ᑲᓇᑕᐅᑉ ᐸᓖᓯᖏᑦ – 
ᖃᑦᑎᕆᔨᒃᑯᑦ/ᓄᓇᒃᑰᔫᖅ ᑐᐊᕕᖅᑐᓕᕆᔾᔪᑎ – 
ᐱᕐᓯᑎᓪᓗᒍ ᑐᑭᓯᒋᐊᕐᕕᒃ – 
ᓄᓇᓕᐸᐅᔭᐃᑦ ᑲᑎᒪᔨᖏᑦ ᓈᒻᒪᓴᖅᑐᑦ ᑲᔪᓯᑎᑦᑎᓪᓗᑎᒃ 2020-ᒥ ᑲᑎᕐᓱᕐᓯᒪᔪᓂᑦ ᑮᓇᐅᔭᓕᕆᔾᔪᑎᒥᓂᕐᓂᒃ ᑎᑎᕋᕐᓯᒪᓂᖏᓐᓂᑦ
ᐃᖃᓗᐃᑦ ᓄᓇᓕᐸᐅᔭᐃᑦ ᑲᑎᒪᔨᖏᑦ ᓈᒻᒪᑦᓴᕐᓂᒃᑯᑦ ᑲᔪᓯᑎᑦᑎᓚᐅᖅᑐᑦ 2020-ᒥ ᑲᑎᕐᓱᕐᓯᒪᔪᓂᑦ ᑮᓇᐅᔭᓕᕆᔾᔪᑎᒥᓂᕐᓂᒃ ᑎᑎᕋᕐᓯᒪᓂᖏᓐᓂᑦ ᑲᑎᒪᔩᑦ ᑲᑎᒪᑎᓪᓗᒋᑦ ᐋᒐᓯ 10, 2021. ᑎᑎᕋᕐᓯᒪᔪᑦ ᑕᑯᑦᓴᐅᑎᑦᑎᔪᑦ ᑮᓇᐅᔭᓕᕆᔾᔪᑎᒍᑦ ᖃᓄᐃᓕᖓᓂᕆᔭᖏᓐᓂᑦ ᐊᒻᒪ ᑮᓇᐅᔭᓕᕆᔾᔪᑎᒋᓯᒪᔭᖏᓐᓂᑦ ᓄᓇᓕᐸᐅᔭᒃᑯᑦ ᑎᑭᑦᑐᒍ ᑏᓰᐱᕆ 31, 2020.
ᓄᓇᓕᐸᐅᔭᒃᑯᑦ ᒪᑭᒪᑎᑦᑎᔪᓐᓇᓚᐅᕐᒪᑕ ᐃᓘᓐᓇᖏᒍᑦ ᓈᒻᒪᑦᑐᓂᑦ ᑮᓇᐅᔭᓕᕆᔾᔪᑎᒍᑦ ᖃᓄᐃᓕᖓᓂᐅᔪᒥᑦ ᐱᓪᓗᒋᑦ ᑮᓇᐅᔭᐃᑦ ᐱᓚᐅᕋᓗᐊᖅᑎᓪᓗᒋᑦ ᐊᑦᓱᕉᓴᓐᓇᖅᐸᓚᐅᖅᑐᑦ ᐱᔾᔪᑎᐅᓗᑎᒃ ᐊᑦᑐᐃᓂᕆᓚᐅᖅᑕᖏᑦ ᓄᕙᕐᔪᐊᕐᓇᖅ ᑰᕕᑦ-19. 2019-ᒥ, ᓄᓇᓕᐸᐅᔭᒃᑯᑦ ᐊᓂᒍᐃᒍᓐᓇᕐᓯᓚᐅᖅᑐᑦ ᐊᑭᓕᑦᓴᐃᔭᖅᐸᑦᑐᑎᒃ ᐊᒻᒪ 2020-ᒥ ᑮᓇᐅᔭᓕᕆᑦᑎᐊᕈᓐᓇᕐᓯᓪᓗᑎᒃ.
