ᑭᒃᑯᑐᐃᓐᓇᕐᓄᑦ ᑐᓴᕋᑦᓴᑦ
ᐊᖏᔫᑎᓂᑦ ᓴᓂᕐᓂᒃ ᓄᐊᑦᓯᓂᖅ 2016
ᒪᐃ 31, 2016 (ᐃᖃᓗᐃᑦ, ᓄᓇᕗᑦ) ᓄᓇᓕᐸᐅᔭᒃᑯᑦ ᖃᐅᔨᒪᖁᔨᓕᕐᒥᔪᑦ ᓄᓇᓕᓐᓂᒥᐅᑕᓂᑦ ᐊᓯᔾᔨᖅᑕᐅᓚᐅᕐᒪᑕ ᐊᖏᔫᑎᓂᑦ ᓴᓂᕐᓂᒃ ᓄᐊᑦᓯᓂᖅ ᐊᐅᔭᐅᓂᐊᖅᑐᒥ. ᐊᓯᔾᔨᕆᐊᖃᓚᐅᕐᒪᑕ ᐅᓗᕆᐊᓇᖅᑐᒦᖁᓇᒋᑦ ᓴᓇᔪᓕᕆᓂᕐᒥᑦ ᐃᖅᑲᓇᐃᔭᖅᑎᖁᑎᕗᑦ, ᐱᔨᑦᓯᕋᑦᓯᐊᖁᓪᓗᒋᑦ ᐱᑦᓯᐊᖅᑐᒥᑦ ᐊᒻᒪ ᑮᓇᐅᔭᑎᒍᑦ ᐱᕙᓪᓕᐅᑎᑦᓯᐊᖅᑐᓂᑦ, ᐊᒻᒪ ᐊᑐᐃᓐᓇᐅᑦᓯᐊᖁᓪᓗᒋᑦ ᐃᖅᑲᓇᐃᔭᖅᑏᑦ ᐊᑐᕆᐊᓂᑦ ᐊᒻᒪ ᑰᕝᕕᓐᓂᑦ ᐃᖅᑲᓇᐃᔮᕆᕙᑦᑕᒥᓄᑦ.
ᐊᖏᔫᑎᓂᑦ ᓴᓂᕐᓂᒃ ᓄᐊᑦᓯᔪᓐᓇᐸᑦᑐᑦ ᐊᑭᓕᖅᑕᐅᒋᐊᑐᒐᑎᒃ ᓄᓇᓕᐸᐅᔭᒃᑯᑦ ᓄᓇᓕᓐᓂᒥᐅᑕᓄᑦ. ᓄᓇᓕᓐᓂᒥᐅᑕᐃᑦ ᑭᓯᐊᓂ ᒪᓕᖁᑐᐃᓐᓇᖅᑐᑦ ᐊᑐᐊᒐᕐᓂᑦ ᐊᐅᔭᐅᓂᐊᖅᑐᖅ:
-
ᓄᓇᓕᓐᓂᒥᐅᑕᐃᑦ ᓴᓂᕐᕙᐃᓯᒪᑦᓯᐊᕆᐊᓖᑦ ᓴᓂᐸᐅᔭᒥᓂᒃ ᓴᓇᔪᓕᕆᓂᕐᒥᑦ ᐃᖅᑲᓇᐃᔭᖅᑏᑦ ᐋᓐᓂᔾᔭᐃᕐᓯᒪᓇᓱᓐᓂᐊᕐᒪᑕ.
-
ᐱᖓᓱᓂᑦ ᐊᖏᔪᓂᑦ ᓴᓂᕐᓂᒃ ᐊᑕᐅᑦᓯᒃᑯᑦ ᐃᒋᑦᓯᒍᓐᓇᖅᑐᑦ ᑮᓇᐅᔭᐃᔭᕈᑕᐅᓗᐊᖁᓇᒍ ᓄᐊᑦᓯᓂᐅᕙᑦᑐᖅ ᓴᓂᐸᐅᔭᓂᑦ.
