ᑲᓇᑕᐅᑉ ᐸᓖᓯᖏᑦ – 
ᖃᑦᑎᕆᔨᒃᑯᑦ/ᓄᓇᒃᑰᔫᖅ ᑐᐊᕕᖅᑐᓕᕆᔾᔪᑎ – 
ᐱᕐᓯᑎᓪᓗᒍ ᑐᑭᓯᒋᐊᕐᕕᒃ – 
ᑭᒃᑯᑐᐃᓐᓇᕐᓄᑦ ᑐᓴᕋᑦᓴᖅ
ᐃᓕᓐᓂᐊᖅᑎᓄᑦ ᐹᓯ ᐱᓪᓗᒍ ᐊᑦᑕᓇᔾᔭᐃᕐᓯᒪᓂᖅ
ᓰᑏᐱᕆ 13 2024 – ᐃᖃᓗᐃᑦ, ᓄᓇᕗᑦ
ᓄᓇᓕᐸᐅᔭᐃᑦ ᐃᖃᓗᐃᑦ ᐃᖅᑲᐃᑎᑦᓯᒍᒪᓕᕆᕗᑦ ᓄᓇᓕᕐᒥᐅᑕᓂᒃ ᐃᓕᓐᓂᐊᖅᑏᑦ ᐅᑎᕐᓯᒪᑦᓯᐊᓕᖅᑎᓪᓗᒋᑦ ᐊᒥᓲᓕᐅᒥᓯᒪᓕᕐᒥᑎᓪᓗᒋᑦ ᐱᓱᑉᐸᑦᑐᑦ ᐊᒻᒪ ᓱᕈᓰᑦ ᐊᑐᕆᐊᕐᓂ.
ᐃᑲᔫᑎᑦᓴᐃᑦ ᐊᑐᕆᐊᕐᒥ ᐊᑦᑕᓇᔾᔭᐃᕐᓯᒪᐅᑎᑦᓴᑦ ᐅᖃᐅᓯᐅᒋᐊᖃᓪᓚᕆᑦᑐᑦ ᓱᕈᓯᖁᑎᑦᓯᓐᓄᑦ ᐊᓂᓚᐅᖏᓐᓂᖏᓐᓂ ᐃᓕᓐᓂᐊᕆᐊᕐᓗᑎᒃ ᐃᑲᔫᑎᖃᑐᐃᓐᓇᕆᐊᓕᐅᔪᑦ ᐃᓅᓯᕐᓂᒃ ᐱᐅᓕᑦᓯᓂᒃᑯᑦ.
ᓱᕈᓯᕐᓄᑦ:
• ᑖᓂᖅᑐᔫᒥᒋᐊᖅᐸᓪᓗᓯ: ᑕᑯᑦᓴᐅᓯᐊᖅᑐᓂᒃ ᑖᓂᖅᑐᔪᓂᒃ ᐅᕝᕙᓘᓐᓃᑦ ᐋᖅᑭᑦᓯᕕᒋᓯᒪᔪᓂᒃ ᕿᓪᓕᖅᑐᓂᒃ ᖃᐅᒪᓄᑦ ᐊᓐᓄᕌᕐᓯᒪᕙᓪᓗᓯ ᓄᓇᓯᐅᑎᓄᑦ ᑕᑯᔭᐅᔪᓐᓇᕐᔫᒥᔪᓂᒃ.
• ᐅᔾᔨᓱᐃᓐᓇᐸᓪᓗᓯ: ᐃᑉᐱᒋᐊᑦᓯᐊᐸᓪᓗᒋᑦ ᐊᕙᑎᓐᓃᑦᑐᑦ ᐊᒻᒪ ᖃᐅᔨᓴᖅᐸᓪᓗᓯ ᓄᓇᒃᑰᔫᓂᒃ ᐱᓱᓕᕋᐃᒍᑦᓯ ᐹᓯᒧᑦ ᐅᕝᕙᓘᓐᓃᑦ ᐅᑎᖅᐸᓪᓕᐊᓕᕋᐃᒍᑦᓯ ᐹᓯᒥᒃ ᓄᖅᑲᑕᕐᕕᖓᓂᒃ.
• ᒪᓕᑉᐸᓪᓗᒋᑦ ᒪᓕᒐᐃᑦ: ᐊᑐᕆᐊᒃᑯᑦ ᐃᑳᖅᐸᓪᓗᓯ ᑭᓯᐊᓂ ᐃᑳᕐᕕᓕᐊᖑᓯᒪᔪᒃᑯᑦ ᐊᒻᒪ ᒪᓕᑉᐸᓪᓗᒋᑦ ᐹᓯᒥᒃ ᐊᖅᑯᐅᑎᑉ ᐊᑐᖅᑕᐅᖁᔭᖏᑦ.