ᐱᓕᕆᔾᔪᑎᐅᓗᑎᒃ ᐊᒥᓱᓄᑦ ᖃᓂᒻᒪᒍᑎᐅᓚᐅᖅᑐᖅ, ᓄᓇᓕᐸᐅᔭᒃᑯᑦ ᓴᓂᕐᕙᐃᓚᐅᖅᑐᑦ $659,047-ᓂᑦ ᓄᕙᕐᔪᐊᕐᓇᖅ ᑰᕕᑦ-19 ᐱᓪᓗᒍ ᑮᓇᐅᔭᓂᑦ ᐱᓕᕆᔾᔪᑎᑦᓴᖏᓐᓂᑦ ᓄᓇᓕᓐᓂ ᑲᑐᔾᔨᖃᑎᒌᓄᑦ, $1.5 ᒥᓕᐊᓐᓂᑦ ᐊᖅᑯᑎᐅᓗᓂ ᑎᑭᓐᓂᖅ ᐊᖏᕐᕋᒧᑦ ᐱᓕᕆᐊᑦᓴᖅ ᑲᑐᔾᔨᖃᑎᒌᓅᖅᑐᑦᓴᐃᑦ ᐃᑲᔪᕐᓱᐃᕙᑦᑐᓄᑦ ᐊᖏᕐᕋᖃᖕᖏᑦᑐᓂᑦ ᒥᑭᓪᓕᑎᕆᓇᓱᐊᕈᑎᓂᑦ ᐊᒻᒪ $383,000 ᐊᖅᑯᑎᖃᖅᑐᑎᒃ ᒐᕙᒪᒃᑯᑦ ᓄᓇᕗᒻᒥ ᓄᓇᓕᓐᓂᑦ ᖃᓄᐃᖏᑦᑎᐊᖅᑐᓕᕆᔾᔪᑎᓂᑦ.
“ᓄᓇᓕᐸᐅᔭᒃᑯᑦ ᐊᑐᕈᓐᓇᕐᓯᓚᐅᕐᒪᑕ ᐊᓯᔾᔨᐅᑎᐅᔪᓂᑦ ᓯᕗᓪᓕᐅᑎᒋᐊᖃᓕᓚᐅᖅᑐᓂᑦ ᐃᑲᔪᕐᓱᐃᔾᔪᑎᑦᓴᑎᒍᑦ ᓄᓇᓕᑦᑎᓐᓂᑦ ᐊᑐᖅᑕᐅᓂᖓᓂ ᓄᕙᕐᔪᐊᕐᓇᖅ ᑰᕕᑦ-19 ᐊᒥᓱᓄᑦ ᖃᓂᒻᒪᒍᑎᐅᓚᐅᖅᑐᖅ,” ᐅᖃᖅᑐᖅ ᒪᐃᔭ ᐱᐅᓪ. “ᖃᓄᐃᖏᓕᐅᔪᖅ ᑮᓇᐅᔭᓕᕆᔾᔪᑎᒍᑦ ᖃᓄᐃᓕᖓᓂᕆᔭᕗᑦ ᓇᓗᓇᐃᕐᓯᒪᔪᑦ 2020-ᒥ ᑲᑎᕐᓱᕐᓯᒪᔪᓂᑦ ᑮᓇᐅᔭᓕᕆᔾᔪᑎᒥᓂᕐᓂᒃ ᑎᑎᕋᕐᓯᒪᓂᖏᓐᓂᑦ ᐱᒻᒪᕆᐅᕗᖅ ᐊᑐᖅᑕᐅᓗᓂ ᓄᓇᓕᐸᐅᔭᐃᑦ ᐃᖃᓗᐃᑦ ᑎᒥᖁᑎᖏᓐᓄᑦ. ᓄᓇᓕᐸᐅᔭᒃᑯᑦ ᓯᕗᒧᐊᑦᑎᐊᖅᑐᑦ ᑮᓇᐅᔭᓕᕆᔾᔪᑎᒍᑦ ᖃᓄᐃᖏᓂᕐᒧᑦ ᐱᐅᓯᑎᒋᐊᕈᑎᑦᓴᓄᑦ ᐊᑐᖅᑕᐅᔪᓐᓇᖅᑐᓂᑦ ᐱᔨᑦᓯᕋᐅᑎᑦᑎᓐᓂᑦ ᐊᒻᒪ ᐃᑲᔪᖅᑕᐅᕙᓪᓗᑕ ᑲᑐᔾᔨᖃᑎᒋᕙᑦᑕᑎᓐᓂᑦ, ᐅᐸᓗᖓᐃᕐᓯᒪᑦᑎᐊᖅᐳᒍᑦ ᐱᒻᒪᕆᐅᔪᓂᑦ ᑮᓇᐅᔭᐃᔭᕈᓐᓇᕆᐊᑦᓴᖅ ᑮᓇᐅᔭᓕᐅᕈᑎᑦᓴᓂᑦ ᒪᑭᒪᔾᔪᑎᑦᑎᓐᓄᑦ ᐱᓕᕆᔾᔪᑎᐅᔪᓄᑦ ᐃᑲᔪᕐᓱᐃᔾᔪᑎᑦᓴᓂᑦ ᐃᓄᒋᐊᑦᓯᕙᓪᓕᐊᔪᒥᑦ ᐊᖏᔪᖅᑳᖃᕐᕕᐅᔪᒥᑦ ᓄᓇᓕᐸᐅᔭᒥᑦ”.