-
ᓄᓇᓕᓐᓂᒥᐅᑕᐃᑦ ᐊᑐᐃᓐᓇᐅᑎᑦᓯᒋᐊᓖᑦ ᓴᓂᐸᐅᔭᒥᓂᒃ ᐅᓪᓗᖓᓂ ᓄᐊᑕᐅᕕᒋᓂᐊᖅᑕᖏᓐᓂ. ᐊᕐᕌᒍᑦᑎᓐᓂ ᐅᓪᓗᕐᒥᑦ ᐊᑕᐅᓯᕐᒥᑦ ᓄᐊᑦᓯᕙᓐᓂᐊᖅᑐᑦ ᐃᓪᓗᓕᓐᓂᑦ ᖃᓂᒌᓂᑦ. ᓄᓇᓕᓐᓂᒥᐅᑕᐃᑦ ᐸᕐᓇᐃᒋᐊᓖᑦ ᖃᖓᒃᑯᑦ ᐊᖏᔫᑏᑦ ᓴᓂᖏᑦ ᐊᐃᔭᐅᖁᓛᕐᒪᖔᒋᑦ.
ᐅᓪᓗᕐᓯᐅᑦ
ᐅᓪᓗᕐᓯᐅᑎᖓ 2016-ᒥ ᓴᓂᐸᐅᔭᓂᑦ ᓄᐊᑦᓯᕕᐅᓂᐊᖅᑐᑦ ᐅᑯᐊ. ᖃᐅᔨᒪᓂᐊᖅᑯᓯ ᐊᑦᓯᕕᒃ ᑖᒃᑯᓇᓂ ᐅᓪᓗᕐᓂ ᒪᑐᓯᒪᖃᑦᑕᓛᕐᒪᑦ ᑭᒃᑯᑐᐃᓐᓇᕐᓄᑦ.
ᑕᓪᓕᕐᒥᖅ, ᔪᓂ 10 - ᐃᖃᓗᐃᑦ ᓄᓇᑐᖃᖓ, ᐃᓪᓗᓃᑦᑐᑦ ᓈᓴᐅᑎᓖᑦ 100-ᓂᑦ, 200-ᓂᑦ ᐊᒻᒪ 300-ᓂᑦ
ᑕᓪᓕᕐᒥᖅ, ᔪᓂ 17 - ᐃᖃᓗᐃᑦ ᓄᓇᑐᖃᖓ ᐊᒻᒪ ᐃᓄᒋᐊᕝᕕᖓ; ᐃᓪᓗᓃᑦᑐᑦ ᓈᓴᐅᑎᓖᑦ 600-ᓂᑦ, 700-ᓂᑦ, 800-ᓂᑦ, 1000-ᓂᑦ, ᐊᒻᒪ 1400-ᓂᑦ
ᑕᓪᓕᕐᒥᖅ, ᔪᓂ 24 - ᕼᐋᐱ ᕚᓕ, ᐃᓪᓗᓃᑦᑐᑦ ᓈᓴᐅᑎᓖᑦ 400-ᓂᑦ, 500-ᓂᑦ ᐊᒻᒪ 1600-ᓂᑦ
ᑎᓴᒻᒥᖅ, ᔪᓂ 30 - ᑕᓐᑐᕋ ᕚᓕ; ᐃᓪᓗᓃᑦᑐᑦ ᓈᓴᐅᑎᓖᑦ 2400-ᓂᑦ ᐊᒻᒪ 2500-ᓂᑦ
ᑕᓪᓕᕐᒥᖅ, ᔪᓚᐃ 8 - ᓂᐊᖁᖕᖒᓯᐊᕆᐊᖅ ᖁᑦᓯᓂᕐᓴᖅ; ᐃᓪᓗᓃᑦᑐᑦ ᓈᓴᐅᑎᓖᑦ 2200-ᓂᑦ, 2600-ᓂᑦ ᐊᒻᒪ 2700-ᓂᑦ