• ᐊᑦᑕᓇᔾᔭᐃᕐᓯᒪᕙᓪᓗᓯ ᐹᓯᐅᑉ ᓄᖅᑲᑕᕐᕕᖓᓂ: ᐅᖄᓚᐅᓯᕆᕙᖏᓪᓗᓯ ᐊᒻᒪ ᓴᓂᓕᕇᓐᓇᐸᓪᓗᒋᑦ ᐅᑕᖅᑭᔪᐃᑦ ᐹᓯᒥᒃ.
• ᐅᑕᖅᑭᒋᐊᖅᑐᐸᓪᓗᓯ ᖃᐃᓚᐅᖏᓐᓂᖓᓂ ᐹᓯ: ᐹᓯᐅᑉ ᓄᖅᑲᑕᕐᕕᖓᓅᖅᐸᓪᓗᓯ ᖃᐃᓚᐅᖏᓱᖓᕐᓂᖓᓂ ᐹᓯ.
• ᐊᑐᕆᐊᒦᓗᐊᖅᐸᖏᓪᓗᓯ: ᐅᖓᓯᔾᔫᒥᔪᒦᑉᐸᓪᓗᓯ ᐹᓯᐅᑉ ᓄᖅᑲᑕᕐᕕᖓᓂᒃ ᐊᒻᒪ ᐱᖕᖑᐊᐸᖏᓪᓗᓯ ᖃᓂᒋᓗᐊᖅᑕᖓᓂ ᓄᖅᑲᑕᕐᕕᐅᑉ.
• ᑕᓯᐅᖅᐸᓪᓗᒋᑦ ᐊᓯᕕᑦ ᐊᒡᒐᖏᑦ: ᓄᖃᖅᑎᐅᒍᑦᓯ, ᐊᖏᔪᖅᑳᕕᑦ ᐅᕝᕙᓘᓐᓃᑦ ᖃᐅᔨᓴᖅᑎᕕᒃ ᐊᒡᒐᖏᑦ ᑕᓯᐅᖅᐸᓪᓗᒋᑦ ᐱᓱᑦᑎᓪᓗᓯ ᐹᓯᐅᑉ ᓄᖅᑲᑕᕐᕕᖓᓄᑦ ᐅᕝᕙᓘᓐᓃᑦ ᕿᒪᐃᕙᓪᓕᐊᑎᓪᓗᓯ.
• ᒪᓕᑉᐸᓪᓗᒋᑦ ᐹᓯᐅᑉ ᒪᓕᒐᖏᑦ: ᓈᓚᑉᐸᓪᓗᒍ ᐹᓯᐅᑉ ᐊᖁᑎᖓ ᐊᒻᒪ ᒪᓕᑉᐸᓪᓗᒋᑦ ᒪᓕᒐᖏᑦ ᐹᓯᐅᑉ, ᓲᕐᓗ ᐃᑦᓯᕚᖏᓐᓇᕐᓗᓯ, ᑕᓕᓯ ᐹᓯᐅᑉ ᓯᓚᑖᓅᖅᐸᖏᓪᓗᒋᒃ.
• ᑕᑯᑦᓴᐅᒋᐊᖅᐸᓪᓗᓯ ᐊᑐᕆᐊᓂᒃ ᐃᑳᖅᐸᓪᓕᐊᑎᓪᓗᓯ: ᐃᔨᖏᓐᓂᒃ ᑕᑯᒋᐊᖅᐸᓪᓗᓯ ᐊᖁᑦᑐᑦ ᓄᖅᑲᖓᑎᓪᓗᒋᑦ ᐊᒻᒪ ᐃᑳᕐᕕᒃᑯᑦ ᐃᑳᖅᐸᓪᓗᓯ ᐅᕝᕙᓘᓐᓃᑦ ᐃᑳᕐᕕᓕᐊᖑᓯᒪᔪᒃᑯᑦ.
• ᐃᑳᖅᐸᖏᓪᓗᓯ ᐅᖓᑖᒍᑦ ᐹᓯᐅᑉ: ᐃᑳᖅᐸᓪᓗᓯ ᑭᓯᐊᓂ ᐹᓯᐅᑉ ᓵᖓᒍᑦ ᐊᖁᑎᒧᑦ ᑕᑯᓐᓇᖅᑕᐅᒍᓐᓇᕐᓗᑎᑦ.
• ᐃᑉᐱᒍᓱᐃᓐᓇᐸᓪᓗᓯ: Aᐊᑐᕋᓱᑉᐸᖏᓪᓗᓯ ᐊᕝᕕᐊᕈᑎᓂᒃ ᓲᕐᓗ ᐅᖄᓚᐅᑎᕋᓛᓂᒃ ᐅᕝᕙᓘᓐᓃᑦ ᑐᓵᒃᑯᑎᖏᓐᓂᒃ ᐱᓱᑦᑎᓪᓗᓯ ᐹᓯᐅᑉ ᓄᖅᑲᑕᕐᕕᖓᓄᑦ ᐅᕝᕙᓘᓐᓃᑦ ᕿᒪᐃᕙᓪᓕᐊᑎᓪᓗᓯ ᐹᓯᐅᑉ ᓄᖅᑲᑕᕐᕕᖓᓂᒃ.