ᓄᓇᓕᐸᐅᔭᒃᑯᑦ ᑲᑎᑦᑐᒋᑦ ᐱᖁᑎᖃᐅᑎᖏᑦ ᖁᕝᕙᒋᐊᓚᐅᖅᑐᑦ $10 ᒥᓕᐊᓂᑦ 2019-ᒥᑦ, ᐱᓯᒪᔪᑦ ᑮᓇᐅᔭᓂᑦ ᐊᒻᒪ ᑮᓇᐅᔭᖃᕈᓐᓇᖅᑐᓂᑦ ᐱᖁᑎᓂᑦ ᐃᓚᖕᖓᓚᐅᖅᑐᒋᑦ ᑮᓇᐅᔭᑎᒍᑦ ᐊᑭᓕᑦᓴᐃᔭᐅᑎᓂᑦ. ᐊᒻᒪᑦᑕᐅᖅ, ᑕᖏᓖᑦ ᐊᑭᑐᔪᑦ ᐱᖁᑎᐅᔪᑦ ᖁᕝᕙᒋᐊᓚᐅᖅᑐᑦ $166.5 ᒥᓕᐊᓄᑦ ᐃᒪᓐᓇᓂᒃ $159.8 ᒥᓕᐊᓂᑦ ᐊᕐᕌᒍᒥ 2019. ᑕᒪᓐᓇ ᖁᕝᕙᒋᐊᕈᑎᐅᓯᒪᔪᖅ ᐱᓯᒪᔪᑦ ᐱᔭᕇᖅᑕᐅᓯᒪᓂᖏᓐᓂᑦ ᐊᑭᑐᔪᑦ ᐱᓕᕆᐊᑦᓴᐃᑦ ᐱᖃᓯᐅᑎᓪᓗᒋᑦ ᓴᓇᒋᐊᕐᓂᖅ ᐃᒥᕐᒧᑦ ᐊᒻᒪ ᑭᓈᓗᓕᕆᔾᔪᑎᓄᑦ ᒪᑭᒪᔾᔪᑎᓄᑦ, ᓄᑖᖅ ᑕᖏᓕᓐᓂᑦ ᓴᓂᓕᕆᕝᕕᑦᓴᒥᑦ ᐸᕐᓇᐃᓂᕐᒥᑦ, ᓄᓇᓕᐸᐅᔭᐃᑦ ᐊᓪᓚᕝᕕᖓᓐᓄᑦ ᐊᑐᖅᑐᐊᕈᑎᒍᑦ ᐱᐅᓯᑎᒋᐊᕈᑎᓂᑦ ᐊᒻᒪ ᐊᐅᓚᐅᑎᑖᖅᐸᓚᐅᕐᒪᑕ ᐊᒻᒪ ᓱᓇᒃᑯᑖᓂᑦ ᐱᓕᕆᔾᔪᑎᑦᓴᓂᑦ. ᓄᓇᕗᒻᒥ ᓴᓇᔭᐅᓂᐊᖅᑐᓄᑦ ᐃᓗᐃᒃᑲᕐᓂᑦ ᑮᓇᐅᔭᖅᑖᖑᕙᑦᑐᓂᑦ, ᒐᕙᒪᑐᖃᒃᑯᓐᓂᑦ ᒑᓰᔭᐃᔭᐅᑎᒍᑦ ᑖᒃᓰᔭᐃᔭᐅᑎᒥᓂᕐᓂᒃ, ᓴᓂᕐᕙᐃᔭᖅᑕᐅᕙᑦᑐᓂᑦ ᐱᓕᕆᔾᔪᑎᑦᓴᓂᑦ ᐊᒻᒪ ᓱᓇᓕᒫᓄᑦ ᐊᐅᓚᑦᑎᔾᔪᑎᓂᑦ ᑮᓇᐅᔭᑎᒍᑦ ᐊᑐᖅᑐᑦᓴᓕᐊᖑᓯᒪᔪᑦ ᑮᓇᐅᔭᖃᖅᑎᑦᑎᕙᓚᐅᖅᑐᑦ ᑕᒪᒃᑯᓂᖓ ᐊᑭᑐᔪᓂᑦ ᑮᓇᐅᔭᐃᔭᐅᑎᐅᕙᓚᐅᖅᑐᓂᑦ.
ᑐᑭᓯᐊᒃᑲᓐᓂᕈᒪᒍᕕᑦ:
ᓖᓴ ᒥᓗᓴᕝᔨᕕᒃ
ᑐᓴᐅᒪᖃᑎᒋᓐᓂᕐᒧᑦ ᐊᒻᒪᓗ ᐱᔨᔅᓯᖅᑕᐅᕙᒃᑐᓄᑦ ᐱᔨᔅᓯᕈᑎᒥ ᐊᐅᓚᑦᑎᔨ
L.Milosavljevic@iqaluit.ca | 867-979-5607