ᑕᓪᓕᕐᒥᖅ, ᔪᓚᐃ 15 - ᑕᓯᓗᓕᐊᕆᐊᕐᒥᐅᑦ ᐊᒻᒪ ᐃᒥᖅᑕᕐᕕᒥᓂᐅᑉ ᐊᕙᓗᐊᓂ; ᐃᓪᓗᓖᑦ ᓈᓴᐅᑎᓕᓐᓂᑦ 4000-ᓂᑦ
ᑕᓪᓕᕐᒥᖅ, ᔪᓚᐃ 22 - ᓂᐊᖁᖕᖒᑎ; 3000-ᓂᑦ ᐃᓪᓗᓖᑦ ᓈᓴᑎᓕᓐᓂᑦ
ᑕᓪᓕᕐᒥᖅ, ᔪᓚᐃ 29 - ᓯᓚᑦᑐᓴᕐᕕᐅᑉ ᐅᖓᑖᓂ; ᐃᓪᓗᓃᑦ ᓈᓴᑎᓕᓐᓂᑦ 5000-ᓂᑦ
ᑮᓇᐅᔭᓕᐅᕐᕖᑦ ᐃᓚᒋᔭᐅᔾᔮᖏᑦᑐᑦ ᐊᖏᔫᑎᓂᑦ ᓴᓂᑦᑕᓕᖅᐸᑕ (ᓲᕐᓗ ᐃᓄᒋᐊᕝᕕᒻᒥᐅᑕᐃᑦ, ᑰᓕᐊᕆᐊᒥ ᐊᒻᒪ ᖃᖅᑲᓕᐊᕆᐊᒥ).
ᓄᑖᖅ ᐅᓪᓗᕐᓯᐅᑎ ᓴᓇᔪᓕᕆᓂᕐᒥᑦ ᐃᖅᑲᓇᐃᔭᖅᑎᓂᑦ ᓄᐊᑦᓯᕕᐅᓂᐊᖅᑐᑦ ᓴᓂᐸᐅᔭᐅᑎᓂᑦ ᐅᓪᓗᕐᒥᑦ ᐊᑕᐅᓯᕐᒥᑦ ᐱᓇᓱᐊᕈᓯᐅᑉ ᐃᓗᐊᓂ, ᐊᓯᖏᓐᓂ ᐅᓪᓗᕐᓂ ᐃᖅᑲᓇᐃᔮᕆᕙᑦᑕᖏᓐᓂᑦ ᐃᖅᑲᓇᐃᔮᖃᕈᓐᓇᕐᓯᖁᖃᑦᑕᓂᐊᖅᑐᒋᑦ ᐊᐅᔭᐅᓂᐊᖅᑐᖅ ᓴᓇᒋᐊᓕᒻᒪᕆᐅᓕᖅᑐᓂᑦ ᐱᓕᕆᔾᔪᑎᒍᑦ ᒪᑭᒪᐅᑎᓂᑦ ᐊᒻᒪ ᓴᓇᒋᐊᓕᓐᓂᑦ.
ᓴᓂᐸᐅᔭᐃᑎᓂᑦ ᓄᐊᑦᓯᓂᕐᒥᑦ ᐊᐱᖅᑯᑏᑦ ᐊᒻᒪ ᑭᐅᔾᔪᑎᖏᑦ
ᓱᓇᑦ ᐃᓚᒋᔭᐅᔪᓐᓇᖅᐸᑦ ᓴᓂᐸᐅᔭᕐᓄᑦ? ᓴᓂᐸᐅᔭᐅᑎᐅᓂᕋᖅᑕᐃᑦ ᐃᓪᓗᓂᑦ ᓴᓃᑦ ᐅᖁᒪᐃᓂᓖᑦ ᐅᖓᑖᓂ 50 ᐸᐅᓐᔅ, ᐅᕝᕙᓘᓐᓃᑦ ᐊᖏᓗᐊᖅᐸᑦ ᓴᓂᒃᑯᕕᑐᐃᓐᓇᕐᒧᑦ ᕿᓪᓕᖅᑐᒧᑦ ᕿᓂᖅᑕᒧᑦ ᐴᕋᓱᒋᐊᖓ.
