ᖃᐅᔨᓴᕈᒃ ᐃᖃᓗᐃᑦ

ᓄᓇᓕᐸᐅᔭᑦᑎᓐᓂ ᐱᑕᖃᐅᖅᑐᖅ ᐊᒥᓱᓂᑦ ᖁᕕᐊᓇᖅᑐᓂᑦ ᐃᓅᖃᑎᒌᓐᓂᒃᑯᑦ ᐊᒻᒪᓗ ᐃᓕᖅᑯᓯᓕᕆᓂᒃᑯᑦ ᐊᑐᕋᑦᓴᓂᑦ ᓂᐅᕐᕈᕙᑦᑐᓄᑦ.  ᐃᓐᓇᑐᖃᕐᓂᑦ ᑏᑐᖃᑎᖃᕈᒪᒍᕕᓪᓘᓐᓃᑦ, ᕿᒧᑦᓯᖅᑐᓄᑦ ᐃᓚᐅᒍᒪᒍᕕᓪᓘᓐᓃᑦ, ᖃᒧᑕᐅᔭᕋᕈᒪᒍᕕᓪᓘᓐᓃᑦ, ᑖᓂᓯᕈᒪᒍᕕᓪᓘᓐᓃᑦ ᑐᐱᐊᓗᐊᓂ ᐊᓕᐊᓇᐃᓕᕆᔨᑦ ᐅᕝᕙᓘᓐᓃᑦ ᐳᓛᕈᒪᒍᕕᑦ ᐱᖃᓐᓂᕆᔭᓐᓂ ᐊᒻᒪᓗ ᐃᓚᒋᔭᖏᓐᓂ ᐃᕝᕕᑦ, ᐃᖃᓗᓐᓂ ᓱᓇᑐᐃᓐᓇᑦᓯᐊᖑᕗᑦ ᖃᓄᐃᓕᐅᕈᑕᐅᔪᓐᓇᖅᑐᑦ.  ᓄᓇᓕᐸᐅᔭᐃᑦ ᐊᖅᑯᓵᖅᑕᕕᑦᓯᐊᕙᒃ, ᕿᑲᕆᐊᖅᑐᕕᑦᓯᐊᕙᒃ ᐅᕝᕙᓘᓐᓃᑦ ᑲᑎᒪᒋᐊᕐᕕᓴᑦᓯᐊᕙᒃ ᑲᑎᒪᕕᔾᔪᐊᕆᐊᖅᑐᕐᕕᑦᓴᑦᓯᐊᕙᒃ.  ᓄᓇᕘᒥ ᐊᒥᓲᓂᖅᐹᓃᑦ ᑐᔪᕐᒥᕕᖃᖅᑐᖅ, ᓯᓂᑦᑕᕐᕕᑐᐃᓐᓇᕐᓂᒃ, ᓂᕆᕕᓐᓂᑦ ᐊᒻᒪᓗ ᓂᐅᕐᕕᕐᕕᓐᓂᑦ.  ᓄᓇᓕᒻᒥᐅᑕᐃᑦ ᐊᒻᒪᓗ ᓂᐅᕐᕈᕙᑦᑐᑦ ᑕᒪᐅᖓ ᓄᓇᓕᓐᓂ ᓂᕆᕕᓐᓂ ᓂᕆᔪᓐᓇᐸᑦᑐᑦ ᓂᕿᑦᓯᐊᕙᓐᓂᑦ ᐊᒻᒪᓗ ᓂᕆᓂᑦ ᓲᕐᓗ ᐅᒥᖕᒪᒥᓂᕐᒥᒃ, ᑐᑦᑐᒥᓂᕐᓂᒃ ᓯᕋᓯᒪᔪᓂᑦ ᐊᒻᒪᓗ ᓵᑦᑐᔭᕐᓯᒪᔪᓂᑦ ᐃᖃᓗᒥᓂᕐᓂᒃ.

ᐃᓚᒋᔭᐅᓗᑎᒃ ᐅᓪᓗᕐᓯᐅᑎᒍᑦ ᐋᖅᑭᒐᕐᓂᑦ ᐱᖕᖑᐊᕈᑎᓄᑦ, ᐃᖃᓗᐃᑦ ᐃᖃᓗᒐᓱᕝᕕᑦᓯᐊᕙᐅᒻᒥᔪᖅ ᐊᒻᒪᓗ ᓄᓇᒥ ᐱᓱᕝᕕᓴᐅᒻᒥᔪᖅ ᓇᒧᑐᐃᓐᓇᖅ - ᓄᓇᓕᓐᓂ ᐅᕝᕙᓘᓐᓃᑦ ᑰᒻᒥ ᒥᕐᖑᐃᓯᕐᕕᒻᒥ.  ᐊᑐᖅᑕᐅᓗᐊᖅᐸᖏᑦᑐᒥᑦ ᐊᑐᕈᒪᓐᓂᕈᕕᑦ ᐊᒥᓱᓂᑦ ᓂᐅᕐᕈᑎᑦᓯᔨᓂᑦ ᐱᑕᖃᖅᑐᖅ ᐅᒥᐊᖅᑐᖃᑕᐅᔪᒪᓐᓂᕈᕕᑦ, ᖃᒧᑕᐅᔭᕈᒪᒍᕕᑦ, ᖃᖓᑕᑎᑦᓯᒍᒪᒍᕕᑦ ᑎᑦᑕᐅᕋᓛᓲᒥᑦ, ᐊᖑᓇᓱᒋᐊᕈᒪᒍᕕᑦ, ᕿᒧᑦᓯᖃᑕᐅᔪᒪᒍᕕᑦ ᐅᕝᕙᓘᓐᓃᑦ ᑰᒃᑯᑦ ᐅᒥᐊᖅᑐᖃᑕᐅᔪᒪᒍᕕᑦ ᑲᑕᓐᓂᓕᒃ ᒥᕐᖑᐃᓯᕐᕕᒻᒥ ᐊᑯᓐᓂᖓᓃᑦᑐᒥ ᐃᖃᓗᐃᑦ ᐊᒻᒪᓗ ᕿᒻᒥᕈᑏᑦ.

