ᑲᓇᑕᐅᑉ ᐸᓖᓯᖏᑦ – 
ᖃᑦᑎᕆᔨᒃᑯᑦ/ᓄᓇᒃᑰᔫᖅ ᑐᐊᕕᖅᑐᓕᕆᔾᔪᑎ – 
ᐱᕐᓯᑎᓪᓗᒍ ᑐᑭᓯᒋᐊᕐᕕᒃ – 
ᑭᒃᑯᑐᐃᓐᓇᕐᓄᑦ ᑐᓴᕋᑦᓴᖅ
ᐃᓪᓗᒥ ᐊᑐᒐᕐᓂᒃ ᐅᓗᕆᐊᓇᖅᑐᓂᒃ ᓴᓂᕐᓂᒃ ᐃᒋᐅᖅᑲᐃᓂᖅ - ᐹᑕᓖᓂᒃ ᓴᖕᖏᑎᒃᑲᓐᓂᕈᓐᓇᖅᑕᓂᑦ
ᒪᐃ 27, 2024 - ᐃᖃᓗᐃᑦ, ᓄᓇᕗᑦ
ᓄᓇᓕᐸᐅᔭᐃᑦ ᐃᖃᓗᐃᑦ ᐃᖅᑲᐃᑎᑦᓯᒍᒪᓕᕆᕗᑦ ᓄᓇᓕᕐᒥᐅᑕᓂᒃ ᐱᒻᒪᕆᐅᓂᖓᓂᒃ ᐃᒋᑦᓯᑦᓯᐊᖃᑦᑕᕐᓂᖅ ᐹᑕᓖᓂᒃ ᓴᖕᖏᑎᒃᑲᓐᓂᕈᓐᓇᖅᑐᓂᒃ ᐊᒻᒪ ᐅᐊᔭᒨᖅᑐᓂᒃ ᐹᑕᓖᖃᖅᐸᑦᑐᓂᒃ ᓴᖕᖏᑎᒃᑲᓐᓂᕈᓐᓇᖅᑐᓂᒃ ᐃᓚᒋᔭᐅᓗᑎᒃ ᓴᓂᑐᐃᓐᓇᕐᓄᑦ ᐃᒋᑕᐅᖃᑦᑕᕆᐊᖃᖏᒻᒪᑕ. ᐃᓪᓗᒥᒃ ᓴᓂᕐᓄᑦ ᐃᓚᒋᔭᐅᓗᑎᒃ ᐃᒋᖃᓯᐅᔾᔭᐅᕙᒃᑯᑎᒃ, ᑕᒪᒃᑯᐊ ᐹᑕᓖᑦ ᐅᓗᕆᐊᓇᖅᑐᒻᒪᕆᓐᓂᒃ ᓴᖅᑮᔪᓐᓇᕐᒪᑕ, ᓲᕐᓗ:
• ᐃᑯᐊᓪᓚᐃᑐᐃᓐᓇᕆᐊᓖᑦ: ᓱᕋᑦᓯᒪᒍᑎᒃ ᐅᕝᕙᓘᓐᓃᑦ ᐱᐅᖏᒃᑯᑎᒃ, ᑕᒪᒃᑯᐊ ᐹᑕᓖᑦ ᐃᑭᓴᕋᐃᑦᑐᒻᒪᕆᐅᒻᒪᑕ. ᐃᒋᑕᐅᖃᓯᐅᑎᓯᒪᑎᓪᓗᒋᑦ ᐃᑯᐊᓪᓚᐃᔪᓐᓇᓂᕐᓴᐅᒻᒪᑕ ᓴᓂᕐᓂᒃ ᓄᐊᑦᑎᔨᓄᑦ ᓄᓇᒃᑰᔫᖏᓐᓂᒃ, ᐊᑦᓯᕕᓐᓂᒃ, ᐊᒻᒪ ᐊᑐᒃᑲᓐᓂᕈᓐᓇᖅᑐᓂᒃ ᐱᓕᕆᕝᕕᓐᓂᒃ.
• ᐊᕙᑎᒥᒃ ᓱᕈᐃᔪᓐᓇᖅᑐᑦ: ᓴᖕᖏᑎᒃᑲᓐᓂᕈᓐᓇᖅᑐᑦ ᐹᑕᓖᑦ ᐊᑦᓯᕈᒻᒨᖅᑕᐅᒐᐃᒻᒪᑕ, ᕿᓪᓛᓕᕈᓐᓇᕐᒪᑕ ᐅᓗᕆᐊᓇᖅᑐᓂᒃ ᐃᓚᐅᕈᑎᖏᓐᓂᒃ ᓯᐅᕋᕐᒧᑦ ᐊᒻᒪ ᐃᒥᕆᔭᐅᕙᑦᑐᒧᑦ. ᑕᒪᓐᓇ ᓱᕈᓐᓇᖅᑐᖅ ᐅᓗᕆᐊᓇᓕᕈᓐᓇᑐᒻᒪᕆᐅᔪᖅ ᓄᓇᒥ ᐱᓕᕆᔾᔪᑎᓄᑦ ᐊᒻᒪ ᑭᒃᑯᑐᐃᓐᓇᐃᑦ ᐃᓗᓯᖏᓐᓄᑦ.