ᓱᓇᑦ ᓴᓂᐸᐅᔭᐅᓂᕋᖅᑕᐅᖏᓚᑦ? ᓴᕕᕋᔭᐃᑦ, ᓱᓇᒃᑯᑖᑦ ᐃᓪᓗᓂ, ᐅᐊᔭᒨᖅᑐᑦ, ᐊᒻᒪ ᐊᑦᓴᓗᐊᒥᓃᑦ ᓄᐊᑕᐅᔾᔮᖏᑦᑐᑦ. ᑮᓇᐅᔭᓕᐅᖅᑎᓄᑦ ᓴᓃᑦ ᓄᐊᑕᐅᔾᔮᖏᑦᑐᑦ ᐱᔨᑦᓯᕋᐅᑕᐅᒻᒪᑦ ᓄᓇᓕᓐᓂᒥᐅᑕᓄᑦ.
ᖃᓄᑎᒋ ᐊᖏᑎᒋᔪᓐᓇᖅᐸᑦ ᓄᐊᑕᐅᓂᐊᖅᑐᑦ? ᐱᖓᓱᓂᑦ ᓴᓂᐸᐅᔭᓂᑦ ᓄᐊᑦᓯᕙᓐᓂᐊᖅᑐᑦ ᓇᔪᒐᕐᓂᑦ ᐅᓪᓗᕐᓯᐅᑎᒍᑦ ᐋᖅᑭᑦᑕᐅᓯᒪᔪᑦ ᒪᓕᑦᑕᐅᓗᑎᒃ. ᐊᓯᖏᑦ ᓄᐊᑕᐅᖃᑦᑕᓛᖏᑦᑐᑦ. ᓲᕐᓗ, ᓄᐊᑕᐅᔪᓐᓇᓛᖅᑐᑦ ᐊᑕᐅᓯᖅ ᐊᓪᓕᓂᒥᓂᖅ, ᐊᑕᐅᓯᖅ ᐃᑦᓯᕙᐅᑕᑯᑖᒥᓂᖅ, ᐊᒻᒪ ᐊᑕᐅᓯᖅ ᑲᑎᕐᓱᕐᓯᒪᔪᑦ ᓇᑎᒥᓃᑦ. ᓄᐊᑕᐅᖃᑦᑕᓛᖅᑐᓂᑦ ᑎᑎᕋᖅᑕᐅᓯᒪᔪᓂᑦ ᑕᑯᒋᐊᕈᓐᓇᖅᑐᓯ.
ᖃᖓᒃᑯᑦ ᐊᑐᐃᓐᓇᐅᑎᒋᐊᖃᓛᖅᐸᑦ ᓄᐊᑕᐅᖃᑦᑕᓛᖅᑐᑦ? ᐅᓪᓗᕐᓯᐅᑎ ᒪᓕᓪᓗᒍ ᐃᓪᓗᐃᑦ ᐅᐸᑦᑕᐅᒋᐊᖃᓕᖅᐸᑦ, ᓴᓂᐸᐅᔭᑎᑦ ᐊᑐᐃᓐᓇᐅᔪᓐᓇᓛᖅᑐᑦ ᐅᓪᓛᒃᑯᑦ 8-ᒨᓚᐅᖏᓐᓂᖓᓂ. ᓱᓇᑐᐃᓐᓇᐃᑦ ᓴᓂᐊᓃᓗᐊᖅᑐᑦ ᓴᓂᒃᕕᑉᐱᑦ ᓄᐊᑕᐅᖁᖏᑕᑎᑦ ᐃᒋᑕᐅᑲᓪᓚᑐᐃᓐᓇᕆᐊᖃᕐᒪᑕ ᐅᔾᔨᕆᒋᐊᓕᑦᑎᑦ ᐅᑎᖅᑎᑕᐅᔾᔮᖏᒻᒪᑕ. ᓴᓂᐅᖏᑦᑐᑦ ᓴᓂᒃᑯᕕᑉᐱᑦ ᓴᓂᐊᓃᑎᓗᐊᓛᖏᓚᑎᑦ (ᐸᐃᓯᑯᐃᑦ, ᐱᖕᖑᐊᒐᓚᐃᑦ) ᐃᒋᑕᐅᑦᑕᑉᐱᐊᖓᑕ ᐱᔮᖅᑯᑕᐅᖏᑦᑐᒥᑦ.
