ᒪᑐᐃᖅᑕᐅᓂᖓ ᐃᖃᓗᐃᑦ ᐳᐃᔾᔪᕋᖅᕕᖓ

ᑐᓴᕋᔅᓴᑦ

ᒪᑐᐃᖅᑕᐅᓂᖓ ᐃᖃᓗᐃᑦ ᐳᐃᔾᔪᕋᖅᕕᖓ  

 

ᔮᓐᓄᐊᓕ 26, 2017 - (ᐃᖃᓗᐃᑦ − ᓄᓇᕗᑦ) -  ᐃᖃᓗᐃᑦ ᒪᐃᔭᖓ ᒫᑎᓕᓐ ᕆᐊᑦᕘᓐ, ᑐᒡᓕᐊ ᒪᐃᔭᐅᑉ ᕉᒪᐃᓐ ᓯᑎᕙᓐᓴᓐ, ᑲᑎᒪᔨ ᓴᐃᒪᓐ ᓇᑖᖅ, ᒪᓕᒐᓕᐅᖅᑎᕐᔪᐊᖅ ᕼᐊᓐᑐ ᑐᑐ, ᐃᑦᑐᐃᑦ ᑲᑎᒪᔨᖏᓐᓄᑦ ᑲᑎᒪᔨ ᑎᐊᓂᔅ ᐹᑐᓴᓐ, ᒥᓂᔅᑕ ᔫ ᓴᕕᑲᑖᖅ, ᐊᒻᒪᓗᒃᑕᐅᖅ ᑕᒪᕐᒥᒃ ᓄᓇᓕᐸᐅᔭᒃᑯᑦ ᑲᑎᒪᔨᖏᑦ ᒪᑐᐃᖅᓯᓂᖃᖅᑲᐅᔪᑦ ᐃᖃᓗᐃᑦ ᐳᐃᔾᔪᕋᖅᕕᖓᓂᒃ ᐅᓪᓗᒥ ᓇᑲᑦᑎᓪᓗᑎᒃ ᕿᓚᕈᑎᒥᒃ ᐃᓯᕆᐊᖓᓂ ᑕᐃᒃᓱᒪ ᐃᓪᓘᑉ ᐊᑦᔨᒌᖏᑦᑐᓄᑦ ᖃᓄᐃᓕᐅᖅᕕᐅᖃᑦᑕᓂᐊᖅᑐᖅ.  

“ᒪᑐᐃᖅᑕᐅᓂᖓ ᐳᐃᔾᔪᕋᖅᕕᐅᑉ ᓯᕗᓐᓕᖅᐸᒥᒃ ᐊᑐᖅᑕᐅᔪᖅ ᐃᖃᓗᓐᓂ ᐊᒻᒪᓗ ᓄᓇᕗᑦᒥ,” ᐅᖃᑦᑐᓂ ᒪᐃᔭ ᕆᐊᑦᕘᓐ. “ ᑖᓐᓇ ᐃᓪᓗ, ᐊᑦᔨᖃᖏᑦᑐᖅ ᓄᓇᕗᑦᒥ, ᐃᑲᔫᑎᖃᓐᓂᐊᖅᑐᖅ ᑮᓇᐅᔭᓕᐅᕐᓂᒃᑯᑦ ᐊᒻᒪᓗ ᐃᓅᓯᓕᕆᓂᒃᑯᑦ ᓄᓇᖃᑦᑎᑐᐃᓐᓇᐅᖏᑦᑐᓄᑦ ᐃᖃᓗᓐᓂ, ᑭᓯᐊᓂᓗ ᓄᓇᕗᑦᒥᐅᑕᓕᒫᓄᑦ.”  