• ᐅᓗᕆᐊᓇᕈᓐᓇᖅᑐᑦ ᓴᓂᕐᓂᒃ ᐊᐅᓚᑦᓯᔨᓄᑦ ᐱᓕᕆᔨᓄᑦ: ᐱᑦᓯᐊᖏᑦᑐᒃᑯᑦ ᐃᒋᑕᐅᑎᓪᓗᒋᑦ ᓴᖕᖏᑎᒃᑲᓐᓂᕈᓐᓇᖅᑐᑦ ᐹᑕᓖᑦ ᐊᑦᑕᓇᖅᑐᒻᒪᕆᐅᒍᓐᓇᖅᑐᑦ ᓴᓂᕐᓂᒃ ᐊᐅᓚᑦᓯᔨᓄᑦ ᐱᓕᕆᔨᖏᓐᓄᑦ ᐃᑯᐊᓪᓚᕝᕕᐅᒍᓐᓇᕐᒪᑕ, ᖄᕐᕕᐅᔪᓐᓇᕐᒪᑕ, ᐅᕝᕙᓘᓐᓃᑦ ᓈᒻᒪᖏᑦᑐᒻᒪᕆᓐᓄᑦ ᐃᓚᐅᕈᑎᓄᑦ ᐊᑦᑐᖅᑕᐅᓗᑎᒃ.
ᓄᓇᓕᐸᐅᔭᒃᑯᑦ ᒫᓐᓇᐅᓂᖓᓂ ᒪᕐᕈᐃᓂᒃ (2) ᓇᓖᕌᕈᑎᖃᖅᑎᑦᓯᔪᑦ ᐊᑦᑕᓇᔾᔭᐃᕐᓯᒪᔪᒃᑯᑦ ᖃᓄᖅ ᐃᒋᑕᐅᔪᓐᓇᕐᓂᖏᓐᓄᑦ ᑕᒪᒃᑯᐊ ᐹᑕᓖᑦ. ᓄᓇᓕᕐᒥᐅᑕᐃᑦ ᐊᑦᓯᕕᒻᒨᕐᓗᑎᒃ ᐃᒋᑦᓯᒋᐊᖅᑐᕈᓐᓇᖅᑐᑦ ᐅᕝᕙᓘᓐᓃᑦ ᓇᓪᓕᐊᓐᓄᑐᐃᓐᓇᖅ ᐃᓪᓗᒥ ᐊᑐᒐᕐᓂᒃ ᐅᓗᕆᐊᓇᖅᑐᓂᒃ ᓴᓂᕐᓂᒃ ᐃᒋᐅᖅᑲᐃᑎᑦᓯᑎᓪᓗᒋᑦ ᓄᓇᓕᐸᐅᔭᒃᑯᑦ ᑐᖕᖓᓱᑦᑎᑦᓯᔨᐅᓗᑎᒃ, ᐃᖃᓗᐃᑦ ᐃᓗᐊᓂ ᓇᒥᑐᐃᓐᓇᖅ, ᐊᐅᔭᐅᓂᖓᓂ ᐊᒻᒪ ᐅᑭᐅᑦᓵᖑᓂᖓᓂ.
ᕿᒪᐃᕕᐅᒋᐊᖅᑐᕈᓐᓇᓛᖅᑐᑦ ᐅᑯᓇᓂ ᐅᓪᓗᕐᓯᐅᑎᒍᑦ ᐋᖅᑭᓱᖅᑕᐅᓯᒪᓛᖅᑐᑦ, ᐱᒋᐊᖅᐸᓪᓗᑎᒃ ᐅᓪᓛᒃᑯᑦ 9- ᒥᓂᒃ ᐅᓐᓄᓴᒧᓄᑦ 3-ᒧᓄᑦ:
• ᔪᓂ 29 ᐅᕙᓂ 226 (ᐃᓐᓇᑐᖃᐃᑦ ᖃᒻᒪᖓᑦ)
• ᔪᓚᐃ 27 ᐅᕙᓂ 2804 (ᐅᑭᐅᒃᑯᑦ ᐱᖕᖑᐊᕐᕕᐊᓗᒻᒥ)
• ᐋᒐᓯ 31 ᕼᐋᐱ ᕚᓕᒥ (ᐊᑯᓐᓂᖏᓐᓂ ᐃᓪᓘᒃ 411 ᐊᒻᒪ 413)
• ᓰᑏᐱᕆ 28 ᐅᕙᓂ 621 (ᓄᓇᓯᐅᑎᒃᑯᕕᒻᒥ - ᐃᓪᓗᖅ 621)
• ᐋᒃᑑᐸ 26 ᐅᕙᓂ 621 (ᓄᓇᓯᐅᑎᒃᑯᕕᒻᒥ - ᐃᓪᓗᖅ 621)
###
ᑐᑭᓯᒋᐊᒃᑲᓐᓂᕐᕕᑦᓴᖅ ᖃᐅᔨᒋᐊᕐᓗᒍ:
ᕖᑕᓂ ᐄᓯᒪᐃᓕ
ᐊᑦᓯᕕᒻᒥ ᐃᖅᑲᓇᐃᔭᖅᑎᓂᒃ ᐊᖏᔪᖅᑳᖅ | 867.222.2972 | b.eeseemailee@iqaluit.ca