ᖃᓄᕐᓕ ᓴᓃᑦ ᐋᖅᑭᑦᓯᒪᕆᐊᖃᓛᖅᐸᑦ? ᐊᕕᑦᑐᖃᑦᑕᕐᓗᒋᑦ ᐃᖅᑲᓇᐃᔭᖅᑎᓄᑦ ᐅᓗᕆᐊᓇᕐᓂᐅᓴᖏᓪᓗᑎᒃ. ᖁᓕᕇᑎᑉᐸᖏᓪᓗᒋᑦ. ᓴᓂᐸᐅᔭᐅᑏᑦ ᑲᑎᖓᓗᐊᖏᓪᓗᑎᒃ. ᐱᖓᓱᐃᓐᓇᐅᑎᓇᓱᐊᖅᐸᓪᓗᒋᑦ ᐃᑉᐱᒋᓗᒍ ᑕᐃᒪᐃᒋᐊᖃᕐᓂᖓ.
ᖃᓄᐃᑕᐅᖃᑦᑕᓂᐊᖅᐸᑦ ᓄᐊᑕᐅᓯᒪᔪᑦ ᓴᓂᐸᐅᔭᐅᑏᑦ? ᓴᓃᑦ ᓄᐊᑕᐅᕙᑦᑐᑦ ᐊᑦᓯᕕᒻᒧᑦ ᐃᒋᑕᐅᕙᓐᓂᐊᖅᑐᑦ. ᓄᓇᓕᓐᓂᒥᐅᑕᐃᑦ ᓴᓂᖃᓗᐊᔾᔭᐃᕈᓐᓇᕐᒥᔪᑦ ᐊᑦᓯᕕᒻᒧᑦ ᐃᒋᑕᑦᓴᓂᑦ. ᓱᓇᒃᑯᑖᒥᓂᑎᑦ ᖃᓄᐃᖏᑉᐸᑕ ᓂᐅᕕᐊᑦᓴᐅᔪᓐᓇᖅᑐᑦ, ᑕᐅᕐᓰᔾᔪᑎᒋᔪᓐᓇᖅᑕᑎᑦ, ᐅᕝᕙᓘᓐᓃᑦ ᐱᖃᖕᖏᑦᑐᓄᑦ ᑐᓂᑐᐃᓐᓇᕐᓗᒋᑦ.
ᓄᐊᑕᐅᔪᓐᓇᓛᖅᑐᑦ ᓴᓂᐸᐅᔭᐅᑏᑦ (ᐱᖓᓲᕙᓪᓗᑎᒃ)
ᐊᖏᔫᑏᑦ ᐊᖏᕐᕋᒥ ᓴᓃᑦ ᐅᖁᒪᐃᓐᓂᖏᑎᒍᑦ 50 ᐸᐅᓐᔅᖃᓗᐊᖅᑐᑦ ᐅᕝᕙᓘᓐᓃᑦ ᐊᖏᓗᐊᖅᑐᑦ ᕿᓂᖅᑕᒧᑦ ᕿᓪᓕᖅᑐᒧᑦ ᓴᓂᒃᑯᕕᒻᒨᕋᓱᒋᐊᖏᓐᓂᑦ ᒪᑯᐊᓗ:
-
ᐃᓪᓗᓂ ᓱᓇᒃᑯᑖᒥᓃᑦ (ᐃᑦᓯᕙᐅᑕᑯᑖᑦ, ᐃᑦᓯᕙᐅᑕᐃᑦ, ᓵᑦ, ᐊᓪᓕᓃᑦ, ᐊᓯᖏᑦ)
-
ᓇᑎᒥᓃᑦ (ᒥᖅᑯᓖᑦ, ᓂᕈᒻᒫᒃᑯᑏᑦ, ᐊᒻᒪ ᓵᑦᑐᐃᑦ), ᑲᑎᓯᒪᑉᐸᑕ ᐊᖏᓕᖃᕐᓗᑎᒃ 15 ᕖᑦ ᓴᓂᒧᑦ x 3 ᕖᑦ ᑐᑭᒧᑦ ᑕᑭᓂᓕᓐᓂᑦ (ᐊᑕᐅᓯᖅ ᑲᑎᓯᒪᔪᑦ ᕿᓚᑦᓯᒪᓪᓗᑎᒃ ᐊᑕᐅᓯᐅᓂᕋᖅᑕᖅ)
-
ᖁᕝᕕᒥᓃᑦ ᐊᒻᒪ ᓱᓪᓗᓕᒐᓚᐃᑦ ᐃᓚᑦᓴᖏᓪᓗ
-
ᐃᒐᓛᑦ ᐊᒻᒪ ᑕᕐᕋᖅᑑᑏᑦ
ᐊᖏᖅᑕᐅᔾᔮᖏᑦᑐᑦ
ᐅᑯᐊ ᓄᐊᑕᐅᔾᔮᖏᑦᑐᑦ ᓄᐊᑦᓯᓕᖅᐸᑕ ᐃᓪᓗᓂᑦ ᓴᓂᐸᐅᔭᐅᑎᓂᑦ.