ᐳᐃᔾᔪᕋᖅᕕᖃᓐᓂᐊᖅᑐᓂ 25-ᒦᑕ ᑕᑭᓂᓕᒻᒥᒃ, ᐊᑦᔨᒌᖏᑦᑐᓄᑦ ᐊᑐᖅᑕᐅᔪᓐᓇᖅᑐᓄᑦ ᐃᓪᓗᕈᓯᕐᒥᒃ, ᑭᒃᑯᑐᐃᓐᓇᕐᓄᑦ ᐃᖃᐃᓕᓴᖅᕕᒻᒥᒃ, ᐃᖃᐃᓕᓴᐅᑎᖃᓪᓗᓂ, ᐊᒻᒪᓗᒃᑕᐅᖅ ᓂᕆᕕᐅᔪᓐᓇᖅᑐᒥᒃ ᐱᑕᖃᓪᓗᓂ ᐊᒻᒪᓗ ᐃᒥᒐᔅᓴᓄᑦ, ᑖᓐᓇ ᐳᐃᔾᔪᕋᖅᕕᒃ ᐱᐊᓂᒃᑕᐅᓚᐅᖅᑐᖅ ᓈᒻᒪᓈᑦᑎᐊᑐᒃᑯᑦ ᐊᒻᒪᓗ ᐅᖓᑖᓅᕈᑎᓐᖏᑎᐊᖅᑐᓂᒃ $40 ᒥᓕᐊᓐ ᑮᓇᐅᔭᑦ ᐊᖏᖅᑕᐅᓯᒪᔪᑦ.     

“ᒐᕙᒪᑐᖃᒃᑯᑦ ᐅᐱᒍᓱᑉᐳᑦ ᐃᑲᔪᖅᑐᖅᓯᒪᒐᒥᒃ ᓴᓇᔭᐅᓂᖓᓂᒃ ᐃᖃᓗᐃᑦ ᐳᐃᔾᔪᕋᖅᕕᖓᓂᒃ - ᐱᖁᑎᕐᔪᐊᖅ ᐃᓪᓗ ᐊᖏᔪᖅ, ᐊᑑᑎᖃᑦᑎᐊᖅᑐᒥᒃ ᐊᒃᑐᐃᓂᖃᓐᓂᐊᖅᑐᖅ ᓄᓇᓕᓐᓂᒃ,” ᐅᖃᑦᑐᓂ ᒥᓂᔅᑕ ᐊᒪᕐᔩᑦ ᓲᕼᐃ, ᒥᓂᔅᑕᖓ ᐱᖁᑎᕐᔪᓄᑦ ᐊᒻᒪᓗ ᓄᓇᓕᓐᓄᑦ. “ᐊᓕᐊᓇᐃᒍᓱᑦᑐᖓ ᖃᐅᔨᒪᓂᐊᕋᒪ ᑖᓐᓇ ᐳᐃᔾᔪᕋᖅᕕᒃ ᐊᑐᖅᑕᐅᑦᑎᐊᕈᓐᓇᓂᐊᕐᒪᑦ ᐃᓄᖏᓐᓄᑦ ᐃᖃᓗᐃᑦ ᐅᑭᐅᖃᑦᑐᓕᒪᓄᑦ ᐃᖃᐃᓕᓴᖅᕕᐅᖃᑦᑕᕐᓗᓂ, ᐊᒻᒪᓗᒃᑕᐅᖅ ᑲᑎᕕᐅᖃᑦᑕᕐᓗᓂ ᐊᒻᒪᓗ ᓴᓐᖓᑦᑎᕆᓗᓂ ᓄᓇᓕᒻᒥᐅᑕᐅᓂᕆᔭᖓᓂᒃ.” 

“ᖁᕕᐊᓱᓪᓚᕆᑦᑐᖓ ᓄᓇᕗᑦ ᒐᕙᒪᒃᑯᑦ ᑮᓇᐅᔭᖃᑦᑎᑦᑎᔪᓐᓇᓚᐅᕐᒪᑕ ᐱᓐᖑᐊᓂᕐᒥᒃ ᐱᕚᓪᓕᑎᑦᑎᓇᓱᐊᖅᑐᑎᒃ ᐊᒻᒪᓗ ᐃᓅᓯᖃᑦᑎᐊᓂᕐᒧᑦ ᐊᑐᖅᑕᐅᔪᓐᓇᖅᑐᓂᒃ ᓄᓇᓕᐸᐅᔭᑦᑎᓐᓂ ᓄᓇᕗᑦᒥᐅᑕᓕᒫᓄᑦ,” ᐅᖃᑦᑐᓂ ᓄᓇᕗᑦ ᒥᓂᔅᑕᖓ ᓄᓇᓕᓐᓂᒃ ᒐᕙᒪᒃᑯᓂᓪᓗ ᐱᔨᑦᑎᕋᖅᑎᒃᑯᑦ ᔫ ᓴᕕᑲᑖᖅ. “ᓂᕆᐅᑦᑎᐊᖅᐳᖓ ᐊᑯᓂᒨᖓᔪᒃᑯᑦ ᐃᑲᔪᑎᖃᕐᓂᐊᕐᓂᖓᓂᒃ ᐃᓄᖁᑎᑦᑎᓐᓄᑦ.”