ᐊᖅᑯᑎᐅᔪᑦ:
• ᐅᔾᔨᕈᓱᒋᐊᕐᓯᒪᐃᓐᓇᐸᓪᓗᓯ: ᖃᐅᔨᓴᖅᐸᓪᓗᓯ ᐃᓕᓐᓂᐊᖅᑎᓄᑦ ᐹᓯᓂᒃ ᐊᒻᒪ ᓱᕈᓯᕐᓂᒃ ᐃᑳᖅᑐᖃᓕᕐᒪᖔᖅ ᐊᑐᕆᐊᒃᑯᑦ, ᐱᓗᐊᖅᑐᒥ ᐃᓕᓐᓂᐊᕐᕖᑦ ᐊᕙᑎᖏᓐᓂ.
• ᓄᖅᑲᐸᓪᓗᓯ ᐹᓯ ᓄᖅᑲᖓᑎᓪᓗᒍ: ᐃᓕᓐᓂᐊᖅᑎᓄᑦ ᐹᓯᒥᒃ ᓄᖅᑲᖅᑐᖃᖅᐸᑦ ᐊᒻᒪ ᓴᖅᑮᓗᓂ ᐊᐅᐸᖅᑐᓂᒃ ᖃᐅᒪᓂᒃ ᐊᒻᒪ ᓄᖅᑲᖁᔨᔾᔪᑎᒥᒃ, ᓄᖅᑲᐸᓪᓗᓯ ᐊᒻᒪ ᐅᑕᖅᑭᕙᓪᓗᒍ ᐹᓯ ᐃᖏᕐᕋᓯᓚᐅᖏᓐᓂᖓᓂ ᐃᖏᕐᕋᓯᓚᐅᖏᓂᕐᓂ.
• ᓱᒃᑲᐃᓕᒋᐊᖅᐸᓪᓗᓯ: ᓱᒃᑲᐃᓪᓕᒋᐊᖅᐸᓪᓗᓯ ᐃᓕᓐᓂᐊᕐᕖᑦ ᐊᕙᑎᖏᓐᓂ ᐊᒻᒪ ᓇᔪᒐᖃᕐᕕᓐᓂ ᓱᕈᓯᖅᑕᖃᑐᐃᓐᓇᕆᐊᖃᕐᒪᑕ ᐊᕙᑎᖏᓐᓂ.
• ᐅᑕᖅᑭᓯᐊᖅᐸᓪᓗᓯ: ᖄᖐᒐᓱᑉᐸᖏᓪᓗᓯ ᐃᓕᓐᓂᐊᖅᑎᓄᑦ ᐹᓯᓂᒃ, ᓄᖅᑲᖓᖃᑕᐅᒐᓗᐊᖅᐸᑕ ᐊᑐᕆᐊᕐᓂ ᓄᓇᒃᑰᔫᓄᑦ.
ᐃᖅᑲᐅᒪᕙᓪᓗᓯ ᒪᓕᒐᕐᒥᒃ ᓱᕋᐃᓂᐅᒻᒪᑦ ᖄᖐᓪᓗᓂ ᐃᓕᓐᓂᐊᖅᑎᓄᑦ ᐹᓯᒥᒃ ᐊᐅᑉᐸᖅᑐᑦ ᖃᐅᒪᖏᑦ ᐃᑯᒪᑎᑕᐅᑎᓪᓗᒋᑦ ᐊᒻᒪ ᓄᖅᑲᖓᖁᔨᔾᔪᑎᖓ ᑕᑯᑦᓴᐅᑎᑕᐅᑎᓪᓗᒍ. ᐊᖁᑎᐅᔪᑦ ᑕᒪᒃᑮᓐᓂ ᐊᑐᕆᐊᓂ ᓄᖅᑲᖓᐃᓐᓇᕆᐊᖃᖅᐸᑦᑐᑦ ᐊᐅᐸᑦᑐᖅ ᖃᐅᒪᐃᑦ ᖃᒥᑕᐅᓚᐅᖏᓐᓂᖏᓐᓂ.
ᓱᕈᓯᖁᑎᕗᑦ ᐊᑦᑕᓇᖅᑐᒦᑎᑦᑕᐃᓕᒪᓚᕗᑦ.
##
ᑐᑭᓯᒋᐊᒃᑲᓐᓂᕐᕕᑦᓴᖅ ᖃᐅᔨᒋᐊᕐᓗᒍ ᐅᓇ:
ᓯᑏᕙᓐ ᐋᓚᓐ
ᐊᖏᔪᖅᑳᖓᑦ ᒪᓕᒐᕋᓛᓕᕆᔨᒃᑯᑦ
867-979-5674