ᐃᒻᒥᓂᒃ ᐃᒋᒋᐊᖅᑐᕆᐊᓕᑦᑎᑦ ᐊᑦᓯᕕᒻᒧᑦ ᒪᑐᐃᖓᑎᓪᓗᒍ.
-
ᐊᔾᔨᒌᖏᑦᑐᑦ ᓴᓂᕈᓘᔭᐃᑦ ᑲᑎᖕᖓᔪᑦ
-
ᐃᓪᓗᓕᐅᕈᑎᒥᓃᑦ ᐊᒻᒪ ᓱᕋᐃᔭᖅᑕᐅᓯᒪᔪᑦ
-
ᕿᔪᐃᑦ (ᓴᓇᔨᓂᑦ/ᓱᕋᐃᔭᖅᑕᓂᑦ, ᐃᓕᔾᔨᕕᒥᓃᑦ, ᕿᔪᐃᑦ ᑲᑎᖕᖓᔪᑦ, ᓱᓇᒃᑯᕕᒥᓃᑦ ᐅᒥᐊᕐᔪᐊᒃᑯᑦ, ᒪᑐᒥᓃᑦ, ᐊᓯᖏᑦ)
-
ᐅᐊᔭᒨᖅᑐᑦ (ᑏᕖᒥᓃᑦ, ᖃᕋᑕᐅᔭᒥᓃᑦ, ᐊᓯᖏᑦ)
-
ᐃᓪᓗᓂ ᓴᓗᒻᒪᕐᓴᐃᑎᒥᓃᑦ ᐅᓗᕆᐊᓇᖅᑐᑦ
ᓄᓇᒃᑰᔫᓄᑦ ᐃᓚᑦᓴᐃᑦ, ᐃᑦᓯᕙᐅᑕᒥᓃᓪᓗ
- ᓴᕕᕋᔭᐃᑦ ᐊᒻᒪ ᓱᓇᒃᑯᑖᑦ ᐃᓪᓗᓄᑦ
-
ᐃᔾᔪ ᐊᒻᒪ ᐅᔭᖅᑲᐃᑦ
-
ᐃᒥᕐᒥᑦ ᓂᓪᓕᓇᖅᑐᒃᑯᕖᑦ ᓂᓪᓕᓇᐃᓐᓇᖅᑐᓖᑦ
-
ᐆᒪᔪᖁᑎᓂᑦ ᓴᓃᑦ
-
ᐃᑦᑎᕐᕕᐅᔭᒥᓃᑦ ᐸᐃᑉᐹᑦ ᑎᒋᖓᔪᑦ. ᑕᒪᒃᑯᐊᓕ ᐃᓚᓕᐅᑎᓯᒪᒋᐊᓕᑦᓯ ᐃᓪᓗᓯᓐᓂᑦ ᓴᓂᕐᓄᑦ ᓄᐊᑕᐅᕙᑦᑐᓄᑦ ᖃᐅᑕᒫᑦ ᐅᕝᕙᓘᓐᓃᑦ ᓇᒻᒥᓂᖅ ᐊᑦᓯᕕᒻᒨᕈᑎᕙᓪᓗᒋᑦ.