ᓴᓇᔭᐅᒋᐊᓯᓚᐅᖅᑐᖅ ᐳᐃᔾᔪᕋᖅᕕᒃ ᐃᐳᕈ 2015-ᖑᑎᓪᓗᒍ, ᐃᓄᓐᓂᒃ ᐅᖃᓪᓚᖃᑎᑎᖃᖃᑦᑕᓚᐅᖅᑐᑎᒃ ᓇᓗᓇᕈᓐᓃᓚᐅᕐᒪᑦ ᓄᓇᖃᑦᑎᐅᔪᑦ ᐊᓯᔾᔩᔪᒪᓕᓚᐅᖅᑐᑦ ᓄᓇᓖᑦ ᐳᐃᔾᔪᕋᖅᕕᖓᓂᒃ ᒪᑐᔭᐅᓚᐅᖅᑐᒥᒃ 2011-ᐸᖑᑎᓪᓗᒍ, ᐊᒻᒪᓗ ᐃᑲᔪᕈᒪᑦᑎᐊᖅᑐᑎᒃ ᑮᓈᐅᔭᖃᑦᑎᑦᑎᓂᒃᑯᑦ.

ᑮᓇᐅᔭᕆᒋᐊᖓᓚᐅᖅᓯᒪᔭᖓ ᐱᓕᕆᐊᒃᓴᐅᓂᐊᖅᑑᑉ ᓇᓚᐅᒃᑖᖅᑕᐅᓯᒪᓚᐅᖅᑐᖅ ᒫᓂ 40.6 ᒥᓕᐊᓐ, ᐊᑦᑎᓂᖅᓴᐅᓚᐅᖅᐳᑦ ᑮᓇᐅᔭᖅᑐᕈᑎᓪᓚᑦᑖᑦ. ᒥᑭᓂᖅᓴᐅᓂᖃᓚᐅᖅᐳᑦ ᑭᓇᐅᔭᖅᑐᕈᑎᑦ ᓄᓇᓕᐸᐅᔭᒃᑯᓐᓂᑦ ᓱᓇᒐᓚᖃᑦᑎᑕᐅᓂᖏᓐᓄᑦ ᐱᖁᑎᓄᑦ, ᓲᕐᓗ ᓄᓇᖓ. ᐊᓯᒃᑲᓐᓂᖏᑦ ᑮᓇᐅᔭᐃᑦ ᐃᑲᔫᑎᐅᓚᐅᖅᑐᑦ ᓄᓇᓕᐸᐅᔭᒃᑯᓐᓄᑦ ᐱᖃᓯᐅᔾᔨᔪᑦ $4 ᒥᓕᐊᓐ ᒐᕙᒪᑐᖃᒃᑯᑦ ᓄᓇᓕᕋᓛᓄᑦ ᑮᓇᐅᔭᖏᓐᓂᑦ, $7.5 ᒥᓕᐊᓐ ᐊᑐᖅᑐᐊᖅᑕᐅᔪᑦ ᐊᒻᒪᓗ $750 ᑕᐅᓴᓐ ᑮᓇᐅᔭᑦ ᑐᓐᖓᕕᖓᓂᑦ ᑲᓇᑕᒥ ᓄᓇᓕᓐᓄᑦ.

