝᕙᓘᓐᓃᑦ ᑭᓇᑐᐃᓐᓇᕐᒧᑦ ᐊᑲᐅᒍᓐᓃᕈᑎᖃᕈᑦᓯ, ᐃᓗᐃᑦ ᐃᑉᐱᒋᓗᒍ ᐃᓱᒪᒃᑯᑦ ᐊᒻᒪ ᕿᒪᐃᑐᐃᓐᓇᕐᓗᑎᑦ. ᐊᖏᔪᖅᑳᓐᓄᑦ ᐅᖄᓚᓗᓯ ᐅᕝᕙᓘᓐᓃᑦ ᖃᐅᔨᒪᑦᓯᐊᑕᓐᓄᑦ ᐃᓐᓇᕐᒧᑦ ᓇᓗᒡᒍᑎᒍᕕᑦ ᖃᓄᐃᓕᐅᕐᓂᐊᕆᐊᑦᓴᖅ, ᐅᕝᕙᓘᓐᓃᑦ ᐅᐸᓪᓗᓯ ᓇᓪᓕᐊᓄᑐᐃᓐᓇᑦᓯᐊᖅ ᑲᑐᔾᔨᖃᑕᐅᔪᓄᑦ ᐊᑦᑕᓇᑦᑕᐃᓕᒪᔪᓕᕆᔨᓄᑦ ᓄᓇᒃᑰᔫᓄᑦ.

ᖁᕕᐊᓱᓐᓂᐊᖅᐳᓯ ᕼᐋᓗᐄᑦᓯᐊᕐᓂᐊᖅᑯᓯ

##

ᑐᑭᓯᒋᐊᒃᑲᓐᓂᕐᕕᑦᓴᖅ ᖃᐅᔨᒋᐊᕐᓗᒍ:
ᑭᐊᓐᑦ ᑐᕆᔅᑯᓪ ᑐᓴᐅᒪᐅᑎᓕᕆᓂᕐᒥᑦ ᐊᒻᒪ ᐱᔨᑦᓯᕋᐅᑎᓕᕆᔨᓂᑦ ᐊᐅᓚᑦᓯᔨ
867-979-5607 k.driscoll@iqaluit.ca