ᖁᕕᐊᓱᖃᑕᐅᕈᓘᔭᖅᑐᓂ ᐃᖃᓗᓐᓂ ᐃᓕᖅᑯᓯᕆᔭᐅᕙᑦᑐᓂᑦ ᐊᑐᖅᑎᓪᓗᒋᑦ ᐃᓚᒋᔭᐅᓗᓂ ᖁᕕᐊᓇᕐᓂᖅᐹᖑᒐᔭᖅᑐᖅ. ᐅᐸᓛᖅᑲᓯ ᓄᓇᑦᑕ ᓱᓇᒃᑯᑖᖏᑦ ᑕᑯᔭᒐᖃᕐᕕᒻᒥ ᑕᑯᑦᓴᐅᑎᑕᐅᕙᑦᑐᑦ; ᐅᓂᒃᑳᕐᕕᒃ ᓂᐅᕐᕈᔨᓄᑦ ᑐᑭᓯᒋᐊᕐᕕᒃ; ᐅᕝᕙᓘᓐᓃᑦ ᐅᒥᐊᖅᑐᖃᑕᐅᓗᓯ ᖃᐅᒻᒫᕐᕕᒃ ᒥᕐᖑᐃᓯᕐᕕᒻᒧᑦ ᐃᖃᓗᓐᓂᑦ ᖃᓂᑦᑐᕈᓗᒻᒧᑦ. ᐃᓐᓄᓐᓄᑦ ᓴᓇᐅᒐᕐᓂᑦ ᐊᒻᒪᓗ ᐊᓯᖏᓐᓂᑦ ᓴᓇᐅᒐᕐᓂᑦ ᓂᐅᕕᕈᓐᓇᐸᑦᑐᑦ ᓂᐅᕕᕐᕕᓐᓂᑦ ᓇᓪᓕᐊᓐᓂᑐᐃᓐᓇᖅ ᐅᕝᕙᓘᓐᓃᑦ ᓴᓇᖕᖑᐊᖅᑎᒥᑦ ᓴᓇᔪᒥᓂᕐᒥᒃ ᐅᕝᕙᓘᓐᓃᑦ ᐃᓚᒋᔭᖏᓐᓂᑦ ᓂᕆᑎᓪᓗᑎᑦ ᐃᓕᓐᓅᑐᐃᓐᓇᕆᐊᓕᓐᓂᑦ.

ᖃᓄᑐᐃᓐᓇᑦᓯᐊᖅ ᐊᑐᕈᓐᓇᖅᑐᑦ ᐃᖃᓗᓐᓂ ᑭᒃᑯᑐᐃᓐᓇᑦᓯᐊᑦ.  ᐃᓘᓐᓇᓯ ᑐᖕᖓᓱᑉᐳᓯ ᖁᕕᐊᒋᔭᖃᕆᐊᖅᑐᕐᓗᓯ ᐊᔾᔨᒌᓐᖏᑦᑐᓂᑦ ᑐᖕᖓᓱᑎᑦᓯᕙᑦᑐᑦ ᓄᓇᓕᒻᒥᐅᑕᐃᑦ ᐊᒻᒪᓗ ᓱᓇᑐᐃᓐᓇᐃᑦ ᐊᑐᖅᑕᐅᔪᓐᓇᖅᑐᑦ ᐃᖃᓗᓐᓂᑦ ᓂᐅᕐᕈᕕᒋᔪᒥᓇᓕᕈᑎᐅᔪᑦ ᐊᒻᒪᓗ ᓄᓇᒋᔪᒥᓇᓕᕈᑎᐅᔪᑦ ᐱᐅᔪᐊᓗᒻᒥ!

ᓚ ᐱᑏᑦ ᓯᑕᒃᓯᐊᓐ (La petite séduction) ᐃᖃᓗᓐᓂ
ᑲᔪᓯᓯᒪᑦᓯᐊᖅᑐᖅ ᐱᓕᐊᑦᓴᖅ!

ᑕᑯᓐᓇᖅᑕᐅᕙᑦᑐᖅ ᐊᒥᓱᓄᑦ ᑭᐅᐸᒥ ᑏᕖᒃᑯᑦ ᑕᑯᓐᓇᕋᑦᓴᓕᐊᖑᓯᒪᔪᖅ ᑕᐃᔭᐅᔪᖅ ᓚ ᐱᑏᑦ ᓯᑕᒃᓯᐊᓐ (La petite seduction) ᐃᖃᓗᓐᓅᓚᐅᕐᓯᒪᔪᑦ ᐅᐱᕐᖓᑦᓵᖓᓂ 2015.  ᔪᓚᐃ 29, 2015 ᑐᓴᕐᓴᐅᓚᐅᕐᓯᒪᔪᖅ ᐅᐃᕖᑦ ᓈᓚᐅᓯᕆᔨᒃᑯᖏᓐᓂ ᐄᓰ ᕌᑎᐅ ᑲᓇᑕᒥ, ᐊᒻᒪ ᐅᕙᓂ ᐃᑭᐊᖅᑭᕕᒻᒦᑦᑐᖅ:
http://ici.tou.tv/la-petite-seduction/S10E15 (ᐅᐃᕖᑎᑑᖅᑐ ᑭᓯᐊᓂ)