ᓄᑖᖅ ᐊᕐᕌᒍᒧᑦ ᐅᓐᓄᐊᖓᓕ ᖁᒻᒧᐊᔫᑦ ᓴᕿᔮᖅᑎᑕᐅᓂᐊᖅᑐᑦ

ᑭᒃᑯᑐᐃᓐᓇᕐᓄᑦ ᑐᓴᕋᑦᓴᖅ
ᓄᑖᖅ ᐊᕐᕌᒍᒧᑦ ᐅᓐᓄᐊᖓᓕ ᖁᒻᒧᐊᔫᑦ ᓴᕿᔮᖅᑎᑕᐅᓂᐊᖅᑐᑦ
ᑎᓯᐱᕆ 27, 2024 – ᐃᖃᓗᐃᑦ, ᓄᓇᕗᑦ

ᓄᓇᓕᐸᐅᔭᒃᑯᑦ ᐃᖃᓗᐃᑦ ᖁᕕᐊᓱᒃᐳᑦ ᑐᓴᖅᑎᑦᑎᔪᓐᓇᕋᒥᒃ ᐅᑎᖅᑐᑦ ᖁᕕᐊᒋᔭᐅᓂᖅᐸᐅᓲᖅ ᐊᕐᕌᒍᑕᒫᑦ ᓄᑖᒧᑦ ᐊᕐᕌᒍᒧᑦ ᐅᓐᓄᐊᖓᓕ ᖁᒻᒨᐊᔫᓂᒃ ᓴᕿᔮᖅᑎᑦᑎᓂᐊᖅᑐᑦ ᖁᕕᐊᓱᒍᑎᖃᕐᓗᑎᒃ ᑎᑭᑕᐅᖕᒪᖔᑦᑕ 2025-ᒧᑦ! ᖁᒻᒧᐊᔫᑦ ᖃᐅᒻᒪᒃᑎᑦᑎᓂᐊᖅᑐᑦ ᓯᓚᑦᑎᓐᓂᒃ ᐅᓐᓄᐊᖅ ᖁᓛᓂ ᑎᓯᐱᕆ 31, 2024, ᐱᒋᐊᕐᓂᐊᖅᑐᑦ ᐃᑎᔪᒥ ᑭᓴᕐᕕᖕᒥᑦ.

ᐊᖏᔪᒥᒃ ᖁᔭᓕᕗᒍᑦ ᒪᐃᑯ ᓴᓗᒪᓂ ᐊᑑᑎᖃᒻᒪᕆᒃᑐᒥᒃ ᐃᑲᔪᖅᓯᒪᔪᖅ ᑲᒪᒋᓪᓗᒍ ᑕᒪᓐᓇ ᖃᓄᐃᓕᐅᖃᑎᒌᖕᓂᐅᔪᖅ, ᐳᐃᒍᔮᙱᑕᑦᑎᓪᓕᒃ ᖁᕕᐊᓱᒍᒃᑎᑦᑎᕗᖅ ᑕᒪᐃᓐᓄᑦ. ᖁᔭᓐᓇᒦᒃᑕᐅᖅ ᐊᖏᔪᒥᒃ ᐱᕙᓪᓕᐊᔪᓕᕆᔨᒃᑯᑦ ᐃᖏᕐᕋᔪᓕᕆᔨᒃᑯᓪᓗ ᐃᑲᔪᕐᒪᑕ ᐋᕿᒃᓱᑐᐃᓪᓗᑎᒃ ᐊᑐᖅᑕᐅᓪᓗᓂ ᐃᑎᔪᒥ ᑭᓴᕐᕕᑦ ᑕᒪᑐᒧᖓ ᐊᕐᕌᒍᒥᑦ ᓄᑖᒥᒃ ᖁᕕᐊᓱᒍᑎᖃᖅᑎᓪᓗᑕ.

ᑲᑎᖓᕗᒍᑦ ᓄᑖᒧᑦ ᐊᕐᕌᒍᒧᑦ ᑎᑭᑕᐅᒐᑦᑕ, ᓄᓇᓕᐸᐅᔭᒃᑯᑦ ᑲᔪᖏᖅᓴᐃᕗᑦ ᓄᓇᖃᖅᑐᑦ ᐊᓐᓄᕌᖅᑐᖅᓯᒪᑦᑎᐊᕐᓗᑎᒃ ᕿᐅᓂᐊᙱᒻᒪᑕ ᐊᒻᒪᓗ ᐊᑦᑕᕐᓇᖅᑐᒦᑦᑐᖃᓕᕐᓂᐊᙱᒻᒪᑦ ᖁᕕᐊᒋᔭᖅᑐᖅᓯᒪᓗᒍ ᑕᒪᓐᓇ ᓇᓪᓕᐅᓐᓂᖅᓯᐅᕈᑕᐅᔪᖅ. ᓄᓇᓯᐅᑎᑦ ᑕᑕᕿᓗᐊᕐᓂᐊᙱᒻᒪᑕ, ᐱᓱᖁᔨᕗᒍᑦ ᖁᖏᐊᕆᐊᖅᑐᕐᕕᖕᓄᑦ ᓇᒥᑐᐃᓐᓇᖅ. ᐊᒻᒪᓗ, ᐃᖃᐃᑎᑦᑎᔪᒪᕗᒍᑦ ᑕᒪᐃᓐᓂᒃ ᑖᓐᓇ ᐊᖁᑖ ᓯᒥᒃᑕᐅᑕᐃᓕᓗᓂ ᑭᓴᕐᕕᐅᑉ ᐅᕝᕙᓘᓐᓃᑦ ᓯᒡᔭᖓᑕ ᓄᓇᓯᐅᑎᓄᑦ ᐃᓯᖅᑕᐅᔪᓐᓇᕐᓂᐊᕐᒪᑕ ᑕᒪᐃᓐᓂᑦ ᐃᓚᐅᔪᓂᑦ.

ᐅᓐᓄᐊᖅ ᐅᓇ ᖁᕕᐊᒋᔭᐅᓗᓂ ᐳᐃᒍᖅᑕᐅᔪᓐᓇᔮᙱᒻᒪᑦ ᑐᙵᓱᒃᑎᑦᑎᕗᒍᑦ ᓄᑖᒧᑦ ᐊᕐᕌᒍᒧᑦ ᖁᕕᐊᓱᒃᓗᑎᒃ ᐊᒻᒪᓗ ᓄᓇᖃᑎᒌᑦᑎᐊᕐᓗᓯ!

ᖁᕕᐊᓱᒋᑦᓯ ᓄᑖᒧᑦ ᐊᕐᕌᒍᒧᑦ, ᐃᖃᓗᐃᑦ!

##

ᑐᑭᓯᒋᐊᒃᑲᓐᓂᕈᒪᔪᑦ ᖃᐅᔨᒋᐊᖅᑕᐅᒍᓐᓇᖅᑐᖅ ᐅᓇ:

ᔩᐅᑉ ᕙᕐᓂ
ᑐᓴᐅᒪᖃᑎᒋᓐᓂᕐᒧᑦ ᐊᒻᒪᓗ ᐱᔨᔅᓯᖅᑕᐅᕙᒃᑐᓄᑦ ᐱᔨᔅᓯᕈᑎᒥ ᐊᐅᓚᑦᑎᔨ
ᓄᓇᓕᐸᐅᔭᐃᑦ ᐃᖃᓗᐃᑦ
867-979-5619 | G.Byrne@iqaluit.ca