ᑖᒃᑯᐊ ᓄᓇᓕᐸᐅᔭᒃᑯᑦ ᖃᐅᔨᒪᓇᓱᓐᓂᐊᖅᑐᑦ ᓄᓇᖃᑦᑎᐅᔪᓕᒫᑦ ᐊᑐᕈᓐᓇᖁᓪᓗᒋᑦ ᐊᒥᓱᓄᑦ ᐃᓗᐊᓃᑦᑐᓄᑦ ᐳᐃᔾᔪᕋᖅᕕᐅᑉ. ᐅᓪᓗᒥ ᒪᑐᐃᖅᓯᓂᐅᔪᖅ ᒪᓕᖅᑲᐅᕗᖅ REACH-ᑯᑦ ᑮᓇᐅᔭᓕᐅᕋᓱᐊᕐᓂᕐᒧᑦ ᖃᓄᐃᓕᐅᕐᓂᐅᓚᐅᖅᑐᓄᑦ ᐳᐃᔾᔪᕋᖅᕕᒻᒥ ᐅᓐᓄᒃ, ᑮᓇᐅᔭᓕᐅᓚᐅᖅᑐᑦ ᐅᖓᑖᓄᑦ $18 ᑕᐅᓴᓐ ᐃᑲᔫᑕᐅᓂᐊᖅᑐᓂᒃ ᐃᑲᔪᖅᑕᐅᔭᕆᐊᓕᓐᓄᑦ ᐃᓚᒌᓄᑦ. ᓄᓇᓕᐸᐅᔭᒃᑯᑦ ᖃᐅᔨᓴᕐᒥᔪᑦ ᐊᓯᒃᑲᓐᓂᖏᓐᓂᒃ ᐃᑲᔫᑎᐅᔪᓐᓇᖅᑐᓂᒃ ᓄᓇᖃᑦᑎᐅᔪᓕᒫᑦ ᐃᓚᐅᔪᓐᓇᖁᓪᓗᒋᑦ ᑖᒃᓱᒥᖓ ᓄᑖᒥᒃ ᐃᓚᒌᓅᖓᔪᒥᒃ ᐳᐃᔾᔪᕋᖅᕕᒻᒥᒃ.

ᐃᖃᓗᒻᒥᐅᑦ ᖁᕕᐊᓲᑎᖃᖁᓪᓗᒋᑦ ᒪᑐᐃᖅᑕᐅᓂᖓᓂᒃ, ᐃᓯᕈᑎᑦ ᐊᑭᖃᖏᑦᑐᑦ ᔮᓐᓄᐊᓕ 26 ᐊᒻᒪᓗ 27, 2017. ᐊᑭᓖᖃᑦᑕᕐᓂᖅ ᐊᒻᒪᓗ ᖃᓄᐃᓕᐅᕐᓂᐅᖃᑦᑕᓂᐊᖅᑐᑦ ᐱᖏᐊᕐᓂᐊᖅᑐᑦ ᓯᕙᑖᖅᕕᒻᒥ, ᔮᓐᓄᐊᓕ 28, 2017.

ᐅᓂᒃᑳᑦ ᐱᕙᓪᓕᐊᓂᕆᓯᒪᔭᖓᓄᑦ ᐃᖃᓗᐃᑦ ᐳᐃᔾᔪᕋᖅᕕᖓ:

http://www.city.iqaluit.nu.ca/sites/default/files/final-backgrounder_-_iqaluit_aquatic_centre_grand_opening_-_january_24_2017_-_inuktitut.pdf

30-

ᐊᓯᒃᑲᓐᓂᖏᓐᓄᑦ ᑐᑭᓯᐅᒪᔾᔪᑎᓄᑦ, ᖃᐅᔨᒋᐊᕆᑦ ᐅᕗᖓ:

 

ᐋᓐᑐᕆᐊ ᓯᐱᑦᓱᕐ

ᑐᓴᐊᒪᖃᑦᑕᐅᑎᓕᕆᔨᒃᑯᑦ

ᐃᖃᓗᐃᑦ ᓄᓇᓕᐸᐅᔭᒃᑯᑦ

ᖃᕆᔭᐅᒃᑯᑦ ᑎᑎᕋᖅᕕᐊ: A.Spitzer@city.iqaluit.nu.ca